ރިޔާސީ ދައުރު ފެށޭ ދުވަހަކީ ނޮޮވެމްބަރު 11 ކަމަށް ކަނޑައެޅުމަށްޓަކައި ޤާނޫނު އަސާސީއަށް އިސްލާހު ހުށަހަޅުއްވާނެ ކަމަށް ބަންޑާރަނައިބު އަހުމަދު އުޝާމް ވިދާޅުވެއްޖެއެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އޭޖީ ވިދާޅުވީ ރިޔާސީ ދައުރު ފެށޭ ދުވަހަކީ ނޮވެމްބަރު 11 ކަމަށް ކަނޑައެޅުމަށްޓަކައި ގާނޫނުއަސާސީއަށް އިސްލާހު ހުށަހަޅަން ސަރުކާރުން ނިންމާފައިވާ ކަމަށެވެ.
"މި ދެންނެވި އިސްލާހަކީ އެ އިސްލާހު ގެނައުމަށްޓަކާ ޕަބްލިކް ރިޕެރެންޑަމްއަކަށް ދާންޖެހޭ ކަހަލަ އިސްލާހެއް ކަމަށްވާތީ މިކަހަލަ އިސްލާހުތައް އަޅުގަނޑުމެންނަށް ކުޑަކުޑަ ވަގުތުކޮޅެއް ނަގައިގެން އެކަން ކޮށްލެވޭނީ،" - ބަންޑާރަނައިބު އަހުމަދު އުޝާމް
ރާއްޖޭގައި މީގެކުރިން ރައީސުލްޖުމްހޫރިއްޔާ ހުވާކުރައްވަމުން އައީ ނޮވެމްބަރު 11 ގައެވެ. ނަމަވެސް 2013 ވަނަ އަހަރުގެ ރިޔާސީ އިންތިހާބުގައި ހަދާފައިވާ ގޯސްތަކެއްގެ ސަބަބުން ރިޔާސީ އިންތިހާބު ތިންވަނަ ފަހަރަށް ބާއްވަންޖެހުމާ ގުޅިގެން އެ އިންތިހާބަށްފަހު ރައީސުލްޖުމްހޫރިއްޔާ ހުވާކުރެއްވުން ވަނީ ނޮވެމްބަރު 17 އަށް ފަސްވެފައެވެ. ގާނޫނީ ގޮތުން އެ ބަދަލު އައީ ސުޕްރީމް ކޯޓުން 2013 ވަނަ އަހަރު ނެރުނު ހުކުމާއި ގައިޑްލައިންގެ ސަބަބުންނެވެ.
ބަންޑާރަ ނައިބް އުޝާމް، ނޫސްވެރިންގެ ބައްދަލުވުމުގައި ދެއްކެވި ވާހަކަފުޅުގައި ވިދާޅުވީ ސަރުކާރުގެ މައިގަނޑު ވައުދުތައް ފުއްދުމަށް ވޭތުވެދިޔަ އަހަރެއްހާ ދުވަހުގެ ތެރޭގައި މަސައްކަތްތަކުގެ ބޭރުންވެސް 40 ވަރަކަށް ބިލު މަޖިލީހަށް ހުށަހަޅާފައިވާނެ ކަމަށެވެ. އެގޮތުން ސަރުކާރުގެ އިގްތިސާދީ އެޖެންޑާއާއި ގުޅުންހުރި މިވަގުތު ހުށައަޅަން ބޭނުންވާ ހުރިހާ ބިލެއް ފޮނުވާފައިވާ ކަމަށެވެ.
މައިގަނޑު ގޮތެއްގައި ފަތުރުވެރިކަމުގެ ގާނޫނަށް ގެންނަން ބޭނުންވި އިސްލާހާއި މުދަލުން ޓެކްސް ނެގުމުގެ ގާނޫނަށް ގެނައުމަށް އެދުނު އިސްލާހުގެ އިތުރުން އެއަރޕޯޓު ޓެކްސްއަށް ބަދަލު ގެނައުންވެސް ހިމެނޭކަމަށެވެ.
