އެންޓި ޑިފެކްޝަން ގާނޫނެއް ބޭނުންވަނީ މީގެކުރިން މަޖިލިސް ތެރެއިން އެއް ޕާޓީގައި ހުރެފައި އަނެއް ޕާޓީއަށް ވޯޓު ދިނުމާއި، ދައުރު ނިމެން ކައިރިވެފައިވަނިކޮށް ޕާޓީ ބަދަލުކުރުން ފަދަ މައްސަލަތައް ހަލު ކުރުމަށް ކަމަށާއި، ބޭނުންވަނީ ކަޅާއި ހުދުން މެންބަރުން ވަކިވާނެ ހާލަތްތައް ބަޔާންކުރެވިފައި އޮތުން ކަމަށް މަޖިލީހުގެ ނައިބް ރައީސް، އަދި ދިއްގަރު ދާއިރާގެ މެންބަރު ނާޒިމް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަފުޅު ދައްކަވަމުން ނާޒިމް ވިދާޅުވީ 19 ވަނަ މަޖިލީހުން އެންޓި ޑިފެކްޝަން ގާނޫނުގެ ގޮތުގައި ފާސްކޮށްފައި އޮތް ގާނޫނަކީ އެ ގާނޫނަށް ގާނޫނު އަސާސީގެ ބެލެނިވެރިކަން ލިބިދީފައި އޮތް ގާނޫނެއް ނޫން ކަމަށެވެ.
ނާޒިމް ވިދާޅުވީ އެ ގާނޫނު އެއްވެސް ދަތެއްނެތް ސިންގާއެއް ގޮތުގައި ސިފަކުރެވިދާނެ ކަމަށެވެ. ސަބަބެއްގެ ގޮތުގައި ނާޒިމް ވިދާޅުވީ ގާނޫނު އަސާސީގައި މަޖިލީހުގެ ގޮނޑި ގެއްލޭ ހާލަތްތައް ބަޔާންކޮށްފައި އޮތްއިރު، އޭގެއިން ހާލަތަކަށް ބައްދަލު ނުވާގޮތަށް ކަމަށް އެގާނޫނު އޮތީ. ވިދާޅުވީ އެ ގާނޫނަށް ގާނޫނު އަސާސީގެ ހިޔާވަހިކަން ލިބިދީފައި ނެތް ކަމަށެވެ.
އާދެ އެމްޑީޕީގެ ފަރާތުން ވާހަކަދެއްކެވި ބޭފުޅުން މި އިސްލާހަށް މުޅިން އެއްބަސް ނުވާތަން އަޅުގަނޑުމެންނަށް ފެންނަމުންމިދަނީ. އާދެ އެއީ އެކަން ވާނެވެސް ގޮތް ސަބަބަކީ އެޕާޓީއަކީ އެޕާޓީގެ މަތީ ފަންތީގައި ތަޅާފޮޅުމާއި ބައިބައިވުން އުފެދި އަބަދުވެސް އެ އިތުބާރު އެމީހުންގެ ތެރޭގައިނޯންނަ ޕާޓީއެއް. އެޕާޓީގެ ވެރިކަމުގައިވެސް މަޖިލީހުގެ ރައީސާއި ގައުމުގެ ރައީސާއި ދޭތެރޭގައިވެސް ހިލާފުތައް އުފެދި ގޮސް ޕާޓީ ބައިބައި ވެގެންގޮސް ރިޔާސީ އިންތިހާބު ވެސް ގެއްލުނު މަންޒަރު އަޅުގަނޑުމެންނަށް އޮތީ ފެނިފައި: ނާޒިމް
ނާޒިމް ވިދާޅުވީ ޕާޓީއަށް އިތުބާރު ނޯންނަ ބަޔަކު މިފަދަ އިސްލާހުތަކާ ދެކޮޅު ހަދާނެ ކަމީ އެއީ ގަބޫކުރަންޖެހޭ ކަމެއް ކަމަށެވެ.
ނާޒިމް ވިދާޅުވީ މިގައުމު މިއަށްވުރެ ރަނގަޅު ހިސާބަކަށް ގެންދަން ބޭނުންނަމަ މަޖިލީހުގެ ތަޅުމުގައި ވެސް އިތުބާރާއި ޔަގީންކަން ގާއިމު ކުރަންޖެހޭ ކަމަށެވެ. ވިދާޅުވީ މަޖިލިސް ބޭފުޅުންނަކީ ގަނެވިއްކާ ބާޒާރެއްގެ ކަމަށް ވެގެން، ހާސިލުކުރަންބޭނުންވާ ތަރަށްގީއެއް ހާސިލު ނުކުރެވޭނެ ކަމަށެވެ.
ނާޒިމް ވިދާޅުވިގޮތުގައި އެންޓި ޑިފެކްޝަން ގާނޫނެއް ބޭނުންވަނީ މީގެކުރިން މަޖިލިސް ތެރެއިން އެއް ޕާޓީގައި ހުރެފައި އަނެއް ޕާޓީއަށް ވޯޓު ދިނުމާއި، ދައުރު ނިމެން ކައިރިވެފައި ވަނިކޮށް ޕާޓީ ބަދަލުކުރުން ފަދަ މައްސަލަތައް ހަލު ކުރުމަށް ކަމަށެވެ.
އަޅުގަނޑުމެން ބޭނުންވަނީ އެގޮތައް ކަންތައްތައް ހިނގާކަށް ނޫން. އަޅުގަނޑުމެން ބޭނުންވަނީ ކަޅާ ހުދުން މި މެންބަރުން ވަކިވާނެ ހާލަތްތައް ބަޔާންކުރެވިފައި އޮތުން.: ނާޒިމް
ރައްޔިތުންގެ މަޖިލީހުގެ މެންބަރުން އިންތިޚާބުވި ޕާޓީ ބަދަލުކޮށްފި ނަމަ، މެންބަރުކަމުގެ ގޮނޑި ގެއްލޭ ގޮތަށް ގާނޫނުއަސާސީ ގެންނަންޖެހޭ އިސްލާހް ގެނައުމަށް މަޖިލީހުގެ މިއަދުގެ ޖަލްސާއަށް ބިލެއް ވަނީ ހުށަހަޅާފައެވެ.
ސަރުކާރުގެ ފަރާތުން މިބިލް ހުށަހެޅުއްވީ ހުޅުދޫ ދާއިރާގެ މެމްބަރު މުޙައްމަދު ޝާހިދުއެވެ. މިއަދުގެ މަޖިޅިހުގެ ޖަލްސާއިން ވަނީ ގާނޫނުއަސާސީއަށް ހުށަހެޅި މި އިސްލާހުތައް ބަލައިގަނެ ދިރާސާކުރަން މުޅި މަޖިލީހުގެ ކޮމިޓީއަށް ފޮނުވައިފައެވެ. މި އިސްލާހު މަޖިލީހަށް ބަލައިގަންނަން ފެންނަ ކަމަށް 69 މެންބަރުން ވޯޓު ދެއްވިިއިރު ނުފެންނަ ކަމަށް 12 މެންބަރުން ވޯޓު ދެއްވި އެވެ. މި އިސްލާހު މަޖިލީހަށް ބަލައިގަތުމަށް ފާސްވުމުން ބިލް މުޅި މަޖިލީހުގެ ކޮމިޓީއަށް ފޮނުވަން ފެންނަ ކަމަށް 71 މެންބަރުން ވޯޓު ދެއްވިއިރު ދެކޮޅަށް 12 މެންބަރުން ވޯޓު ދެއްވި އެވެ.
