ދުވަހުގެ ބިޒީ ޝެޑިއުލާއެކު ވެސް ކަސްރަތު ކުރުމަށް ވަގުތު ހުސް ކުރުން މުހިންމު

އަދުގެ ބަވަނަވެފައިވާ ދުނިޔޭގައި ގިނަ މީހުންގެ ދުވަހުގެ ޝެޑިއުލް ވަރަށް ބިޒީއެވެ. އާއިލީ ޒިންމާތަކާއި އަދި އެހެނިހެން އިޖްތިމާއީ ހަރަކާތްތަކުގެ ތެރޭގައި އަމިއްލަ ސިއްހަތަށް އަޅާލުމަށް ވަގުތު ހޯދުމަކީ ގޮންޖެހުމަކަށް ވަނީ ވެފައެވެ. ބިޒީ ޝެޑިއުލާއިއެކުވެސް ދުޅަހެޔޮ ސިއްހަތެއްގައި ހުރުމަށް ކުރެވިދާނެ ކަންކަން ދެނެގަނެ އެފަދަ ކަންކަން ކުރުމަކީ ވަރަށް މުހިންމު ކަމެކެވެ.

އެހެނީ ސިއްހަތަކީ ދިރިއުޅުމުގެ އެންމެ އަސާސީ އެއް ބިންގަލެވެ. ރަނގަޅު ސިއްހަތެއްގައި ހުރުމަކީ ދިރިއުޅުމުގެ ކަންކަން ފަސޭހަކަމާއެކު ކުރިއަށް ގެންދިއުމަށް މުހިންމު ކަމެކެވެ. އެއީ ޖިސްމާނީ އަދި ނަފްސާނީ ދުޅަހެޔޮކަމަށްވެސް ވަރަށް މުހިންމު ކަމެކެވެ.

ސިއްހަތު ރަނގަޅު ކުރުމުގައި އެންމެ މުހިންމު އެއް ކަމަކީ ކަސްރަތެވެ. އެހެންނަމަވެސް، މިޒަމާނުގެ ދިރިއުޅުމުގެ ބިޒީކަމާއި، މަސައްކަތުގެ ބުރަކަމުގެ ސަބަބުން ގިނަ ބަޔަކަށް ކަސްރަތަށް ވަގުތު ދިނުމަކީ ދަތި ކަމަކަށް ވެފައިވެއެވެ. މިއީ އެތައް ބަޔަކު ކުރާ ޝަކުވާއެކެވެ.

ގިނަ މީހުންނަށް ކޮންމެ ދުވަހަކު ޖިމްއަށް ދާން ނުވަތަ ވަކި ގަޑިއެއް ހުސްކޮށްގެން ކަސްރަތު ކުރަން ވަގުތު ނުލިބުމަކީ ހަގީގަތެކެވެ. ވަޒީފާގެ ދަތިކަމާއި، އާއިލީ މަސްއޫލިއްޔަތުތަކުގެ ސަބަބުން މިފަދަ ކަންކަމަށް ވަކި ވަގުތެއް ހުސްކުރުމަކީ ބައެއް ފަހަރު ނުވާނެ ކަމެކެވެ. ނަމަވެސް، މިފަދަ ހާލަތްތަކުގައިވެސް ކުދިކުދި ކަންކަމުގެ ތެރެއިން ދުވަހުގެ ކަސްރަތުގެ ބޭނުން ހާސިލު ކުރެވިދާނެއެވެ.

އެގޮތުން ދުވަހުގެ ތެރޭގައި ކުދިކުދި ވޯކްއައުޓްތައް ހިމެނުމަކީ ވެސް ކުރެވިދާނެ ކަމެކެވެ. މިސާލަކަށް ހެނދުނު އޮފީހަށް ދިއުމުގެ ކުރިން ގޭތެރޭގައި ކުޑަކޮށް ހަލުވިކޮސް ދާއިރު 10 މިނެޓް ހިނގާލުމާއި، މެންދުރުގެ ވަގުތު ކުޑަ ބްރޭކަށް ނެގުމަށްފަހު ކެއުމުގެ ހުސްވަގުތުގައި 5 މިނެޓެއް ހާއިރު ސްޓްރެޗްކޮށްލުމުންވެސް ހަށިގަނޑަށް އެތަކެއް ފައިދާތަކެއްވެއެވެ.

އާންމުކޮށް ލިފްޓު ނުވަތަ އެސްކެލޭޓަރުގެ ބަދަލުގައި ސިޑި ބޭނުންކުރުން، ކުރު ދަތުރުތަކަށް ހިނގާފައި ދިއުން، ނުވަތަ ޕާކިންގް ލޮޓުގެ ދުރުން ޕާކްކޮށްލާފައި އޮފީހަށް ނުވަތަ އެހެން ތަނަކަށް ހިނގާފައި ދިއުން ފަދަ ކަންކަމަކީ ހަށިގަނޑު ހަރަކާތްތެރި ކުރުމަށް އެޅޭނެ ކުދި ފިޔަވަޅުތަކެކެވެ. މީގެ އިތުރުން މަސައްކަތުގެ މެދުގައި ކުރު މެދުކެނޑުންތަކެއް ނަގައިގެން ސްޓްރެޗް ކޮށްލުން ނުވަތަ ކޮފީ ބްރޭކަށް ދާން އިންތިޒާރުކުރުމުގެ ބަދަލުގައި ހިނގާލަން ނުކުތުމަކީވެސް ފައިދާހުރި ކަމެކެވެ.

ކަސްރަތަށް ވަގުތު ނުލިބޭ މީހުންނަށް ގޭތެރޭގެ މަސައްކަތްތަކަކީ ރަނގަޅު ކަސްރަތަކަށް ހެދިދާނެ ކަމެކެވެ. ގޭތެރެއަށް ފޮޅާ ސާފުކުރުމާއި، މޮޕް ޖެހުމާއި، ފެންލުމާއި، ގަސްތަކަށް ފެންދިނުން ފަދަ ކަންކަމަކީ ހަށިގަނޑުގެ ގިނަ މައްސަލްތަކަށް ހަރަކާތް ލިބި، ކެލޮރީ ބަރން ވާނެ ކަންކަމެވެ. ތަކެތި އުފުލުމާއި، ބޯޅަ ޖަހާ ސާފުކުރުން ފަދަ ކަންކަމަކީވެސް މަސައްކަތުގެ ތެރެއިން ހަށިގަނޑަށް ބޭނުންވާ ސްޓްރެންތް ޓްރެއިނިންގް ލިބިދާނެ ކަންކަމެވެ.

މި މަސައްކަތްތައް ހަށިގަނޑަށް އެކަށީގެންވާ ގޮތަކަށް، އަވަސް ޕޭސްއެއްގައި ކުރުމުން، ކަސްރަތުގެ ބޭނުން ހާސިލުވާނެއެވެ. މިސާލަކަށް، ފޮޅާލާ ނުވަތަ މޮޕްޖަހާ އިރު ރަނގަޅަށް ގުދުވެ، ހަށިގަނޑުގެ މަސްގަނޑުތަކަށް ބާރު ލިބޭނެ ގޮތަކަށް ކުރުމަކީ ފައިދާ ހުރި ކަމެކެވެ.

ކުދިންނާއެކު ހޭދަކުރާ ވަގުތަކީވެސް ފައިދާ ހުރި ކަސްރަތުތަކެއް ކުރެވިދާނެ ވަގުތެކެވެ. ޕާކަކަށް ނުވަތަ ކުޅޭ ބިމަކަށް ގޮސް ކުދިންނާއެކު ބޯޅަ ކުޅުން، ދުވުން، ނުވަތަ އެކުގައި ބައިސްކަލު ދުއްވުން ފަދަ ކަންކަމަކީ ބޮޑެތި މީހުންނާއި ކުދިންނަށްވެސް ހަށިގަނޑު ހަރަކާތްތެރި ކުރުމަށް އެކަށީގެންވާ ގޮތްތަކެކެވެ. މިގޮތުން ހޭދަކުރެވޭ ވަގުތަކީ ހަމައެކަނި ކަސްރަތު ލިބޭ ވަގުތެއް ކަމުގައި ނުވެ، އާއިލީ ގުޅުން ބަދަހިވެ، ކުދިންނަށް ހެޔޮ އާދަތައް ދަސްކޮށްދިނުމުގެ ރަނގަޅު ފުރުސަތެއް ވެސް މެއެވެ.

ގޭތެރޭގައި ކުދިންނާއެކު މިއުޒިކަށް ނަށާލުން ނުވަތަ އެއްޗެހި ރޭނުމުގެ ކުޅިވަރުތަކުގައި ހަރަކާތްތެރިވުމަކީވެސް ހަށިގަނޑަށް ހަރަކާތް ލިބި، ކެލޮރީ ބަރން ވާނެ ކަންކަމެވެ.

ކަސްރަތު ކުރުމަކީ ދިރިއުޅުމުގެ ކޮންމެ މަރުހަލާއެއްގައިވެސް ކޮންމެހެން މުހިންމު ކަމެކެވެ. ބިޒީކަމަކީ ކަސްރަތު ނުކުރުމުގެ ބަހަނާއަކަށް ހެދުމުގެ ބަދަލުގައި، ދުވަހުގެ މަސައްކަތްތަކުގެ ތެރެއިން ވެސް ކަސްރަތު ކުރުމަށް ކުދިކުދި ގޮތްތައް ހޯދިދާނެއެވެ.

ގިނަ ބަޔަަކަށް ބިޒީ ޝެޑިއުލްއަކަށް ފިޓްނެސް ރޫޓީނެއް ވެއްދުމަކީ ގޮންޖެހުމެކެވެ. ގަވާއިދުން ކަސްރަތުކޮށް ހަރަކާތްތެރިވެ އުޅުމުގެ ނިޔަތުގައި އެ މަސައްކަތް ފެށި ނަމަވެސް ކޮންމެވެސް ސަބަބަކާ ހެދި އެކަމަށް ފަރުވާކުޑަ ކުރެވޭ ގޮތް މެދުވެރިވެއެވެ. ނަމަވެސް މިފަދަ ދަނޑިވަޅުތަކުގައި ކަސްރަތުގެ ސަބަބުން ލިބޭ ފައިދާތައް ވިސްނާލުން މުހިންމެވެ. ހާއްސަކޮށް ޑިޕްރެސް ވުމާއި ކަންކަމާއި ހާސްވެ ނުތަނަވަސްވާނަމަ ކަސްރަތު ކުރުމަކީ މީހާގެ ސިކުނޑި ތާޒާވެގެން ދާ ކަމެއްކަމަށް ސައިންޓިފިކް ގޮތުން ވަނީ ސާބިތުވެސް ކުރެވިފައެވެ.

މިގޮތުން، ކަސްރަތުކުރުމުގެ ސަބަބުން ހަށިގަނޑަށް ދުޅަހެޔޮކަން ލިބި، ހިތްހަމަޖެހުމާއި، މޮޅީ ޖެހުމުން ދުރުވެވޭނެއެވެ. ސިއްހަތު ރަނގަޅުކަމަކީ ހުރިހާ ކަމެއްގައި ވެސް ކާމިޔާބު ހޯދުމަށް މުހިންމު ބިންގަލެކެވެ. އެހެންކަމުން، ދުޅަހެޔޮ ދިރިއުޅުމެއް އުޅުމަށް އަޒުމު ކަނޑައަޅައި، ހަރަކާތްތެރި ދިރިއުޅުމެއް ބިނާކުރުމަށް ސަމާލުކަން ދެއްވަމާތޯއެވެ.