ރަށުމާރުކޭޓުގައި ގަވައިދާ ހިލާފަށް އުޅެމުންދިޔަ 20 ބިދޭސީން ހައްޔަރުކޮށްފި

ހުޅުމާލޭ ރަށުމާރުކޭޓުގައި ގަވާއިދާ ހިލާފަށް އުޅެމުންދިޔަ 20 ބިދޭސީއަކު އިމިގްރޭޝަނުން އިއްޔެ ހައްޔަރުކޮށްފިއެވެ.

މިއީ ރާއްޖޭގައި ގަވާއިދާ ހިލާފަށް އުޅޭ ބިދޭސީން ދެނެގަތުމަށް އިމިގްރޭޝަނުން ކުރިއަށްގެންދާ ހާއްސަ އޮޕަރޭޝަންގެ ތެރެއިން ހިންގި ހަރަކާތެކެވެ.

ހުޅުމާލޭގައި ހުންނަ ރަށުމާރުކޭޓް ބަލައި ފާސްކޮށް، އެތަނުގައި މަސައްކަތް ކުރަމުންދިޔަ 55 ބިދޭސީއަކު އިއްޔެ ވަނީ ޗެކްކޮށްފައެވެ.

މީގެ ތެރެއިން އިމިގްރޭޝަންގެ ބެލުމުގެ ދަށަށް ގެންގޮސްފައިވަނީ ލިޔެކިޔުން ފުރިހަމަނޫން އަދި ގަވާއިދާ ހިލާފަށް މަސައްކަތް ކުރަމުންދިޔަ 20 މީހެކެވެ.

ބިދޭސީންގެ މައްސަލައަށް ދާއިމީ ހައްލެއް ހޯދުމަށްޓަކައި، ހޯމް މިނިސްޓްރީން ވަނީ އޮޕަރޭޝަން ކުރަނގީގެ ނަމުގައި މުޅި ރާއްޖެއަށް އަމާޒުކޮށްގެން ފުޅާދާއިރާއެއްގައި އޮޕަރޭޝަނެއް 2024 މެއި މަހު ފަށާފައެވެ.

މި މަޝްރޫއުގެ ދަށުން ބިދޭސީންގެ ބަޔޯމެޓްރިކްސް މައުލޫމާތު އެއްކޮށް، ގަވާއިދުގެ ތެރެއަށް ވަނުމަށް ބޭނުންވާ ފަރާތްތަކަށް އެ ފުރުސަތު ވަނީ ހުޅުވާލާފައެވެ.

ނަމަވެސް، މި ފުރުސަތުގެ ބޭނުން ނުހިފާ، ގަވާއިދާ ހިލާފަށް އުޅެމުންދާ ފަރާތްތަކާއި އަމިއްލައަށް ވިޔަފާރި ހިންގާ ބިދޭސީންނާ މެދު ސަރުކާރުން މިހާރު ދަނީ ހަރުކަށި ފިޔަވަޅުތައް އަޅަމުންނެވެ.