ރަސްމާލެއިން 500 ހެކްޓަރުގެ ބިން އީގަލްސް ހިލްސްއަށް ދިނުމާ ދެކޮޅަށް މުޅި ޤައުމު އެކީ ތެދުވަންޖެހޭ!

ސަރުކާރުން ތަރައްޤީކުރަމުން އަންނަ ރަސްމާލެ މަޝްރޫޢުގެ ތެރެއިން 500 ހެކްޓަރުގެ ބޮޑު ބިމެއް ޔޫއޭއީގެ އީގަލްސް ހިލްސް ކުންފުންޏަށް ދިނުމަށް ނިންމާފައިވާ ނިންމުމަކީ ޤައުމީ ސަލާމަތަށާއި މިނިވަންކަމަށް އޮތް ބޮޑު ނުރައްކަލެއް ކަމަށް ބުނެ، މިކަމާ ދެކޮޅަށް މުޅި ޤައުމު އެކަތިގަނޑަކަށް ވެ ތެދުވަންޖެހޭ ކަމުގެ އަޑުތައް ގަދަވެއްޖެއެވެ.

މި މައްސަލައިގައި އާންމުންނާއި ސިޔާސީ ފަރާތްތަކުގެ އެންމެ ބޮޑު ކަންބޮޑުވުމަކީ، ދިވެހިރާއްޖޭގެ މިހާ ބޮޑު ސަރަޙައްދެއް ބޭރުގެ ކުންފުންޏަކަށް ދޫކޮށްލުމަށް ވެފައިވާ އެއްބަސްވުން (އެގްރީމެންޓް) ގެ އެއްވެސް ތަފްޞީލެއް ރައްޔިތުންނަށް ހާމަކޮށްފައި ނުވުމެވެ.

ރަސްމާލެއަށް 20 ބިލިއަން ޑޮލަރުގެ އިންވެސްޓުމެންޓު ގެނައުމަށް ޔޫއޭއީގެ އީގަލް ހިލްސް އާއެކު ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީ އިން ސޮއިކުރިން - ފޮޓޯ/ކޮންސްޓްރަކްޝަން މިނިސްޓްރީ

ސަރުކާރުން މި އެއްބަސްވުން ސިއްރުކޮށްފައި އޮތުމަކީ، ކޮރަޕްޝަނާއި ނޭދެވޭ އެތައް ކަމަކަށް ޝައްކު އުފެދޭ ކަމެއް ކަމަށް ގިނަ ބަޔަކު ދަނީ ފާހަގަކުރަމުންނެވެ. ދެފުށް ފެންނަ ގޮތެއްގައި މިފަދަ ބިޔަ މަޝްރޫޢުތަކުގެ އެއްބަސްވުންތައް ހާމަކުރުމަކީ ޑިމޮކްރެޓިކް ހަމަތަކުގެ މަތިން ލާޒިމު ކަމެކެވެ.

މީގެއިތުރުން، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީ ބަޔާންކުރާ ގޮތުގައި، ދިވެހިރާއްޖޭގެ ސަރަޙައްދުން ބައެއް ބޭރުގެ އެއްވެސް ފަރާތަކަށް ދިގު މުއްދަތަކަށް ނުވަތަ މިލްކުވާ ގޮތަށް ދެވޭނީ ރައްޔިތުންގެ މަޖިލީހުގެ ރުހުން ލިބިގެން، ވަކި ޚާއްޞަ އުޞޫލުތަކެއްގެ ދަށުންނެވެ.

އެހެންކަމުން، މި ނިންމުމަކީ ޤާނޫނުއަސާސީގެ ރޫޙާ ޚިލާފަށް، ޤާނޫނީ އިމުން ބޭރުން ނިންމާފައިވާ ނިންމުމެއް ކަމަށް ޤާނޫނީ މާހިރުން ވެސް ދަނީ ބުނަމުންނެވެ.

ހަމައެއާއެކު، ޤައުމީ ސަލާމަތާއި ރައްކާތެރިކަމަށް ބަލާއިރު، ޤައުމުގެ ވެރިރަށާ އިންވެގެން އޮތް މުހިންމު ސަރަޙައްދަކުން ބޭރުގެ ކުންފުންޏަކަށް ބޮޑު ބިމެއް ދިނުމަކީ ޤައުމުގެ އިސްތިޤްލާލާއި ސިޔާދަތަށް ނުރައްކާވެދާނެ ކަމެކެވެ. މިއީ ދިގު މުއްދަތުގައި ރާއްޖޭގެ ސަލާމަތީ މަސްލަހަތުތައް ބޭރު ބައެއްގެ އަތްމައްޗަށް ދޫވެގެން ހިނގައިދާނެ ސަބަބެކެވެ.

މި މައްސަލައިގެ އަނެއް މުހިންމު ކަންބޮޑުވުމަކީ، ރާއްޖޭގެ މައި މަރުކަޒުގައި ބޭރުގެ ބޮޑު ކުންފުންޏަކަށް މިފަދަ ބާރުތަކެއް ދިނުމުން، އެ ސަރަޙައްދުގައި ހިންގާނެ ވިޔަފާރިތަކާއި ހަރަކާތްތަކުގެ ސަބަބުން ދިވެހިންގެ މާތްވެގެންވާ އިސްލާމްދީނާއި، ދިވެހިވަންތަ ރީތި އާދަކާދަތަކާއި ޘަޤާފަތަށް ނޭދެވޭ އަސަރު ފޯރައިފާނެތީއެވެ. ދިވެހި މުޖުތަމަޢުގެ އިސްލާމީ ވަޙްދަތާއި ޤައުމީ އަގުތައް ޙިމާޔަތްކުރުމަކީ ކޮންމެ ދިވެއްސެއްގެ ވެސް ފަރުދީ ވާޖިބެކެވެ.

އެހެންކަމުން، މިއީ ހަމައެކަނި ބިމުގެ މުޢާމަލާތެއް ނޫން ކަމަށާއި، މިއީ ޤައުމުގެ މުސްތަޤްބަލާއި، ދީނާއި، ސަލާމަތާ ގުޅިފައިވާ މައްސަލައަކަށް ވާތީ، ރަސްމާލެއިން 500 ހެކްޓަރުގެ ބިން އީގަލްސް ހިލްސްއަށް ދިނުމުގެ އެއްބަސްވުން ވަގުތުން ހުއްޓުވައި، ދިވެހި ފަސްގަނޑު ދިވެހިންގެ އަތްމަތީގައި ބޭއްވުމަށްޓަކައި މުޅި ޤައުމު އެކަތިގަނޑަކަށް ވެ އަޑުއުފުލަން ޖެހިފައިވާ ކަމަށް ގިނަ ފަރާތްތަކުން ގޮވާލަމުންދެއެވެ.