މަސްތުވާތަކެތި ބޭނުންކުރާ މީހުންގެ ތެރެއިން "އެޑިކްޓުން" ގެ ގޮތުގައި ފުލުހުންނަށް ފާހަގަވާ މީހުން، ފަރުވާއަށް ފޮނުވުމުގެ ޚާއްސަ އޮޕަރޭޝަންގެ ތެރެއިން މިހާތަނަށް 47 މީހުން ފަރުވާގެ ނިޒާމަށް ވެއްދިފައިވާ ކަމަށް އެންޑީއޭގެ ޗެއަރ ޕަރސަން ލުބްނާ މުޙައްމަދު ޒާހިރު ވިދާޅުވެއްޖެއެވެ.
ފުލުހުންނާއި ނެޝެނަލް ޑްރަގް އެޖެންސީން ގުޅިގެން މިފަދަ އޮޕަރޭޝަނެއް ފަށާފައިވާކަން އިއުލާންކުރީ މިދިޔަ މަހުގެ 20 ވަނަ ދުވަހު އެންޑީއޭއާއި ފުލުހުން ގުޅިގެން ބޭއްވި ނޫސްވެރިންގެ ބައްދަލުވުމެއްގައެވެ. ޑްރަގް އެންފޯސްމަންޓް ޑިޕާޓްމަންޓާއި ނެޝަނަލް ޑްރަގް އެޖެންސީން މި އޮޕަރޭޝަން ރަސްމީކޮށް ފެށީ މިދިޔަ މަހުގެ 22 ވަނަ ދުވަހުއެވެ.
މި އޮޕަރޭޝަނާ ގުޅޭގޮތުން ވާހަކަ ދައްކަވަމުން އެންޑީއޭގެ ޗެއަރޕާސަން ވިދާޅުވީ މި އޮޕަރޭޝަން ކުރިއަށް ގެންދިޔުމަށް ނިންމާފައިވަނީ މުއްދަތެއް ނެތްގޮތަށް ކަމަށެވެ.
މި އޮޕަރޭޝަންގެ ދަށުން، މަގުމަތީ ސަލާންޖަހަން އުޅޭ މަސްތުވާތަކެތި ބޭނުންކުރާ މީހުންނާއި، ވައްކަމާއި ފޭރުމުގައި ހަރަކާތްތެރިވާ މަސްތުވާތަކެތި ބޭނުންކުރާ މީހުންނާއި، މަގުމަތީ މަސްތުގެ ހާލަތުގައި އުޅޭ މީހުންގެ އިތުރުން މިސްކިތްތަކުގަ ނިދާ މީހުންނާއި މަސްތުވާތަކެތި ބޭނުންކުރާ މީހުން ބަންދުކޮށް އެ މީހުންނަށް ބޭނުންވާ ފަރުވާދިނުން.
ފަރުވާ ފޯރުކޮށްދިނުމަކީ މަސްތުވާތަކެތި ފަރުވާ ދިނުމުގަ ވަރަށް މުހިންމު އަސާސީ ކަމެއްކަން ފާހަގަކުރައްވާ ލުބްނާ ވިދާޅުވީ އެންޑީއޭގެ ޓްރީޓްމެންޓް ހަރުދަނާކުރާއިރު ރިލެޕްސް ޕްރިވެންޝަން އަދި ރީއިންޓެގްރޭޝަން، އާފްޓަރކެއަރގެ އިތުރުން ޑްރަގް ޕްރިވެންޝަން މަސައްކަތްތައް ކުރުމަށް ޚާއްސަ ސަމާލުކަމެއް ދެއްވައިގެން ކުރައްވާނެ ކަމަށެވެ.
ރާއްޖޭގައި މަސްތުވާތަކެތީގެ ފަރުވާ މީހުންނަށް ދެމުން އައީ، މަސްތުވާތަކެއްޗާ ގުޅުން ހުރި ކުށެއް ކޮށް ކޯޓު މަރުހަލާގެ ތެރެއިން އެމީހަކު ފަރުވާއަށް އެދިއްޖެ ނަމައެވެ. މި ސަރުކާރުން އޭގެ ބޭރުން ވެސް އެމީހަކު އަމިއްލައަށް އެންޑީއޭއިން ފަރުވާއަށް އެދުމުގެ ފުރުސަތު ހުޅުވާލާފައިވާއިރު، މަގުތަކުގައި މަސްތުވާތަކެތި ބޭނުންކޮށް ގިނަވެފައިވާ މީހުންގެ މައްސަލަ އިންތިހާއަށް ބޮޑެވެ.
މިކަން ހައްލުކުރުމަށް ފަށާފައިވާ އޮޕަރޭޝަންގެ ދަށުން މަސްތުވާތަކެތި ބޭނުންކުރާ މީހުންގެ ތެރެއިން މަގުމަތީގައި ސަލާންޖަހަން އުޅޭ މީހުންނާއި ވައްކަމާއި ފޭރުން ފަދަ ކުށްތަކަށް އަރައިގަންނަ މީހުން އަދި މަގުމަތީގައި މަސްތުގެ ހާލުގައި ތިބޭ މީހުންގެ އިތުރުން މިސްކިތްތަކުގައި ނިދައިހަދާ މަސްތުވާތަކެތި ބޭނުންކުރާ މީހުން ފާހަގަކޮށް އެމީހުން ރިމާންޑު ސެންޓަރުގައި ބަންދުކުރެވޭނެ އެވެ.
މިފަދަ ރިމާންޑް ސެންޓަރުތައް މިވަގުތު ގާއިމްކޮށްފައި ވަނީ ހުޅުމާލެ އާއި ކ. ހިންމަފުށީގައި އެކަންޏެވެ. މިހާރު ފަށައިގެން އުޅޭ އޮޕަރޭޝަންގައި ހައްޔަރުކުރާ މީހުން ބަންދުކުރަނީ އެ ސެންޓަރުތަކުގައެވެ.
މިވަގުތު ރިމާންޑް ސެންޓަރުތަކުގެ މަސައްކަތް ކުޑަކޮށް ފެށިފައި އޮތް ނަމަވެސް، ކުރިއަށް އޮތް ތަނުގައި ފުޅާ ކުރާނެ ކަމަށް އެންޑީއޭއިން ބުނެފައިވެ އެވެ.
