ޕީޕީއެމް އުވާލަން ސެނެޓުން ފާސްކޮށްފި

ޕްރޮގްރެސިވް ޕާޓީ އޮފް މޯލްޑިވްސް - ޕީޕީއެމް އުވައިލަން އެ ޕާޓީގެ ސެނެޓުން ދާދީ ދެންމެއަކު ފާސްކޮށްފިއެވެ.

މިހާރު ކުރިއަށް ގެންދާ ޕީޕީއެމް ސެނެޓް ބައްދަލުވުމުގައި އެ ޕާޓީ އުވާލަން ހުށަހެޅުމުން، އެގޮތަށް ފާސްވީ، ފެންނަ ނުފެންނަ ވޯޓުގައި ބައިވެރިވި 42 މެމްބަރުންގެ އިއްތިފާގުންނެވެ.

ބައްދަލުވުމުގެ ރިޔާސަތު ބަލަހައްޓަވަނީ އެ ޕާޓީގެ ދެ ނައިބު ރައީސުން ކަމަށްވާ އަހުމަދު ޝިޔާމާއި މުހައްމަދު ޣައްސާން މައުމޫނެވެ.

ސަރުކާރު ހިންގާ ކޯލިޝަންގައި ހިމެނޭ، ޕީޕީއެމް އުވައިލާ، ޕީއެންސީއާއެކު ކުރިއަށް ދިއުމުގެ މަސައްކަތް ކުރާތާ ދުވަސްތަކެއް ވަނީ ވެފައެވެ. އެ ޕާޓީގައި ތިބި އާންމު މެންބަރުން ޕީއެންސީއަށް ބަދަލުކުރުމުގެ މަސައްކަތް ވެސް ކުރިއަށް ގެންދިޔައެވެ.

ޕީއެންސީ/ޕީޕީއެމަކީ ދެ ޕާޓީއެއް ނަމަވެސް ޖޮއިންޓް ކައުންސިލެއް އޮވެގެން އެއް ޕާޓީއެއްގެ ގޮތުގައި ހަރަކާތްތެރިވަމުން އަންނަ ކޯލިޝަނެކެވެ.

ސަރުކާރު ހިންގާ ޕީއެންސީއަށް 90،000 އެއްހާ މެންބަރުން މިހާރު ހަމަވެފައިވާ ކަމަށް ވަނީ ބުނެފައެވެ.

ޕީޕީއެމް އުވާލާން ނިންމިއިރު އެ ޕާޓީގައި 2013-2018 އާ ހަމައަށް ވެސް ވެރިކަން ކުރި ޕާޓީއެވެ.

ޕީޕީއެމް އުފެއްދީ ކުރީގެ ރައީސް މައުމޫން އަބްދުއްގައްޔޫމްގެ ޑީއާރްޕީ ދެބައިވެ އުފެދުނު "ޒެޑް ޑީއާރްޕީ" ފެކްޝަނުގެ ތެރެއިންނެވެ.

1. ޕީޕީއެމް ރަޖިސްޓްރީކުރީ 27 އޮކްޓޯބަރު 2011 ގައި.
2. ޕީޕީއެމްގެ ރައީސްގެ ގޮތުގައި ޕާޓީ ފުރަތަމަ ލީޑުކުރެއްވީ މައުމޫން.
3. ފުރަތަމަ ރިޔާސީ ކެންޑިޑޭޓަކީ މައުމޫންގެ ކޮއްކޮ، ކުރީގެ ރައީސް އަބްދުﷲ ޔާމީން.
4. ޕީޕީއެމް ބައިވެރިވި ފުރަތަމަ ރިޔާސީ އިންތިހާބާއި މަޖިލިސް އިންތިހާބު ކާމިޔާބުކުރި.

މިދިޔަ ރިޔާސީ އިންތިހާބުގައި ޕީޕީއެމް/ޕީއެންސީގެ ރިޔާސީ ޓިކެޓު ފުރަތަމަ ހަވާލުކުރީ ކުރީގެ ރައީސް އަބްދުﷲ ޔާމީނަށެވެ. ނަމަވެސް ރައީސް ޔާމީން އޭރު 11 އަހަރުގެ ޖަލު ހުކުމެއް ތަންފީޒުކުރައްވަމުން ގެންދަވާތީ އެމަނިކުފާނަށް އިންތިހާބުގައި ވާދަނުކުރެވޭނެ ކަމަށް ކަނޑައެޅިއެވެ.

ރައީސް ޔާމީނަށް އިންތިހާބުގައި ވާދަނުކުރެވޭނެ ހާލަތަކަށް، އެމަނިކުފާނުގެ ބެކްއަޕް ޕާޓީއެއްގެ ގޮތުގައި އުފެއްދި ޕީއެންސީން ކެންޑިޑޭޓަކު ނެރުމަށް ނިންމިއެވެ. އަދި ޕީއެންސީގެ ކެންޑިޑޭޓަކަށް އިންތިހާބުވި، ރައީސް މުއިއްޒަށް ތާއީދުކުރުމަށް ޕީޕީއެމްގެ ސެނެޓުން ނިންމީ އިންތިހާބު ބޮއިކޮޓް ކުރުމާ މެދު ގޮތެއް ނިންމަން ރައީސް ޔާމީން ހުށަހަޅާފައި ވަނިކޮށެވެ.