ވެކްސިނަކީ ދުޅަހެޔޮ މުޖުތަމަޢެއް ބިނާކުރުމަށް އެޅޭ އެންމެ މުހިންމު އެއް ފިޔަވަޅު: އެޗްޕީއޭ

ނުރައްކާތެރި ބަލިތަކުން ރައްކާތެރިވެ، މުޖުތަމަޢުގެ ދުޅަހެޔޮކަން ދެމެހެއްޓުމަށްޓަކައި އާންމު ޞިއްޙަތުގެ ދާއިރާއިން އެޅޭ އެންމެ ނަތީޖާ ރަނގަޅު އެއް ފިޔަވަޅަކީ ވެކްސިން ޖެހުން ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ހާމަކުރައްވައިފިއެވެ.

އެޗްޕީއޭ އެކްސްގައި ހިއްސާކުރި ޕޯސްޓެއްގައި ބުނީ ވެކްސިނަކީ އިންސާނުންގެ ދިރިއުޅުމަށް ދިމާވާ ބޮޑެތި ބަލިތަކުން ސަލާމަތްވެ، މުޅި މުޖުތަމަޢަށް އޭގެ ފައިދާ ލިބިގެންދާނެ ކަމެއް ކަމަށެވެ.

އެޗްޕީއޭ އިން ބުނިގޮތުގައި، ބޭނުންކުރެވޭ ކޮންމެ ވެކްސިނަކީވެސް ބައިނަލްއަޤުވާމީ ރައްކާތެރިކަމާއި ފެންވަރުގެ މިންގަނޑުތަކަށް ފެތޭތޯ ފަރުވާތެރިކަމާއެކު ތަޙުލީލުކުރެވިފައިވާ ވަސީލަތެކެވެ. މިއީ ދުނިޔޭގެ ޞިއްޙަތު ޖަމިއްޔާ (ޑަބްލިޔުއެޗްއޯ) ފަދަ ބައިނަލްއަޤުވާމީ ޖަމާޢަތްތަކުން ކަނޑައަޅާފައިވާ ވަރުގަދަ މިންގަނޑުތަކަށް ފެތޭތޯ ބެލިގެން، ރައްކާތެރިކަން ކަށަވަރުކުރުމަށްފަހު ބޭނުންކުރާ އެއްޗެކެވެ. ވެކްސިނަކީ ޚާއްޞަކޮށް ކުޑަކުދިން ނުރައްކާތެރި ބަލިތަކުން ސަލާމަތްކޮށްދީ، ބަލިމަޑުކަމެއް ފެތުރުމުގެ ފުރުޞަތު ކުޑަކޮށްދިނުމަށް އެހީތެރިވެދޭ ކަމެކެވެ. އެގޮތުން ސިފަދޫލި، ކަށިވިދުރި، ބީސީޖީ ފަދަ ވެކްސިންތަކަކީ މިފަދަ ބަލިތަކުން ރައްކާތެރިވުމަށްޓަކައި އަބަދުވެސް ދެމުން އަންނަ ވެކްސިންތަކެކެވެ.

ވެކްސިން ޖެހުމުގެ މުހިންމުކަން ފާހަގަކުރައްވަމުން އެޗްޕީއޭ އިން ބުނީ، ވެކްސިން ޖަހާ މީހުންގެ އަދަދު އިތުރުވަމުންދާ ވަރަކަށް، ބަލިތަކުގެ ނުރައްކާ އެންމެ ބޮޑު ފަރާތްތައް ހިމެނޭހެން، މުޅި މުޖުތަމަޢަށް ލިބޭ ރައްކާތެރިކަން ވަރުގަދަވެގެންދާނެ ކަމަށެވެ. މީގެ ސަބަބުން "ހާޑް އިމިއުނިޓީ" ނުވަތަ "މުޖުތަމަޢީ ރައްކާތެރިކަން" އުފެދި، ވެކްސިން ޖެހުމަށް ދަތިކަން ހުންނަ ނުވަތަ ވެކްސިން ޖެހުމަށް ވަކި ސަބަބަކާ ހުރެ ނުކުޅެދޭ ފަރާތްތަކަށްވެސް ރައްކާތެރިކަން ލިބިގެންދެއެވެ. މިއީ ދުޅަހެޔޮ އާބާދީއެއް ބިނާކުރުމަށްޓަކައި ނުހަނު މުހިންމު ކަމެކެވެ.

މިކަމާ ގުޅޭގޮތުން އެޗްޕީއޭ އިން ވަނީ ރައްޔިތުންނަށް އިލްތިމާސްކުރައްވާފައެވެ. އެއީ، ދަރިފުޅާއި މުޖުތަމަޢުގެ ސަލާމަތަށްޓަކައި، ކަނޑައެޅިފައިވާ ވަގުތުގައި ވެކްސިން ފުރިހަމަކުރުމަށްޓަކައެވެ. ސަރުކާރުން އަބަދުވެސް މަސައްކަތްކުރަމުން ގެންދަވަނީ ރާއްޖޭގެ ރައްޔިތުންނަށް ދުޅަހެޔޮ ޞިއްޙީ ޚިދުމަތްތައް ފޯރުކޮށްދިނުމަށެވެ. ވެކްސިން ޕްރޮގްރާމަކީ މިކަމަށްޓަކައި އަޅުއްވާ އެންމެ މުހިންމު އެއް ފިޔަވަޅެވެ.

ވެކްސިނާ ގުޅޭ ޞައްޙަ މަޢުލޫމާތު ހޯއްދެވުމަށް، އިތުބާރު ހުރި ރަސްމީ މަޞްދަރުތަކުގެ ބޭނުން ހިފުމަށް އެޗްޕީއޭ އިން ވަނީ ހުރިހާ ފަރާތްތަކަށްވެސް ގޮވާލައްވާފައެވެ. ޚާއްޞަކޮށް، ޑަބްލިޔުއެޗްއޯ، ހެލްތު މިނިސްޓްރީ، އަދި އެޗްޕީއޭ އިން ދޫކުރާ މަޢުލޫމާތުތަކަށް އިސްކަންދިނުމަކީ ނުރައްކާތެރި ހީތަކާއި އޮޅުންތަކުން ދުރުވުމަށް އެޅޭނެ މުހިންމު ފިޔަވަޅެކެވެ. މުޖުތަމަޢުގެ ހުރިހާ ފަރުދުންގެ ބައިވެރިވުމާއި އެއްބާރުލުން ނެތި، މިފަދަ ޞިއްޙީ މަސައްކަތްތައް ކާމިޔާބު ނުވާނެ ކަމަށްވެސް އެޗްޕީއޭ އިން ފާހަގަކުރައްވައެވެ.