ސްރީލަންކާގައި އިއްޔެ ބޭއްވި އާންމު އިންތިޚާބު، މިހާރުގެ ރައީސް އަނުރަ ކުމާރަ ޑިސަނަޔަކަގެ ނޭޝަނަލް ޕީޕަލްސް ޕަވަރ ކޯލިޝަން ތަފާތުބޮޑު ނަތީޖާއަކުން ކާމިޔާބު ކޮށްފިއެވެ.
އިންތިޚާބުގެ ހުރިހާ ވޯޓު ފޮށްޓެއް ގުނައި ނިމުނުއިރު، ލިބުނު ޖުމްލަ ވޯޓާއި އަދި ކާމިޔާބުކުރި ގޮނޑީގެ އަދަދަށް ބަލާއިރު، ވެރިކަންކުރާ ކޯލިޝަން އުޅެނީ 62 އިންސައްތަ ކުރީގައެވެ. މިއީ، އެހެން ހުރިހާ ޕާޓީއަކަށްވުރެ މާ ބޮޑަށްވެސް ތަފާތުބޮޑު ނަތީޖާއެކެވެ.
225 ގޮނޑި ހިމެނޭ ސްރީލަންކާގެ ޕާލަމެންޓުގެ އަޣުލަބިއްޔަތު ނަގަން ބޭނުންވަނީ 113 ގޮނޑި ކަމަށްވާއިރު، އީސް އަނުރަ ކުމާރަ ޑިސަނަޔަކަގެ ނޭޝަނަލް ޕީޕަލްސް ޕަވަރ ޕާޓީއަށްވަނީ 159 ގޮނޑި ކަށަވަރުވެފައެވެ.
ވޯޓުގެ ނަތީޖާތައް ނުކުންނަމުންދިޔަގޮތުން ސްރީލަންކާގެ ރައީސްގެ ޕާޓީން ޕާލަމެންޓުގެ ތިންބައިކުޅަ ދެބައި ނެގުން ގާތްކަމަށް ދިރާސާކުރާ ފަރާތްތަކުން ދިޔައީ ލަފާކުރަމުންނެވެ.
މިއީ، ސްރީލަންކާގެ މުޅި ތާރީޚްގައިވެސް އެގައުމުގެ ރައްޔިތުން އެއް ޕާޓީއަކަށް ޕާލަމެންޓުގެ އަޣުލަބިއްޔަތުދިން ފުރަތަމަ ފަހަރެވެ. ޕާލަމެންޓުގެ އަޣުލަބިއްޔަތާއެކު ރައީސ އަނުރަ ވައުދުވެވަޑައިގެންފައިވާ ބޮޑެތި އިސްލާހީ ބަދަލުތައް ގެނައުމުގެ މެންޑޭޓް ރައްޔިތުން މިވަނީ ރައީސަށް ދީފައެވެ.
ސްރީލަންކާގެ ކުރީގެ ރައީސް ރަނަސިންހަ ޕްރެމަދާސާގެ ދަރިކަލުން އަދި އިދިކޮޅު އެންމެބޮޑު ޕާޓީ ކަމަށްވާ ސަމަގި ޖަނަ ބަލަވެގަޔައަށް ލިބިފައިވަނީ 40 ގޮނޑިއެވެ.
ސްރީލަންކާގެ ބައިމަދު ތަމަޅައިންނަށް ނިސްބަތްވާ އައިލަންކައި ޓެމިލް އަރަސު ކަޑްޗި ޕާޓީއަށް 8 ގޮނޑި ލިބުނުއިރު، ނިއު ޑިމޮކްރަޓިކް ފްރަންޓަށް 5 ގޮނޑި ލިބުނުއިރު، ސްރީލަންކާގެ ސިޔާސީ މައިދާނުގައި ނުފޫޒުގަދަ އާއިލާ ކަމަށްވާ ރާޖަޕަކްސަ އާއިލާއަށް ނިސްބަތްވާ ސްރީލަންކާ ޕޮޑުޖަނަ ޕެރަމުނަ ޕާޓީއަށް ލިބުނީ އެންމެ 3 ގޮނޑިއެވެ.
ސްރީލަންކާ މުސްލިމް ކޮންގްރެސް 3 ގޮނޑި ނެގިއިރު، ސަރްވަޖަނަ ބަލަޔަ 1 ގޮނޑި، ޑީމޮކްރަޓިކް ޓެމިލް ނޭޝަނަލް އެލަޔަންސަށް 1 ގޮނޑި އަދި ކުރީގެ ރައީސް ރަނިލް ވިކްރަމަސިންހަގެ ޔުނައިޓެޑް ނޭޝަނަލް ޕާޓީއަށްވެސް ނެގުނީ އެންމެ ގޮނޑިއެކެވެ.
22 މިލިއަން މީހުންގެ އާބާދީއެއް ހިމެނޭ ސްރީލަންކާގައި އިއްޔެ ބޭއްވި އާންމު އިންތިޚާބުގައި ވޯޓުލުމުގެ ހައްގު 17 މިލިއަން މީހުންނަށް ލިބިފައި ވެއެވެ. އޭގެތެރެއިން ވޯޓުލާން ނުކުތީ 65 އިންސައްތަ މީހުން ކަމަށް އިލެކްޝަން ކޮމިޝަން އޮފް ސްރީލަންކާއިން ބުނެފައި ވެއެވެ.
