ަގައިދީންނަށް ލުއި ލިބޭ ރިހެބިލިޓޭޝަން ޕްރޮގްރާމްތައް އޭޕްރިލް މަހު ފަށަން ތައްޔާރުވަނީ

ޖަލު ހުކުމް ތަންފީޒުކުރަމުން އަންނަ ގައިދީންނަށް އަދަބުން ލުއި ލިބޭ ގޮތަށް ފަރުމާކޮށްފައިވާ ރިހެބިލިޓޭޝަން ޕްރޮގްރާމުތައް އަންނަ އޭޕްރިލް މަހު ފަށަން ތައްޔާރުވެއްޖެ އެވެ.

މި ޕްރޮގްރާމް ފަށަން ނިންމާފައިވާކަން އިއުލާންކުރެއްވީ އޮގަސްޓު މަހު މޯލްޑިވްސް ކަރެކްޝަނަލް ސަރވިސްއިން ކ. މާފުށީގައި ޤާއިމުކުރި "ދިވެހި ސަގާފީ ގޯތި" ހުޅުވުމުގެ ރަސްމިއްޔާތުގައި މިނިސްޓަރ އަލީ އިހުސާނެވެ.

އިއްޔެ ބޭއްވި ވަޒީރުންގެ މަޖިލީހުގައި މިކަމާ ގުޅުންހުރި މަޝްވަރާތައް ކޮށްފައިވާއިރު، ރައީސް އޮފީހުން ބުނީ ގައިދީންނަށް ހިންގޭ ރިހިބިލިޓޭޝަން ޕްރޮގްރާމްތަކުގެ ބައެއްގެ ގޮތުގައި ޖަލުގެ އެތެރޭގައާއި އަދި ބޭރުގައި ތަފާތު އެކި މަސައްކަތްތައް ކުރުމުގެ ފުރުޞަތު ފަހިކޮށްދީ، އެޕްރޮގްރާމްތައް މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީއާއި މޯލްޑިވްސް ކަރެކްޝަނަލް ސަރވިސްގެ ފަރާތުން ކަނޑައަޅާ އުސޫލުތަކާ އެއްގޮތްވާ ގޮތުގެ މަތިން ފުރިހަމަ ކުރާ ފަރާތްތަކަށް، އެކަމާ ގުޅުވައިގެން ކަނޑައެޅިފައިވާ ނިޒާމެއްގެ ތެރެއިން ޙުކުމަށް ލުއި ދިނުމާއި، ޙުކުމް މަޢާފުކޮށްދިނުމުގެ ފުރުޞަތު ފަހިކޮށްދިނުމަށް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ނިންމަވާފައިވާ ކަމަށެވެ.

އިއްޔެ ބޭއްވި ވަޒީރުންގެ މަޖިލީހުގެ ޖަލްސާއަށް ހުށަހެޅުއްވި ކަރުދާހުގައިވާ ގޮތަށް، ރީހެބިލިޓޭޝަން ފްރޭމްވަރކަށް އަމަލުކުރަން ފެށުމަށާއި، ޖަލުތަކުގައާއި، ޖަލުން ބޭރުގައި ޤައިދީންނަށް ވަޒީފާ އަދާކުރެވޭނެ ފުރުޞަތުތައް އިތުރުކުރެވޭނެ ގޮތަށް ނިޒާމް ބަދަލުކުރުމަށާއި، ރީހެބިލިޓޭޝަން ފްރޭމްވަރކާއި، މަޢާފުދިނުމާއި، ޕެރޯލް ހަމަޖެއްސުމާއި އަދި ޙުކުމަށް ލުއި ދިނުމުގެ ނިޒާމް ގުޅުވާލުމަށާއި، ކޮމިއުނިޓީ ސަރވިސް އިތުރަށް ފުޅާކުރުމަށް އަޅަންޖެހޭ ފިޔަވަޅުތައް ކަރުދާހުގައިވާ ގޮތުގެ މަތިން އެޅުމަށް ވަޒީރުންގެ މަޖިލީހުގެ ލަފާފުޅާއެކު ރައީސުލްޖުމްހޫރިއްޔާ ވަނީ ނިންމަވާފައެވެ. މިގޮތުން މި ކަންކަން ކުރުމަށްޓަކައި ސަރުކާރުގެ ކަމާގުޅުންހުރި އިދާރާތަކާއި ހަވާލުކުރެވި، އެކަންކަން ތަންފީޛު ކުރުމަށްޓަކައި ކުރަންޖެހޭ މައިގަނޑު ކަންކަން ހާސިލްކުރުމަށް ޓައިމްލައިނެއް އެކުލަވާލައި، އެކަންކަން ހާސިލްކުރެވޭ މިންވަރު ބެލުމަށްވެސް ހަމަޖައްސަވާފައިވެއެވެ.

މިކަމާ ގުޅޭ އިތުރު މައުލޫމާތު އަސްލު ޓީވީ އާއި ހިއްސާކުރައްވަމުން މިނިސްޓަރ އިހުސާން ވިދާޅުވީ އަމާޒަކީ އަންނަ އޭޕްރިލް މަހު މި މަސައްކަތް ފެށުން ކަމަށެވެ. އެގޮތުން މިހާރު ކުރަމުން އަންނަނީ އެކަމަށް ބޭނުންވާ ގާނޫނީ ފްރޭމްވޯކްތައް އެކުލަވާލުމުގެ މަސައްކަތާއި، އެ ޕްރޮގްރާމަށް ބޭނުންވާ މީހުން ތަމްރީންކުރުން ކަމަށް ވެސް މިނިސްޓަރ ވިދާޅުވި އެވެ.

މިނިސްޓަރ އިހުސާން ވިދާޅުވީ ގައިދީންގެ ރިހެބިލިޓޭޝަންގެ ތެރެއިން އެކި ދާއިރާތަކުން މަސައްކަތްތައް ދަސްކޮށްދެމުންދާއިރު އެއިން ކޮންމެ ދާއިރާއަކުންވެސް މަސައްކަތުގައި ހޭދަކުރާ ކޮންމެ ދުވަހަކީ އެ ގައިދީއެއްގެ ހުކުމުން އުނިވާ ދުވަހެއް ކަމަށެވެ.