ރައީސް ސޯލިހަކީ ފައިނޭންޝިއަލް އިންޖިނިއަރެއް - ޝިޔާމް

ރާއްޖޭގެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަކީ ތަޖުރިބާ ހުރި ފައިނޭންޝިއަލް އިންޖީނިއަރެއް ކަމަށް މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)ގެ ލީޑަރު އަހްމަދު ސިޔާމް މުހައްމަދު ވިދާޅުވެއްޖެއެވެ.

"އަޅުގަނޑުމެންގެ ރައީސުލްޖުމްހޫރިއްޔާ އަކީ އެކަމުގެ ތަޖުރިބާ އޭގެ އެންމެ ބޮޑު މިނުގައި ގެނެސްފައިވާ ބޭފުޅެއް. އެމަނިކުފާނަކީ ހަޤީގަތުގައި ދަންނަވާނަމަ ފައިނޭންޝިއަލް އިންޖީނިއަރެއް."، ސިޔާމް ވިދާޅުވިއެވެ.

ތިނަދޫ ސިިޓީގައި ރޭ ބޭއްވި ކެމްޕެއިން ޖަލްސާގައި ސިޔާމް ވިދާޅުވީ ފެށުނީއްސުރެ ސިޔާސީ ލީޑަރުން ދަނީ ރައްޔިތުންނަށް އަމާން ފާގަތި ދިރިއުޅުމެއް ހޯދައިދިނުމަށް މަސައްކަތް ކުރައްވަމުން ކަމަށާއި ރައީސް ސޯލިހަކީ އެމަސައްކަތުގައި ހުރިހާ ލީޑަރުންނަށްވުރެ އަރާހުންނެވި ބޭފުޅެއް ކަމަށެވެ. އަދި އެމަނިކުފާނަކީ އެކަމުގެ ތަޖުރިބާ ހުންނެވި ފައިނޭންޝިއަލް އިންޖީނިއަރެއް ކަމަށް އޭނާ ވަނީ ވިދާޅުވެފައެވެ.

ރާއްޖޭގައި މިއަންނަ ހެޔޮ ބަދަލަކީ އެދިވެހި ތާރީޚުގައި މިހާތަނަށް އައިސްފައިވާ އެންމެ ހެޔޮ ބޮޑު ބަދަލެއް ކަމަށް ސިޔާމް ވިދާޅުވިއެވެ.

ސިޔާމް ވިދާޅުވީ ރާއްޖޭގެ އިޤްތިސާދު ކޮޅަށް ޖެހޭނެ ހުރިހާ ކަމެއް ކުރައްވާނެކަމަށް ރައީސް ސޯލިހު ވިދާޅުވެފައިވާ ކަމަށެވެ. އަދި ބޭރުން ފައިސާ ހޯދައިގެންނާއި ލޯނުތައް ނަގައިގެންވެސް ރާއްޖޭގެ އިޤްތިސާދު ކޮޅަށް ނަގާނެ ކަމަށް ރައީސް ވިދާޅުވެފައިވާ ކަަމަށް ސިޔާމް ވިދާޅުވިއެވެ.

ރައީސް ސޯލިހު މިރާއްޖޭގެ އިގްތިސާދު ދެގުނަ އަދި ތިންގުނައަށް ނަގާ ކޮޅަށް ޖަހާފައިވާ ކަމަށް ސިޔާމް ވަނީ ވިދާޅުވެފައެވެ.