ކުރީގެ ރައީސް އަބްދުﷲ ޔާމީން އަބްދުލް ޤައްޔޫމަކީ މޮޅު އެކޮނޮމިސްޓެއް ކަމަށް ނުވަތަ އިޤްތިޞާދީ މާހިރެއް ކަމަށް ޤަބޫލުނުކުރައްވާ ކަމަށް ރައީސްގެ ކްރިމިނަލް ޖަސްޓިސް އެޑްވައިޒަރު އަދި ކުރީގެ ޕްރޮސެކިއުޓާ ޖެނެރަލް މުހުތާޒު މުހުސިން ވިދާޅުވެއްޖެއެވެ.
އަސްލު ޓީވީގެ "ވަތުބަތާން" ޕްރޮގުރާމްގައި ބުދަ ދުވަހުގެރޭ ވާހަކަދައްކަވަމުން މުހުތާޒު ވަނީ ބެލުންތެރިން ފޮނުވި ފަސް ސުވާލަށްވެސް ޖަވާބުދެއްވާފައެވެ. ޕްރޮގުރާމްގައި ބެލުންތެރިންނަށް ހުޅުވާލައިގެން ގެނެސްދޭ ފަސް ސުވާލު ބައިގައި އާންމު މީހަކު ކުރި ސުވާލެއް ދެންނެވުމުން، މުހުތާޒު ވިދާޅުވީ، ރައީސް ޔާމީނަކީ "މޮޅު އެކޮނޮމިސްޓެކޭ" ބަޔަކު މީހުން ކިޔާ ކަމަށް. ނަމަވެސް، އެއީ ހަގީގަތެއް ކަމަށް ގަބޫލުނުކުރައްވާ ކަމަށާއި ތަރައްޤީގެ ވިސްނެވުމުގައި އެމަނިކުފާނުވެސް ކަންތައްތަކރެއް ކުރައްވާފައިވާތީ ބަޔަކު މީހުން އެގޮތަށް ކިޔަނީ ކަމަށް މުހުތާޒު ވިދާޅުވިއެވެ.
"އެހާ މޮޅި އެކޮނޮމިސްޓެއްގެ ގޮތުގައި އަޅުގަނޑަށް ޤަބޫލެއްނުކުރެވޭ. އަޅުގަނޑަށް ފެންނަ ފެނުމުގައި އެމަނިކުފާނުގެ އަރިހުގައި ތިއްބެވި ބައެއް ބޭފުޅުންގެ ހުށިޔާރުކަމުން ސަރުކާރުގެ އެހާބޮޑު ތަރައްޤީގެ މަޝްރޫއުތަކެއް ކުރިއަށްގެންދެވުނީ. އޭގެ ތެރެއިން އެއް ބޭފުޅެއް މިހާރުގެ ރައީސުލްޖުމްހޫރިއްޔާ [ރައީސް ޔާމީންގެ ޒައާމަތުގައި މިނިސްޓަރ އޮފް ހައުސިން]"
މުހުތާޒު ވިދާޅުވީ، އުމުރާނީ ތަރައްޤީ ގެނެވިގެން އިޤްތިޞާދީ މާހިރެއް ކަމަށް ބުނާ ނަމަ، އޭގެ ކްރެޑިޓް މިހާރުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒަށްވެސް ދެވެންޖެހޭނެ ކަމަށެވެ.
ރައީސް ޔާމީނަކީ ގަޓު ރައީސެއް ކަމަށް ވިދާޅުވިޔަސް އެއީ ގަޓު ރައީސެއް ނޫން ކަމަށާއި ގަޓު ބޭފުޅުން ތިއްބެވީ އެމަނިކުފާނުވެސް ހިމެނިވަޑައިގަންނަވާހެން މިހާރުގެ ސަރުކާރުގައި ކަމަށް މުހުތާޒު ވިދާޅުވިއެވެ.
އޭނާ ވިދާޅުވީ އޭނާއަކީ ވާހަކަ މަދުކޮށްފަ އަމަލު ގިނަ ކުރައްވާ މީހެއް ކަމަށާއި އަމަލުން ކަންކަން ދައްކާނެ ކަމަށެވެ. މުހުތާޒު ވިދާޅުވީ ޝަރުއީ ދާއިރާ މިނިވަންކޮށް އިތުބާރު ދެމެހެއްޓުމަށްޓަކައި އެތަނަށް ނުފޫޒު ފޯރުވުން ހުއްޓާލަން ޖެހޭ ކަމަށާއި އެކަން ޔަގީން ކުރަން މަސައްކަތް ވެސް ކުރައްވާނެ ކަމަށެވެ.
އުއްތަމަ ފަނޑިޔާރާއި ފަނޑިޔާރުން ހައްޔަރުކުރުމަކީ މާ ގަޓުހުރި ކަމަކަށް ހަދައިގެން އެ ވާހަކަ ދެއްކުމަކީ ވަރަށް ފިނޑިކަމެއްގެ ގޮތުގައި ވެސް މުހުތާޒު ސިފަކުރެއްވިއެވެ. އުއްތަމަ ފަނޑިޔާރާއި ފަނޑިޔާރު އަލީ ހަމީދު ހައްޔަރުކުރި މައްސަލާގައި ފިޔަވަޅު އެޅުމުގެ ކަންކަން ތަންފީޒު ކުރަން މަސަައްކަތް ކުރައްވާނެ ކަމުގެ އިޝާރާތެއް ވެސް މުހުތާޒު ދެއްވިއެވެ.
