ބޭންކް އޮފް މޯލްޑިވްސްގެ މާލީ ދުޅަހެޔޮކަން ވަރަށް ރަނގަޅު: ބީއެމްއެލް

ބޭންކް އޮފް މޯލްޑިވްސްއިން ނެރުނު ރަސްމީ ބަޔާނެއްގައި އެ ބޭންކުގެ މާލީ ދުޅަހެޔޮކަމާއި ގުޅޭގޮތުން ވަރަށް މުހިންމު ތަފްސީލުތަކެއް ހާމަ ކޮށްފިއެވެ.

މި ބަޔާނުގައި ބޭންކުން އެންމެ ބޮޑަށް އަލިއަޅުވާލާފައިވަނީ ޔޫއެސް ޑޮލަރުގެ ނެޓް އޯޕަން ޕޮޒިޝަން ނުވަތަ އެންއޯޕީ އާއި ބޭންކުގެ ލިކުއިޑިޓީއާ ހުރި ތަފާތުތައް އޮޅުންފިލުވައިދިނުމަށެވެ. ބޭންކުން ބުނާ ގޮތުގައި ނެޓް އޯޕަން ޕޮޒިޝަނަކީ ވަކި ވަގުތެއްގައި ބޭންކެއްގެ ބޭރު ފައިސާގެ އެސެޓްތަކާއި ލައިބިލިޓީތަކުގެ ދެމެދުގައި ހުންނަ ތަފާތެވެ. މިއީ ބޭންކުގައި ބޭރުފައިސާ ވިއްކުމުގެ ގާބިލުކަން ހުރި މިންވަރު ދައްކައިދޭ މިންގަނޑެއް ކަމަށާއި، މިއީ އެކްސްޗޭންޖް ރޭޓަށް އަންނަ ބަދަލުތަކުގެ ސަބަބުން ލިބިދާނެ ފައިދާ ނުވަތަ ގެއްލުން ވަޒަންކުރާ މިންގަނޑެއް ކަމަށްވެސް ބޭންކުން މައުލޫމާތުދެއެވެ.

މީގެ އިތުރުން ބޭންކުން ފާހަގަކުރި ގޮތުގައި 2024 ވަނަ އަހަރުގެ ސެޕްޓެންބަރު މަހު ބޭންކުގެ ޔޫއެސް ޑޮލަރުގެ ނެޓް އޯޕަން ޕޮޒިޝަން %20- އަށް ވެއްޓުނެވެ. މިއީ ބޭންކުން ގާތްގަނޑަކަށް 200 މިލިއަން ޔޫއެސް ޑޮލަރު އިތުރަށް ވިއްކިފައިވާ ކަމުގެ ނިޝާނެކެވެ. ނަމަވެސް މިއީ ބޭންކުގެ ލިކުއިޑިޓީއަށް ނުވަތަ ކަސްޓަމަރުން ބޭނުންވާ ފައިސާ ދޫކުރުމުގެ ގާބިލުކަމަށް އައި ބަދަލެއް ނޫންކަމަށް ބޭންކުން ބުންޏެވެ. ބޭންކުން އިސްނަގައިގެން އަދި މިނިސްޓްރީ އޮފް ފައިނޭންސް އެންޑް ޕްލޭނިންގެ އެހީތެރިކަމާއެކު 2025 ވަނަ އަހަރުގެ ސެޕްޓެންބަރު މަހު މި ޕޮޒިޝަން ވަނީ އަލުން ލޯންގް ޕޮޒިޝަނަކަށް ބަދަލުކުރެވިފައެވެ. މިހާރުވެސް ބޭންކުގެ އެންއޯޕީ ހުރީ ރެގިއުލޭޓަރީ މިންގަނޑުތަކަށްވުރެ މާ ރަނގަޅު ހާލަތެއްގައެވެ.

ބޭންކުގެ ވިޔަފާރީގެ ކާމިޔާބީއަށް ބަލާއިރު، މިދިޔަ އަހަރު ތެރޭގައި އެކަނިވެސް 600 މިލިއަން ޑޮލަރަށްވުރެ ގިނަ ޔޫއެސް ޑޮލަރު ވިއްކައިގެން މުއާމަލާތްތައް ހިންގާފައިވާކަން ބޭންކުން ފާހަގަކުރެއެވެ. އަދި ރާއްޖޭގެ އެންމެ ބޮޑު ސިނާއަތް ކަމަށްވާ ފަތުރުވެރިކަމުގެ ދާއިރާއަށް 2024 އިން ފެށިގެން މިހާތަނަށް 365 މިލިއަން ޔޫއެސް ޑޮލަރުގެ އާ ލޯނު ދޫކޮށްފައިވާކަމީ ބޭންކުގެ މާލީ ތަނަވަސްކަން ހުރި މިންވަރު ހާމަވާ ކަމެކެވެ. 2026 ވަނަ އަހަރުގެ ފުރަތަމަ ކުއާޓަރުގެ ނިޔަލަށް ފަތުރުވެރިކަމުގެ ދާއިރާގެ ނެޓް ލޯން ޕޯޓްފޯލިއޯ ވަނީ 585 މިލިއަން ޔޫއެސް ޑޮލަރަށް އަރާފައެވެ.

ބޭންކުގެ ސީއީއޯ މުޙައްމަދު ޝަރީފް ވިދާޅުވި ގޮތުގައި ބޭންކުގެ 43 އަހަރުވީ ތާރީހުގައި ނުދެކޭ ފަދަ ރެކޯޑް ނަތީޖާތަކެއް މިދިޔަ އަހަރު ވަނީ ހޯދާފައެވެ. މިއީ ބޭންކުގެ ބޯޑުން ކަނޑައަޅާފައިވާ ރިސްކް އެޕެޓައިޓާއި ބައިނަލްއަގުވާމީ މިންގަނޑުތަކަށް ފެތޭ ގޮތަށް ހަރުދަނާކޮށް މެނޭޖްކުރުމުގެ ނަތީޖާއެވެ. ބޭންކް އޮފް މޯލްޑިވްސްއިން އަބަދުވެސް މަސައްކަތްކުރާނީ ދެފުށް ފެންނަ، ހަރުދަނާ މާލީ މެނޭޖްމަންޓެއްގެ ދަށުން ކަސްޓަމަރުންނާއި ހިއްސާދާރުންގެ އިތުބާރު ދެމެހެއްޓުމަށް ކަމަށް އެ ބޭންކުން ބަޔާންކުރެއެވެ. މި ބަޔާނަކީ ބޭންކުގެ މާލީ ހާލަތާއި ގުޅޭގޮތުން ހުރި ކަންބޮޑުވުންތަކަށް ޖަވާބުދީ، ރައްޔިތުންނަށް ހަގީގީ މައުލޫމާތު ފޯރުކޮށްދިނުމަށް ނެރުނު މުހިންމު ބަޔާނެކެވެ.