ދިވެހިރާއްޖޭގެ ފަތުރުވެރިކަމުގެ ސިނާއަތް ބޭރު ދުނިޔޭގައި އިޝްތިހާރުކުރުމަށްޓަކައި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ)ގެ ދައުވަތަކަށް ޖަރުމަނުވިލާތުގެ މަޝްހޫރު ނޫސްވެރިންނާއި ބްލޮގަރުން ހިމެނޭ ޓީމެއް ރާއްޖެ އަތުވެއްޖެއެވެ.
ލެ މެރިޑިއަން މޯލްޑިވްސް ރިސޯޓް އެންޑް ސްޕާ އަދި ޑަބްލިއު މޯލްޑިވްސްގައި މިދިޔަ މަހުގެ 29 ގައި ކަމަށާއި މިމަހުގެ ހަތަރުވަނަ ދުވަހުގެ ނިޔަލަށް ފަތުރުވެރިކަމުގެ ޕްރޮޑަކްޓްތަކާއި ތަފާތު ތަޖުރިބާތަކާއި ރާއްޖޭގެ މެހެމާންދާރީ ނުހަރު ފުރިހަމައަށް އެ ޓީމަށް އަރުވާފައިވާނެކަމުގައި އެމްއެމްޕީއާރސީން ބުނެއެވެ.
ރާއްޖެ އިޝްތިހާރުކުުރުމަށް ގެނެވުނު މި ޓީމުގައި ހިމެނެނީ ޖަރުމަންވިލާތުގެ ހަތަރު ޕަބްލިކޭޝަނެއް ތަމްސީލުކުރާ ހަތަރު ނޫސްވެރިންނާއި، ޖަރުމަނު ބަހުން ވާހަކަ ދައްކާ މާކެޓްތަކުގެ (ޖަރުމަނުވިލާތް، ސްވިޒަލޭންޑް، އޮސްޓްރިއާ)ގެ އެއް ޕީއާރު ރެޕްރެޒެންޓޭޓިވްކަމަށް އެމްއެމްޕީއާރްސީން ބުންޏެވެ.
އެ ފަރާތްތަކުން ރާއްޖެއިން ލިބެން ހުރި ތަފާތު ހިދުމަތްތަކާއި ޕްރޮޑަކްޓްތައް ތަޖުރިބާކޮށް، އެ ތަޖުރިބާތައް އޮންލައިން އާޓިކަލްތަކާއި ޕަބްލިކޭޝަންތަކާއި ސޯޝަލް މީޑިއާގައި ހިއްސާކުރާއިރު ވިޒިޓް މޯލްޑިވްސް ސްޓޯރީޓެލާސް ކޮންފަރެންސް 2023 ތަޖުރިބާ ކުރުމުގެ ފުރުސަަތު ވެސް އެ ޓީމަށް ލިބުނުކަމަށް އެމްއެމްޕީއާރްސީން ބުންޏެވެ.
މި މީޑިއާ ދަތުރަކީ ޖަރުމަނު ބަހުން ވާހަކަ ދައްކާ މާކެޓްތަކަށް ކަނޑައަޅާފައިވާ، އެމްއެމްޕީއާރުސީއިން ގެ މާކެޓިންގ ސްޓްރެޓެޖީގެ ދަށުން ހިންގާ ހަރަކާތެކެވެ. ޖަރުމަންވިލާތަކީ ރާއްޖެއަށް ހަތަރުވަނައަށް އެންމެ ގިނައިން ފަތުރުވެރިން ޒިޔާރަތްކުރާ ގައުމުކަމަށްވާއިރު މިމަހުގެ ހަވަނަ ދުވަހުގެ ނިޔަލަށް އެ ގައުމުން 61،674 ފަތުރުވެރިން ރާއްޖެއަސް ޒިޔާރަތްކޮށްފައިވެއެވެ.
