ވޯލްޑް ކަޕް ފައިނަލްގައި ބޭނުންކުރާ ބޯޅަ ދައްކާލައިފި

ފީފާ ވޯލްޑް ކަޕް 2026 ގެ ސެމީ ފައިނަލާއި، ތިންވަނަ ހޮވާ މެޗު އަދި ފައިނަލް މެޗުގައި ބޭނުންކުރުމަށް ހާއްސަކޮށް ފަރުމާކޮށްފައިވާ ރަސްމީ ބޯޅަ ޓްރިއޮންޑާ ފައިނަލް އެޑިޑާސް އިން އާންމުކޮށްފިއެވެ.

މި ބޯޅައަކީ 2025 ވަނަ އަހަރު ނެރުނު "ޓްރިއޮންޑާ" ބޯޅައިގެ ފެންވަރު ހިފަހައްޓަމުން، އޭގެ ފަރުމާއަށް ޒަމާނީ އަދި ފުރިހަމަ ބަދަލުތަކެއް ގެނެސްގެން ތައްޔާރުކޮށްފައިވާ ބޯޅައެކެވެ. ވޯލްޑް ކަޕްގެ ތާރީހުގައި ވެސް ފުރަތަމަ ފަހަރަށް، އެޑިޑާސް އިން މިވަނީ ހަމައެކަނި ކުލައަށް ބަދަލެއް ގެނައުމުގެ ބަދަލުގައި، މުބާރާތުގެ ފަހު މަރުހަލާގެ މުހިންމުކަމާއި ޝަރަފު ރަމްޒުކޮށްދޭނެ ފަދަ މުޅިން ތަފާތު ފަރުމާއެއް ތައާރަފުކޮށްފައެވެ.

ޓްރިއޮންޑާ ފައިނަލް ފަރުމާކޮށްފައިވަނީ ދުނިޔޭގެ އެންމެ ޝަރަފުވެރި ފުޓްބޯޅަ ތައްޓާ ހަމައަށް ވާސިލުވުމަށް ކުޅުންތެރިން ކުރާ ގޮންޖެހުން ބޮޑު ދަތުރުން ހިތްވަރު ލިބިގެންނެވެ.

ވޯލްޑް ކަޕް ތަށީގެ ރަންކުލައާ ގުޅުވައިގެން، ކަޅު ކުލައިގެ ބޭސްއެއްގައި ތައްޔާރުކޮށްފައިވާ މި ބޯޅައިން ފެންނަނީ ޝާހީ އަދި ޖަޒުބާތީ ފުރިހަމަކަމެކެވެ.

މިއީ މުބާރާތުގެ އެންމެ ފޯރިގަދަ ފަހު މަރުހަލާގެ ފޯރި އިތުރަށް ގަދަކޮށްދޭނެ، ފާހަގަކޮށްލެވޭ ފަރުމާއެކެވެ.