އިސްރާއީލުން ލުބުނާނުގެ ވެރިރަށް ބެއިރޫތަށް އަނެއްކާވެސް ހަމަލާދީފި، 4 މީހުން މަރު، 7 މީހުން ޒަޚަމް

އިސްތިއުމާރީ އިސްރާއީލުން ލުބުނާނުގެ ވެރިރަށް ބެއިރޫތަށް ދިން ވައިގެ އުދުވާނީ ހަމަލާތަކުގައި 4 މީހުން މަރުވެ، އިތުރު 7 މީހުން ޒަޚަމްވެފައިވާ ކަމަށް ލުބުނާނު ސަރުކާރުން ބުނެފިއެވެ.

އިސްރާއީލުގެ ޓެރަރިސްޓުން ބޮންއަޅާފައިވަނީ ބެއިރޫތުގެ ދެކުނުގެ ދަހީޔާއަށެވެ. ހަމަލާތައް އެތައް އެޕާޓްމަންޓަކަށް އަމާޒުކޮށްފައި ވެއެވެ.

ހަމަލާ ދިނުމަށްފަހު ޓެރަރިސްޓު ސިފައިން ބުނެފައިވަނީ، އެމީހުން ހަމަލާދިނީ އިސްރާއީލަށް ހަމަލާދިނުމަށް ތައްޔާރުވަމުންދިޔަ ހަމާސްގެ ބަޔަކަށް އެހީވާން އުޅުނު ހިޒްބުﷲ މެމްބަރަކަށް ކަމަށެވެ.

ނަމަވެސް، ލުބުނާނު ސަރުކާރުންވަނީ އިސްރާއީލުގެ މި ވާހަކަތައް ދޮގުކޮށްފައެވެ.

އިސްތިއުމާރީ އިސްރާއީލުން މި ނިމުނު މާޗްމަހުގެ 28 ވަނަ ދުވަހުންވެސް ބެރިރޫތަށް ބޮންއަޅާފައި ވެއެވެ. މިއީ، ހަމަލާތައް ހުއްޓާލުމަށް ހިޒްބުﷲއާއި އިސްރާއީލާ ދެމެދު މިދިޔަ އަހަރުގެ ނޮވެމްބަރު މަހު ވެވުނު އެއްބަސްވުމަށްފަހު އިސްރާއީލުން ވެރިރަށް ބެއިރޫތަށް ހަމަލާދިން ފުރަތަމަ ފަހަރެވެ.

އެފަހަރު ހަމަލާދިނީ، ލުބުނާނުގެ ތެރެއިން އިސްރާއީލަށް ރޮކެޓް ހަމަލާތަކެއް ދިންކަމަށް ބުނެއެވެ.

ބެއިރޫތަށް ރޭގައި ދިން ވައިގެ ހަމަލާތައް ލުބުނާނުގެ ރައީސް ޖީސެފް އައޫންވަނީ ހަރުކަށި އިބާރާތުން ކުށްވެރި ކުރައްވާފައެވެ.

ލުބުނާނުގެ ރައީސް ވިދާޅުވީ، ބެއިރޫތު ހަމަލާތަކަކީ، އިސްރާއީލުން ލުބުނާނާ ދެކޮޅަށް ނުބައި ނިޔަތެއް ގެންގުޅޭކަމުގެ ނުރައްކާތެރި އިންޒާރެއް ކަމަށެވެ.

އެހެންވެ، ލުބުނާނުގެ މިނިވަންކަމާއި އިސްތިގްލާލު ރައްކާތެރިކޮށް ދެމެހެއްޓުމަށް، ލުބުނާނަށް އެހީތެރިވުމަށް ޖޯސެފް އައޫންވަނީ ދުނިޔޭގެ އެކި ކަންކޮޅުތަކުގައި ތިބި ލުބުނާނުގެ އެކުވެރިން ދައުލަތްތަކަށް ގޮވާލައްވާފައެވެ.