އެމެރިކާގެ ކަނޑުގެ ސިފައިންގެ ލަޝްކަރާ ދެކޮޅަށް ހޫޘީން ވަރުގަދަ އަސްކަރީ އޮޕަރޭޝަނެއް ހިންގައިފި

ރަތްކަނޑުގެ އުތުރުގައި އޮތް އެމެރިކާގެ ކަނޑުގެ ސިފައިންގެ ލަޝްކަރާ ދެކޮޅަށް ޔަމަނުގެ ހޫޘީން ވަރުގަދަ އަސްކަރީ އޮޕަރޭޝަނެއް ހިންގައިފިއެވެ.

މި އޮޕަރޭޝަންގައި، ކްރޫޒް މިސައިލާއި، ޑްރޯން ބޭނުން ކުރެވުނު ކަމަށް، ހޫޘީ އަސްކަރިއްޔާއިން ބުނެއެވެ.

ހޫޘީން ހިންގި އަސްކަރީ އޮޕަރޭޝަން އަމާކުރީ، އެމެރިކާގެ ހަނގުރާމަމަތީ މަތިންދާ ބޯޓު އުފުލާ މަނަވަރު، ޓްރޫމަންއާއި، އެ މަނަވަރާއެކު ހަރަކާތްތެރިވާ ހަނގުރާމަމަތީ އެހެން މަނަވަރުތަކަށެވެ.

ޔަމަނަށް ވައިގެ ހަމަލާތައް ދެނީ، ރަތްކަނޑުގެ އުތުރުގައި ގާއިމްވެފައިވާ މި ލަޝްކަރުންނެވެ.

މި ލަޝްކަރާ ދެކޮޅަށް ހޫޘީން ހިންގި އޮޕަރޭޝަނާ ގުޅޭގޮތުން އެމެރިކާއިން އަދި އެއްވެސް އެއްޗެއް ނުބުނެއެވެ.

ހޫޘީ އަސްކަރިއްޔާއާއި ހަވާލާދީ އަލް މާސިރާ ޓީވީއާއި، ސަބާ ޓީވީން ބުނެފައިވަނީ، އެމެރިކާގެ ލަޝްކަރާ ދެކޮޅަށް އެމީޙުން ހިންގި އޮޕަރޭޝަނަކީ، ފާއިތުވެދިޔަ ގަޑިތަކުގައި އެމެރިކާއިން ޔަމަނަށް ދީފައިވާ 32 އުދުވާނީ ހަމަލާތަކުގެ ރައްދުގައި ހިންގި އޮޕަރޭޝަނެއް ކަމަށެވެ.

އެމެރިކާއިން ޔަމަނަށް މިއަދު ދިން ހަމަލާތައް އަމާޒުކޮށްފައިވަނީ ވެރިރަށް ސަންޢާއަށާއި، ސަޢާދާއަށެވެ. މި ހަމަލާތަކުގައި އާންމުން މަރުވެ އަދި އެތައްބަޔަކު ޒަޚަމްވެފައިވާ ކަމަށް ޔަމަނުގެ މީޑިއާ ވަސީލަތްތަކުން ހާމަކުރެއެވެ.

އެމެރިކާއިން ޔަމަނުގެ ހުދައިދާއަށް އިއްޔެ ދިން ވައިގެ ހަމަލާތަކުގައި 4 މީހުން މަރުވެ، އެތައް ބަޔަކު ޒަޚަމްވި ކަމަށް އަލްމާސިރާ ޓީވީން ރިޕޯޓްކޮށްފައި ވެއެވެ.

އެމެރިކާއިން ޔަމަނަށް އިއްޔެ ދިން ހަމަލާތަކުގައި، ބޯފެން އުފައްދާ ކާރުޚާނާއަކަށް ބޮންއަޅައި އެތައް ގޮއްވާލާފައި ވެއެވެ. މިކަމުގެ ސަބަބުން ބައިލައްކައެއްހާ އާންމުންނަށް ބޯފެނުގެ ޚިދުމަތް މެދުކެނޑިފައިވާ ކަމަށް ޔަމަނުން ރިޕޯޓް ކުރެއެވެ.

އެމެރިކާ ސިފައިން ޔަމަނަށް ބޮންއަޅަނީ، ހޫޘީންގެ ތަންތަނަށް ކަމަށް ބުނި ނަމަވެސް، މިހާތަނަށް ގިނަ ހަމަލާތައް އަމާޒުކޮށްފައިވަނީ އާންމު ތަންތަނަށެވެ. މަރުވެފައިވާ ގިނަމީހުންނަކީވެސް އާންމުންނެވެ. އޭގެތެރޭގައި ކުޑަކުދީންވެސް ހިމެނެއެވެ.

ހޫޘީ ސަރުކާރުން ބުނެފައިވަނީ، މާޗްމަހުގެ 15 ވަނަ ދުވަހުން ފެށިގެން އެމެރިކާއިން ޔަމަނަށް ދެމުންގެންދާ ހަމަލާތަކުގައި މިހާތަނަށް 60 އަށްވުރެ ގިނަމީހުން މަރުވެ، އެތައްބަޔަކު ޒަޚަމްވެފައިވާ ކަމަށެވެ.

އެމެރިކާއިން ޔަމަނަށް ބޮންއަޅަންފެށީ، ހަނގުރާމަ ހުއްޓާލުމުގެ އެއްބަސްވުން އުވާލައި އިސްތިއުމާރީ އިސްރާއީލުން ޣައްޒާއަށް ބޮންއަޅަންފެށުމުން، ރަތްކަނޑުން ދަތުރުކުރާ އިސްރާއީލާއި އަދި އިސްރާއީލާ ގުޅުންހުރި އާގުބޯޓުފަހަރަށް ހަމަލާދޭނޭ ކަމަށް ހޫޘީން އިންޒާރުކުރުމުންނެވެ.

އެމެރިކާއިން ހަނގުރާމަމަތީ މަތިންދާ ބޯޓު އުފުލާ އިތުރު މަނަވަރެއް ރަތްކަނޑު ސަރަހައްދަށް ފޮނުވައި، އިތުރު ސިފައިންނާއި، ހަތިޔާރު ފޮނުވުމުން، ހޫޘީން މިހާރުވަނީ އިސްރާއީލާއި އެމެރިކާއާ ދެކޮޅަށް ފުރިހަމަ ހަނގުރާމައެއް ކުރުމަށް ތައްޔާރުވަމުންދާކަން އިއުލާންކޮށްފައެވެ.

ހޫޘީ އަސްކަރިއްޔާ، އަންސާރުﷲއަކީ ޒަމާނީ ހަތިޔާއި ލަޝްކަރުގެގޮތުންވެސް ބާރުގަދަ އަސްކަރިއްޔާއެކެވެ. އެމީހުންގެ އަތުގައި ދުރުރާސްތާ ބެލިސްޓިކް މިސައިލާއި، ކްރޫޒް މިސައިލާއި، ހަމަލާދޭ ޑްރޯން ފައުޖަކާއި، ކަނޑުގައި އަޅާ މައިނާއި، އެނޫންވެސް ހަތިޔާރުތައް އެބަހުއްޓެވެ.