ގާބިލް މީހުން ގައުމު ބިނާކުރާއިރު ނާގާބިލް މީހުން ގައުމު ވީދާ ހުސްކުރަނީ

21 ވަނަ ގަރުނުގައި އެންމެ އާއްމުކޮށް ދެކެވެނީ ތަރައްގީގެ ވާހަކައެވެ.

އުސް އިމާރާތްތަކާއި ބްރިޖްތަކާއި ފައުންޓެއިން ތަކާއި އެއަރޕޯޓްތައް އަޅާވާހަކައެވެ.

ދިރިއުޅުމުގެ ތަރައްގީ އާއި ދިރިއުޅެމުންދާ ތަނުގެ ތަރައްގީ ގެންނާނެ ގޮތުގެ ފުރިހަމަ ޕްލޭނެއް ނެތޭ ދެންނެވިދާނެއެވެ.

ރާއްޖެއަށް ބަލާއިރު މަލަމަތި ރީތި ނަމަވެސް އެންމެ އެދެވޭ ތަރައްގީ ގެނެވިފައިވާ ވޭތޯ ނުވަތަ ނޫންތޯ މިއީ ކޮށްލުން މުހިއްމު ސުވާލެކެވެ.

60 ވަނަ މިނިވަން ދުވަސް އަންނަ އިރު ގައުމަށް އައި ތަރައްގީ އާއި މެދު ފުންކޮށް ވިސްނާލަން ޖެހެއެވެ.

އެންމެ ފުރަތަމަ ކަމަކަށް މުޖުތަމައު ތަހުޒީބުވާން ޖެހެއެވެ.

ތަރައްގީ އަކީ ކޮންކްރީޓުން ވާ އެއްޗެއް ނަމަ އެ ތަރައްގީ ކިތަންމެ ފުރިހަމައަކަށްވެސް ވެ ނިމިއްޖެއެވެ.

ނަމަވެސް 4 ފޫޓް 4 ފޫޓް ގޮޅިއެއްގައި ދިރިއުޅެމުން 1 ފާހާނާއެއް އެންމެން ބޭނުންކޮށް ޑިއުޓީ ބަހައިގެން ނިދާ ފަދަ ދިރިއުޅުމަކީ ޔަގީނުންވެސް ތަރައްގީ އެއް ނޫނެވެ.

ބޯހިޔާވަހިކަމުގެ މައްސަލަ ހައްލުނުވެ ގައުމު ތަރައްގީ ކުރަން އުނދަގޫ ވާނެއެވެ. ފުރިހަމަ ސިއްހީ ނިޒާމެއް ނެތި ތަރައްގީ ގައި ދެމި ތިބެން ފަސޭހަ އެއް ނުވޭނެއެވެ.

މަގުމެދުގައި ސައިކަލު ޕާކުކޮށްލާފައި ފިހާރައަށް ވަދެފައި ނިކުންނައިރު މުޅި މަގުގެ ޓްރެފިކް ތޮއްޖައްސާލުމަކީ ވެސް ތަހުޒީބުކަމެއް ކަމަށް ދެކުމަކީ މިއަދު ފެންނަ ޒަމާނީ ތަރައްގީއެވެ.

އިންސާނާގެ ވިސްނުމާއި ފިކުރު ތަރައްގީ ނުވެ ގައުމެއް ތަރައްގީ ނުވާނެއެވެ.

ރާއްޖެ ޗައިނާ އާއި ސިންގަޕޫރުގެ ފެންވަރަށް ނުދިޔަ ނަމަވެސް ރާއްޖޭގައި ދިރިއުޅޭ ދިވެހިންނަކީ ހުނަރުވެރި ބައެކެވެ.

ހުނަރުވެރި ނަމަވެސް ބައެއް ހާލަތްތަކުގައި ކަންނެތް ކަން ނަފްސުގައި ހުރިނަމަ ކުރާނެ މާ ބޮޑު ފައިދާ އެއް ނޯންނާނެއެވެ.

މިއަދު ބިދޭސީން ގިނަވުމުގެ މައިގަނޑު އެއް ސަބަބަކީ ދިވެހިން ބައެއް މަސައްކަތްތައް ކުރާހިތް ނުވުމެވެ. ކޮންސްޓްރަކްޝަން ދާއިރާގައި ލޭބަރުންގެ ގޮތުގައި މިއަދު ދިވެހިންނަށް ވުރެ ގިނައީ ބިދޭސީންނެވެ. ސަބަބަކީ އެދާއިރާގައި މަސައްކަތްކުރާ ދިވެހިންގެ އަދަދު މަދުވުމެވެ.

ދިވެހިރާއްޖޭގެ އިގްތިސާދުގެ މައިތަނބު ކަމަށްވާ ފަތުރުވެރިކަމަށް ބެލި ނަމަވެސް ފެނިގެންދާ ހަގީގަތަކީ ބިދޭސީން އެ ސިނާއަތުގައި ހަރަކާތްތެރިވާ މިންވަރު އިތުރުވަމުންދާ ތަނެވެ.

ދިވެހިންގެ ލޭނާރު ކަމަށްވާ މަސްވެރިކަމުގެ ސިނާއަތުގައިވެސް ބިދޭސީން ހަރަކާތްތެރި ވަމުންދާތާ ދުވަސްތަކެއް ވެއްޖެއެވެ. ބިދޭސީން ނާއި ނުލާ ގައުމު ކުރިއަށް ނުދާ މިންވަރަށް ބިދޭސީން ގައުމުގައި ގިނަ ވެއްޖެއެވެ.

ގޭތެރެ ސާފުކުރުމާއި ކުނި އުކުމާއި ކުނި ކެހުމާއި ކަންމަތީ ހޮޓަލުގެ ވެއިޓަރު ކަމާއި ސައިކަލާއި ކާރު ދޮވެ ސާފުކުރުމާއި ފެރީ ދޯނީގެ ފަޅުވެރިންގެ ގޮތުގައި ވެސް މިއަދު ބިދޭސީން ފެންނަލެއް މަދެއް ނޫނެވެ.

ވަޒީފާ ނުލިބޭ ޒުވާނުންގެ މިންވަރު އިތުރުވާކަމަށް ތަފާސް ހިސާބުން ދައްކާއިރު ދިވެހިންނަށް ކުރެވޭ މަސައްކަތްތަކުގައި ބިދޭސީން އުޅެނީ ދިވެހިން ނުލިބޭތީ ބާއޭ ނުވަތަ އެހެން ސަބަބަކާއި ހުރެ ބާއޭ މިއީ މިއަދު ކޮށްލުން މުހިއްމު ސުވާލެކެވެ.

ކޮންމެ އަހަރަކު އޯލެވެލް އަދި އޭލެވެލް ނިންމާ އެތަށް ޒުވާނުންނެއް މުޖުތަމައުގެ ތެރެއަށް ނިކުމެއެވެ. އެހުރިހާ ޒުވާނުން ވަޒީފާއަށް ދާ ނަމަ ނުވަތަ އިތުރު ތައުލީމް ހާސިލްކުރާ ނަމަ ޔަގީނުންވެސް މިގައުމު ކުރިއަރައިގެން ދާނެއެވެ.

ގައުމުތައް ކުރިއަރައިގެން ގޮސްފައިވަނީ އެތަނުގައި ދިރިއުޅޭ ރައްޔިތުންގެ ވިސްނުމާއި ފިކުރާއި ހިޔާލު މުއްސަނދި ކަމާއެކުގައެވެ.

އައު އީޖާދެއް ކުރަން ސައިންސްވެރިޔާ ކުރަނީ ތަހުލީލެވެ. އެތަހުލީލް އޭނާ އަށް ކުރެވެނީ އޭނާއަށް ލިބިފައިވާ އިލްމުގެ މައްޗަށް ބަރޯސާވެ ހުރެއެވެ.

ދިވެހިންގެ ތެރޭގައިވެސް ދިރާސާ ކުރާ ފަރާތްތައް މިއަދު އިތުރުވަމުންދާއިރު ގައުމު ކުރިއަރައި ނުދާ ސަބަބު ދެނެގަތުމަށް ގައުމީ ފެންވަރުގައި ދިރާސާއެއް ކޮށްލުމަކީ ނުހަނު ބޭނުންތެރި ކަމެކެވެ.

ތަހުޒީބު ވަނީ އަރާ ފައިވާނާއި އަތުގައި އޮންނަ ފޯނުން އެކަނި ކަމަށް ބުނާ ބުނުމާއި ދެކޮޅުވެވޭ ސަބަބަކީ އެފޯނުގެ ޒަރިއްޔާ އިން ހުނަރު ދައްކާލެވެއެވެ. މިއަދު މީސް މީޑިއާގައި ހުނަރުވެރި އެތައް މޫނުތަކެއް މިރާއްޖެއިން އެކަނި ފެނިގެންދަނީ އެއްކަލަ ސްމާޓް ފޯނުގެ ސަބަބުންނެވެ. އެހެންކަމުން އަތުގައި އޮންނަ ފޯނަކީ ކޮންޓެންޓް އުފެއްދުމަށް ބޭނުން ހިފޭނެ މުހިއްމު ވަސީލަތެކެވެ. ދެން އޮތީ އަޅާ ހެދުމެވެ. ހެދުން އަޅައިގެން ރީތި މޮޅު ކޮންޓެންޓް ހަދައި މީހާ މަޝްހޫރުވެ ވަރުގަދަ ޝަހްސިއްތަކަށް ވެވިދާނެއެވެ. ބޭނުންވަނީ ހިތްވަރެވެ.

ދެން އޮތީ ހަގީގީ ތަރައްގީ އެވެ. ހަގީގީ ތަރައްގީ އެތައް ގޮތަކަށް މާނަ ކުރެވިދާނެއެވެ. އެއީ ޒަމާނީ ފެންވަރުގައި އަގުބޮޑު ކާރާއި މަތީ ފެންވަރުގެ ރިސޯޓްތަކުގައި ދިރިއުޅުން ކަމަށް ވާނަމަ އެއީ އެއް ވައްތަރެވެ. އަނެއް ވައްތަރަކީ ރާއްޖޭގެ ސާފު ވަޔާއި ހިތްގައިމު ގޮނޑުދޮށްތަކާއި ދޮންވެލި ތުނޑިތަކާއި މޫދުގެ ހިތްފަސޭހަ ކަމުގައި ފަތާލާ ގޭގެ ގިފިލި ވަޅުން ދާނިން ފެންވަރައި ނަލަހެދިގެން ދޮންވެލި މަގުތަކުގައި ހިނގާލުމެވެ. ތިންވަނަ ވައްތަރަކީ ދުނިޔޭގެ އެކި ގައުމުތަކަށް ދަތުރުކޮށް ޗުއްޓީ ހޭދަކޮށް ނޫނީ ބޭރުގައުމެއްގައި ވަޒަންވެރިވެ އުޅުމެވެ. މިނޫންވެސް ތަފާތު އެތައް ވައްތަރު ހިމެނެއެވެ.

ހަގީގީ ތަރައްގީ މާނަ ކުރާނީ އެމީހާ އަމިއްލައަށެވެ. ނަފްސާއި ޖިސްމާއި ވިސްނުމަށް އަންނަ ތަރައްގީ އަކީ ފަހަރުގައި ހަގީގީ ތަރައްގީއަށް ވެދާނެއެވެ.