ރައީސްގެ ޝުކުރު ފެނަކަ އެމްޑީ ސައީދަށް

ފެނަކައިން ކުރާ މަސައްކަތް ތަކަކީ ނަމޫނާ މަސައްކަތް ތަކެއް ކަމަށް ވިދާޅުވެ ފެނަކަ އެމްޑީ ސަޢީދަށް ރައީސް ސޯލިހު ވަރަށް ބޮޑަށް ތަޢުރީފް ކުރައްވައިފިއެވެ.

ގއ ނިލަންދޫގެ އައު އިންޖީނުގެއާއި އޮފީސް އިމާރާތް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ، މީގެ ހަތަރު އަހަރު ކުރިން ވެރިކަމާ ހަވާލުވީއިރުގައި ގިނަ ރަށްރަށުގެ ގިނަ ރައްޔިތުންނަށް އަސާސީ ޚިދުމަތްތައް އެއީ ލިބޭ އެއްޗެއް ނޫން ކަމަށާއި، އޭގެތެރޭގައި، ފެނާއި ނަރުދަމާ ކަމަށްވިޔަސް، ލަފާފުރުން ކަމަށްވިޔަސް، ކަރަންޓުގެ ޚިދުމަތް ކަމަށްވިޔަސް، ޞިއްޙީ ޚިދުމަތާއި ތަޢުލީމު ކަމަށްވިޔަސް، މިއީކީ ރާއްޖޭގެ އެކި ކަންކޮޅުތަކުގައި ދިރިއުޅޭ ރައްޔިތުންނަށް އެހާ ފަސޭހައިން ގިނަ ބަޔަކަށް ލިބޭ އެއްޗެއް ނޫން ކަމަށެވެ.

" ފެނަކައިގެ ހިންގުން އަޙްމަދު ސަޢީދާ ހަވާލުކޮށް، އަޅުގަނޑުމެން ކަނޑައެޅި ސިޔާސަތަކީ، އެއްވެސް ރަށެއް ބާކީނުކޮށް، މި ދެންނެވިހެން ރައްޔިތުންނަށް މި ޚިދުމަތް ފޯރުކޮށްދިނުން. މިހާހިސާބަށް އައިއިރުގައި، އެމް.ޑީ. ސަޢީދާއި ޓީމުން މި ކަންތައް ކޮށްދެމުން އެ އަންނަނީ، ސަރުކާރުގެ ސިޔާސަތުތައް ހަމަ އަކުރުން އަކުރަށް، އެ އޮތްގޮތަށް ފުއްދައިދެމުން. އެކަމަށްޓަކައި ފުރަތަމަވެސް ސަޢީދަށާއި، ފެނަކައިގެ ހީވާގި ޓީމަށް އަޅުގަނޑާއި ސަރުކާރުން ވަރަށް އިޚްލާޞްތެރިކަމާއެކުގައި ޝުކުރު އަދާކުރަން" ރައީސް ވިދާޅުވިއެވެ.

މާމެންދޫ އިންޖީނުގެވެސް ރައީސް އިބްރާހިމް މުޙައްމަދު ސޯލިހު ވަނީ ހުޅުއްވައިދެއްވާފައެވެ.

އިންޖީނުގެ ހުޅުވުމުގެ ރަސްމިއްޔާތުގައި ވާހަކަ ފުޅު ދައްކަވަމުން ރައީސް ސޯލިހު ވިދާޅުވީ، މި އިންޖީނުގޭގެ ސަބަބުން މާމެންދޫ ރައްޔިތުންނަށް އެތައް ގޮތަކުން ލުއި ފަސޭހަކަން ލިބިގެން ދާނެ ކަމަށާއި، ސަރުކާރުގެ އަމާޒަކީ އެއްވެސް ރަށެއް ބާކީ ނުކޮށް ހުރިހާ ރަށަކަށް ބޭނުންވާ އަސާސީ ކަންކަން ފުރިހަމަކޮށްދިނުން ކަމަށެވެ.

އަލަށް އިމާރާތް ކުރި މާމެންދޫ އިންޖީނުގެއަކީ 1400ގެ ކިލޯވޯޓުގެ ކެޕޭސިޓީ ހުރި އިންޖީނުގެއެކެވެ. ތޭވީސް އަހަރަށްފަހު، އަލަށް ހުޅުވި މި އިންޖީނުގެއަކީ ކުރީގެ އިންޖީނުގެއަށް ވުރެ ދެ ގުނަ ބޮޑު އިންޖީނުގެއެކެވެ.