އަރިޖިތު ސިންގް، މިއުޒިކީ ދާއިރާއަށް އެނބުރި އަންނަނީ ކަމަށް ދެކެވޭ ވާހަކަތައް ދޮގުކޮށްފި

އިންޑިޔާގެ މަޝްހޫރު ލަވަކިޔުންތެރިޔާ އަރިޖިތު ސިންގް އަލުން ބޮލީވުޑްގެ މިއުޒިކީ ދާއިރާއަށް އެނބުރި އައިކަމަށް ދެކެވޭ ވާހަކަތައް، އޭނާގެ މެނޭޖަރު ދޮގުކޮށްފިއެވެ.

މި ޚަބަރު ފެތުރެން ފެށީ، އަމާލް މަލިކް ކޮމްޕޯޒްކޮށް، އަރިޖިތު ސިންގް ކިޔާފައިވާ "އާވާރަޕަން 2" ގެ ޓައިޓަލް ލަވަ "ޔޭ އާވާރަޕަން" ރިލީޒްކުރުމާ ގުޅިގެންނެވެ.

މީގެ ކުރިން ލަވަކިޔުމުގެ ދާއިރާއިން ރިޓަޔަރ ކުރާނެކަން އިއުލާނުކޮށްފައިވާ އަރިޖިތު، މި ލަވައާއެކު އަލުން ޕްލޭބެކް ސިންގިންގްއަށް އެނބުރި އައީ ކަމަށް ގިނަ ފޭނުންތަކަކަށް ގަބޫލުކުރެވުނެވެ.

އަސަރުގަދަ މި ލަވަ ރިލީޒްވުމާއެކު ސޯޝަލް މީޑިއާ އާއި ސްޓްރީމިންގް ޕްލެޓްފޯމްތަކުގައި ބޮޑު މަގުބޫލުކަމެއް ވަނީ ހޯދާފައެވެ. އަރިޖިތުގެ ރީތި އަޑުން މި ލަވަ އަޑުއިވުމުން، އޭނާ އަލުން ދާއިރާއަށް އެނބުރި އައީ ކަމަށް ބަލައި ގިނަ ފޭނުންތަކެއް ވަނީ އެކަމަށް މަރުހަބާ ކިޔާފައެވެ.

މީގެ އިތުރުން، މިއީ 2007 ވަނަ އަހަރު ރިލީޒްކުރި އިމްރާން ހާޝްމީގެ މަޝްހޫރު ފިލްމު "އާވާރަޕަން" ގެ ސީކުއަލްއަކަށް ވާތީ، ގިނަ ބައެއްގެ މާޒީގެ ހަނދާންތައްވެސް މި ލަވައާ ވަނީ ގުޅިފައެވެ. ނަމަވެސް، އަރިޖިތު "ކަމްބެކް" އެއް ހެދިކަމަށް ދެކެވޭ ވާހަކަތައް އޭނާގެ މެނޭޖަރު މިހާރު ވަނީ ސާފުކޮށްދީފައެވެ.

އަރިޖިތު ސިންގްއާ ބެހޭގޮތުން ފެތުރެމުންދާ ޚަބަރުތައް އޭނާގެ މެނޭޖަރު މިހާރު ވަނީ ދޮގުކޮށްފައެވެ. މީޑިއާއާ ވާހަކަދައްކަމުން މެނޭޖަރު ސާފުކޮށްދިން ގޮތުގައި "އަވާރާޕަން 2" ގައި އަރިޖިތު ބައިވެރިވެފައިވަނީ ކުރިން ސޮއިކޮށްފައިވާ އެއްބަސްވުންތަކެއްގެ ދަށުންނެވެ.

އަދި އާ ފިލްމުތަކަށް ލަވަކިޔައިދިނުން ހުއްޓާލުމަށް އަރިޖިތު ނިންމާފައިވާ ނިންމުމަށް އެއްވެސް ބަދަލެއް އައިސްފައި ނުވާ ކަމަށާއި، އަލަށް ރިލީޒްކުރި ލަވައަކީ އޭނާ އަލުން އެ ދާއިރާއަށް އެނބުރި އައުން ކަމުގައި ބަލައިގެންނުވާނެ ކަމަށްވެސް މެނޭޖަރު ބުންޏެވެ. މި ބަޔާނާއެކު ސަޕޯޓަރުންނާއި މީޑިއާތަކުގެ މެދުގައި އުފެދިފައިވާ އޮޅުންބޮލުންތަކަށް ވަނީ ހައްލެއް ލިބިފައެވެ.

މެނޭޖަރުގެ މި ސާފުކޮށްދިނުމާ އެކުވެސް، މި ލަވައަށް އަންނަނީ ބޮޑު ތަރުހީބެއް ލިބެމުންނެވެ. ގިނަ ބަޔަކު ވަނީ އަރިޖިތުގެ އަސަރުގަދަ އަޑަށާއި، އަމާލް މަލިކްގެ ފުރިހަމަ މިއުޒިކަށް ތައުރީފުކޮށްފައެވެ.

މި ފިލްމުގެ ޓައިޓަލް ލަވައާއެކު، ބޮލީވުޑްގައި އެންމެ އިންތިޒާރު ކުރެވޭ އެއް ފިލްމު ކަމަށްވާ "އަވާރާޕަން 2" އަށް އޮތް އިންތިޒާރު ވަނީ އިތުރަށް ބޮޑުވެފައެވެ. ސަޕޯޓަރުން ތިބީ އިމްރާން ހާޝްމީ އަލުން މި ފްރެންޗައިޒުން ފެންނާނެ ވަގުތަކަށް ކެތްމަދުވެފައެވެ.

މި ލަވައާއެކު އަރިޖިތުގެ އަޑު އަލުން އަޑުއަހާލުމުގެ ފުރުސަތު ސަޕޯޓަރުންނަށް ލިބުނު ނަމަވެސް، މިއީ އޭނާ އަލުން ލަވަކިޔުމުގެ ދާއިރާއަށް ދާއިމީކޮށް އެނބުރި އައުން ކަމަކަށް ނުބެލެވެއެވެ.

މެނޭޖަރު ބުނި ގޮތުގައި އަރިޖިތު މިހާރު ފުރިހަމަ ކުރަމުންދަނީ މަސައްކަތުން ދުރުވާނެކަން އިއުލާން ކުރުމުގެ ކުރިން ސޮއިކޮށްފައިވާ މަސައްކަތްތަކެވެ. އަދި ކުރިއަށް އޮތް ތަނުގައި އޭނާ އިތުރު ފިލްމީ ލަވަތަކެއް ކިޔާނެކަމުގެ އެއްވެސް ރަސްމީ ކަށަވަރުކަމެއް މިހާތަނަށް ލިބިފައެއް ނުވެއެވެ.

އެހެންކަމުން، އަރިޖިތުގެ ފަރާތުން އިތުރު އިއުލާނެއް ކުރަންދެން، ސަޕޯޓަރުންނަށް މިވަގުތު އޮތީ "ޔޭ އަވާރާޕަން" ލަވައިން ހިތްހަމަޖެހުން ހޯދުމެވެ.