މިފްކޯއިން މަސްވެރިންނަށް 2 މިލިއަން ރުފިޔާ ދޫކޮށްފި

މިފްކޯއިން މަސްވެރިންނަށް ދެ މިލިޔަނަށް ވުރެ ގިނަ ރުފިޔާ ދޫކޮށްފިކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީގެ ތަފާސްހިސާބުން ދައްކައިފިއެވެ.

މިފްކޯގެ ތަފާސް ހިސާބުން ދައްކާ ގޮތުގައި މި ފައިސާއަކީ 1 އޭޕްރީލް ވަނަ ދުވަހު މަސްވެރިން މިފްކޯއަށް ކިރާފައިވާ މަހުގެ އަގަށްވާ ފައިސާއެވެ.

މިފްކޯއިން ބުނެފައިވަނީ، 3 އޭޕްރީލް އާ ހަަމައަށް މަސްވެރިންނަށް ދައްކަން ޖެހޭ ހުރިހާ ފައިސާއެއް ދައްކައި ނިމިފައިވާނެ ކަމަށެވެ.

އެގޮތުން 1 އޭޕްރީލް ވަނަ ދުވަހު 19 ދޯންޏަކުން މަސް ކިރާފައިވާ ކަމަށް މިފްކޯއިން ބުނެފައިވެއެވެ. އަދި އެ ދޯނިތަކަށް ޖުމްލަ 2،090،971 ރުފިޔާ ދޫކޮށްފައިވާ ކަމަށް ވެސް ވަނީ ބުނެފައެވެ.

މީގެ އިތުރުންވެސް މިއަހަރުގެ ފުރަތަމަ ތިން މަސް ދުވަހު މަސްވެރިންނަށް 379 މިލިޔަން ރުފިޔާ ދޫކޮށްފައިވާ ކަމަށް މިފްކޯގެ ތަފާސްހިސާބުތަކުން ވަނީ ދައްކާފައެވެ.

މަސްވެރިންނަށް ޤަވާއިދުން ފައިސާ ދޭން ފެށިފަހުން މިހާތަނަށް 409.1 މިލިޔަން ރުފިޔާ މަސްވެރިންނަށް ދޫކޮށްފައިވާކަމަށް މިފްކޯގެ ތަފާސްހިސާބުތަކުން ދައްކައެވެ.

މިއާއެކު މިއަހަރު ފުރަތަމަ ތިން މަސް ދުވަހު އެކަނިވެސް 379 މިލިޔަން ރުފިޔާ މަސްވެރިންނަށް ވަނީ ދޫކޮށްފައެވެ.

މިހާތަނަށް ކިރުވި މަހަށް މަސްވެރިންނަށް ދޫކޮށްފައިވާ ފައިސާ

1. ޖަނަވަރީ - 177 މިލިޔަން ރުފިޔާ
2. ފެބްރުއަރީ - 120 މިލިޔަން ރުފިޔާ
3. މާރިޗު - 81.9 މިލިޔަން ރުފިޔާ

މިދިޔަ މަހު މަސްވެރިންނަށް ދޫކުރި ފައިސާ އޭގެ ކުރީ މަހާ އަޅާބަލާއިރު ވަނީ ދަށްވެފައެވެ. ރޯދަމަހާ ދިމާކޮށް މަސްވެރިންނަށް ދޫކުރި ފައިސާ ދަށްވީ، އެވްރޭޖްކޮށް ރޯދަމަހު މަހަށް ނިކުތް ދޯނިފަހަރުގެ އަދަދު މަދުވީމަކަމައެވެ.

މިފްކޯއިން މަސްވެރިންނަށް ފައިސާ ދެމުންދަނީ އެކުންފުންޏާއި ބޭންކް އޮފް މޯލްޑިވްސް އަދި މާލީ ވުޒާރާގެ މެދުގައި ވެފައިވާ އެއްބަސްވުމެއްގެ ދަށުންނެވެ. މި އެއްބަސްވުމުގެ ދަށުން، މިފްކޯއިން މަސް އެކްސްޕޯޓް ކޮށްގެން ލިބޭ ބޭރުފައިސާ މާރުކުރަނީ ބޭންކަށެވެ.

ފަހުގެ ތާރީޚެއްގައި އެންމެ ގިނަ އަދަދަކަށް މިފްކޯއަށް މަސް ކިރުވާފައިވަނީ މިދިޔަ ފެބްރުއަރީ މަހުގެ 12ވަނަ ދުވަހުއެވެ. އެގޮތުން އެދުވަހު 546 ޓަނުގެ މަސް ކިރުވާފައިވެއެވެ. މިފްކޯއިން ވަނީ 48 މަސްދޯންޏަކަށް 7.6 މިލިޔަން ރުފިޔާ ދޫކޮށްފައެވެ.

މިފްކޯއިން މަސްވެރިންނަށް ޤަވާއިދުން 48 ގަޑިއިރު ތެރޭގައި ފައިސާ ދޫކުރަން ފަށާފައިވަނީ މިދިޔަ އަހަރުގެ މަސްވެރިންގެ ދުވަހާ ދިމާކޮށެވެ. މިއީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ވަޢުދުފުޅެކެވެ. މި ސަރުކާރުން މަސައްކަތް ކުރަނީ މަސްވެރިކަމުގެ ސިނާއަތް ކުރިއަރުވައި އެސްޓީއޯ ރޭޓުގައި މަސްވެރިންނަށް ތެޔޮ ލިބޭނެ އިންތިޒާމުތައް ހަމަޖެއްސުމަށެވެ.

މީގެ އިތުރުން، މަސްވެރިންނަށް ލުއިފަސޭހަ ގޮތްތަކެއް ހޯދައިދިނުމުގެ ގޮތުން، މަސްވެރިކަމުގެ ލޯނު ސްކީމްތައް ތައާރަފުކޮށް، މަސްވެރިކަމުގެ އާލާތްތައް އަގުހެޔޮކޮށް ލިބޭނެ މަގު ފަހިކޮށްދީފައިވެއެވެ. އަދި މަސްވެރިކަމުގެ ދާއިރާގައި ޒަމާނީ ޓެކްނޮލޮޖީ ބޭނުންކުރުމަށް ބާރުއަޅައި، މަސްވެރިންގެ ރައްކާތެރިކަމަށް އިތުރު ފިޔަވަޅުތައް އަޅަމުންދާކަން ފާހަގަކުރެވެއެވެ. މި ހުރިހާ ފިޔަވަޅުތަކަކީ ދިވެހި މަސްވެރިކަމުގެ ސިނާޢަތް ދެމެހެއްޓެނިވި ގޮތެއްގައި ތަރައްޤީކޮށް، މަސްވެރިންގެ ދިރިއުޅުމުގެ ފެންވަރު މަތިކުރުމަށް އަމާޒުކޮށްގެން އެޅޭ ފިޔަވަޅުތަކެކެވެ.