މި ސަރުކާރަކީ ރައްޔިތުންގެ ހާލަތު އެއް ދުވަހުން އަނެއް ދުވަހަށް ބަދަލުކުރުމަށްޓަކައި، ރައްޔިތުންނަށް ދެވޭ ޚިދުމަތުގެ ފެންވަރު ރަނގަޅުކުރުމަށްޓަކައި ކެނޑިނޭޅި މަސައްކަތްކުރަމުންދާ ސަރުކާރެއް ކަމަށް ދާޚިލީ ސަލާމަތާއި ފަންނިޔަތާއި ބެހޭ ވަޒީރު އަލީ އިހުސާނު ވުދާޅުވެއްޖެއެވެ.
ވަޒީރު މިފަދައިން ވިދާޅުވީ ރޭ ތައާރަފް ކުރި ކުއްލި ހާލަތުގައި ގުޅޭނެ ނަމްބަރު 911 އިފްތިތާހް ކުރި ރަސްމިއްޔާތުގައި ވާހަަކަފުޅު ދައްކަވަމުންނެވެ.
ވަޒީރު ވިދާޅުވީ ރައީސް ޑރ މުހައްމަދު މުއިއްޒު ކޮންމެ ދުވަހަކުވެސް ހުރިހާ ވުޒާރާތަކަށް އަދި އިދާރާތަކަށް ރައްޔިތުންނަށްދޭ ހިދުމަތުގެ ފެންވަރު ރަނގަޅުކުރުމަށް މަސައްކަތްކުރުމަށް އިރުޝާދުދެއްވާ ކަމަށެވެ.
"ރައީސް ޑރ މުހައްމަދު މުއިއްޒުގެ ވެރިކަމުގައި ވަރަށް ކުރީކޮޅު، މި މައްސަލަ އަކީ އަޅުގަނޑުމެން ދިވެހިން ތަހައްމަލު ކުރަމުންސާ މައްސަލައަކަށްވުމުން، އެހިނދުން ފެށިގެން އެއް ނަމްބަރެއްގެ ޒަރީއާއިން ރައްޔިތުންނަށް ދިނުމަށް ރައީސް ނިންމަވައި، ރާއްޖޭގެ ކެބިނެޓް އިން އެ ޑިޒިޝަން ނަންގަވައި، އަޅުގަނޑުމެން ސަލާމަތީ ޚިދުމަތްދޭ މުއައްސަސާތަކާއި ހަވާލުވެ ތިބި ވުޒާރާތަކަށް މި ޚިދުމަތް ތައާރަފްކުރުމަށް އިންސްޓްރަކްޝަންސް ދެވުނު." ވަޒީރު
ވަޒީރު ވިދާޅުވީ ދިވެހި ފުލުހުންގެ ޚިދުމަތުގެ ތެރޭގައި މި ޚިދުމަތް ގާއިމްކުރެވިގެން އަންނަ އިރުގައި ފުލުހުންގެ ޚިދުމަތާއި އެމްބިއުލާންސްގެ ޙިދުމަތާއި، އެމްއެންޑީއެފްގެ ކޯސްޓްގާޑްގެ ޙިދުމަތް އަދި ފަޔަރ އެންޑް ރެސްކިއު ސާވީސްގެ ޚިދުމަތްތަވެސް މި ނިމްބަރުގެ ތެރެއިން ދިވެހިންނަށް ލިބިގެން ދާނެ ކަމަށެވެ.
ކުއްލި ހާލަތުގައި ގުޅުމަށް ހަމަޖައްސަވާފައިވާ 911 ނަމްބަރަކީ ވަރަށް އާންމު ނަމްބަރެއް ކަމަށާއި ހަނދާންކުރަން ފަސޭހަ ނަމްބަރެއްކަން ވަޒީރު ފާހަގަކުރެއްވިއެވެ.
ވަޒީރު ވިދާޅުވީ މި ޚިދުމަތް ތައާރަފްވެގެން މި އަންނަނީ ބޭނުންވާ އެންމެ ފުރިހަމަ ލެވެލްއަކުން ނޫންކަމަށެވެ. އެހެންނަމަވެސް ރައްޔިތުންނަށް މިވަގުތަށް ބޭނުންވާ ލެވެލް ހިދުމަތް ލިބޭނެކަމަށް ވަޒީރު ވިދާޅުވިއެވެ.
ވަޒީރު ވިދާޅުވީ ހުރިހާ އިދާރާތަކާއި ގުޅިގެން މި ހިދުމަތް އިތުރަށް ފުޅާކޮށް، ރައްޔިތުންނަށް މިއަށް ވުރެ ފުރިހަމައަށް މި ހިދުމަތް ދޭނެ ގޮތްތަކެއް ހޯއްދަވާނެ ކަމަށެވެ.
"އެގޮތުން ކޮމިއުނިކޭޝަން ސިސްޓަމް އެޑްވާންސްކޮށް، ޖީއައިއެސް މެޕްކުރެވޭނެ ނިޒާމަކަށް ބަދަލުކޮށް އަދި ޑިސްޕެޗް ސޮފްޓްވެއާ ވެސް ހރިހާ ދިމާލަކަށް ފޯރާ ގޮތަށް. ރެސްޕޯންސް ޓައިމްސް މިއަށވުރެ، ނުވަތަ ހާދިސާއާ ހިސާބަށް ދެވޭނޭ ވަގުތު މިއަށްވުރެ ކުޑަ ކުރުމަށްޓަކައި، އިތުރު މަސައްކަތްތަކެއް ކުރާނަން." ވަޒީރު
ވަޒީރު އިތުރަށް ވިދާޅުވީ ކޯލް ސެންޓަރުގައި ހިދުމަތްދޭ މުވައްޒަފުންގެ ކެޕޭސިޓީ އިތުރުކުރުމަށް ރާއްޖެއިންނާއި ރާއްޖެއިން ބޭރުން ތަމްރީނު ހޯދާނެ ކަމަށެވެ. އަދި މި ހިދުމަތުގެ ފެންވަރު ދުވަހެއް ދުވަހަކަށް ރަނގަޅުވަމުން ދާނެކަމުގެ ޔަގީންކަން ވަޒީރު ވަނީ ދެއްވާފައެވެ.
އެމާޖެންސީ ހާލަތުގައި ބޭނުން ކުރަން ހާއްސަކޮށްފައިވާ 911 އަކީ އެ ބޭނުންވާ މީހާއަށް ހިދުމަތް ދެވޭނެ ގޮތަށް އޮންނަ ނަމްބަރަކަށްވާއިރު، ޕްރޭންކް ކޯލް ކުރުމާއި، ނުގުޅަން ޖެހޭ ހާލަތްތަކުގައި މި ނަމްބަރުތަަކަށް ގުޅުމަކީ އެފަދަ ހިދުމަތް ދޭން އޮތް މަގަށް އެޅޭ ވަރަށް ބޮޑު ހުރަހެއް ކަމަށް ވަޒީރު ވިދާޅުވިއެވެ.
