ހުޅުމާލޭ ފޭސް ދޭއްގެ ހިޔާ ފްލެޓްތަކުގެ ނުވަވަނަ ޓަވަރުގައި ރަހީނުކޮށްފައި ހުރި މީހާ ފުލުހުން ސަލާމަތްކޮށްފިއެވެ.
ފޭސްދޭއްގެ ހިޔާގެ ނުވަވަނަ ޓަވަރުގައި މީހަކު ރަހީނުކޮށްފައިވާ ކަމަށް ފުލުހުންގެ އިދާރާއަށް ލިބުނު ރިޕޯޓަކާއި ގުޅިގެން، އެ އިދާރާއިން ޚާއްސަ އޮޕަރޭޝަނެއް ފަށާފައިވަނީ ބުރާސްފަތިދުވަހުގެ ރޭ އިރާކޮޅެއެވެ.
ރަހީނުކޮށްފައިހުރި މީހާ ފުލުހުން ސަލާމަތްކޮށްފައިވަނީ، އޭނާ ރަހީނުކޮށްފައި ހުރި ހިޔާގެ ނުވަވަނަ ޓަވަރުގެ 20 ވަނަ ފަންގިފިލާގައި ހުރި 11 ވަނަ އެޕާރޓްމެންޓްގެ ދޮރު ވައްޓާލައިގެން ވަދެއެވެ. ފުލުހުންގެ ވަނީ އެތަނަށް ވަދެ ރަހީނުކޮށްފައިވާ މީހާ، ފުލުހުންގެ ހިމާޔަތަށް ގެނެސްފައެވެ.
މައުލޫމާތު ލިބިފައިވާ ގޮތުގައި ފުލުހުން އެ އެޕާރޓްމެންޓަށް ވަންއިރު، ރަހީނުކޮށްފައިވާމީހާގެ ބޯބާލައި، އެ މީހުން ތިބީ އޭނާގެ އިނގިލި ބުރިކުރަން ތައްޔާރުވެގެންނެވެ.
ރަހީނުކޮށްފައި ހުރީ ދިވެހި ފިރިހެނެކެއެވެ. އަދި އެ މީހާ އާއި ބެހޭ އެއްވެސް މައުލޫމާތެއް ފުލުހުންގެ އިދާރާއިން ހާމަކޮށްފައެއް ނުވެއެވެ.
ފުލުހުން އެ އެޕާރޓްމެންޓަށް ވަންއިރު، އެ ތާގައި 12 މީހުން ތިއްބެއެވެ. އަދި އެ 12 މީހުން މިހާރު ވަނީ ފުލުހުންގެ ބެލުމުގެ ދަށަށް ގެނެސްފައެވެ. ފުލުހުންގެ ޚާއްސަ އޮޕަރޭޝަން ކުރިއަށް ދިޔަވަގުތު ހޯމްލޭންޑް ސެކިއުރިޓީ، އެންޑް ޓެކްނޮލޮޖީ މިނިސްޓަރު އަލީ އިހުސާން އެ ސަރަހައްދަށް ވަޑައިގެންފައިވެއެވެ.
