އ.ދ.ގެ ބައިނަލްއަޤްވާމީ އެންޓި-ކޮރަޕްޝަން ކޮންފަރެންސްގައި އޭސީސީން ބައިވެރިވާން ނިންމައިފި

އެންޓި-ކޮރަޕްޝަން ކޮމިޝަން (އޭ.ސީ.ސީ) އިން އ.ދ.ގެ ކޮރަޕްޝަނާ ދެކޮޅަށް އެކުލަވާލާފައިވާ ކޮންވެންޝަން (އުންކެކް) ގެ ދައުލަތްތަކުގެ ފަރާތްތަކުގެ ބައްދަލުވުން (ކޮސްޕް11) ގައި ބައިވެރިވުމަށް ނިންމައިފިއެވެ.

މި ކޮންފަރެންސް ބޭއްވުމަށް ހަމަޖެހިފައިވަނީ 2025 ވަނަ އަހަރުގެ ޑިސެންބަރު މަހުގެ 15 އިން 19 އަށް ޤަތަރުގެ ދޯހާގައެވެ. މިއީ ދުނިޔޭގެ ފެންވަރުގައި ކޮރަޕްޝަނާ ދެކޮޅަށް ކުރާ މަސައްކަތްތައް ހަރުދަނާކުރުމަށް ލިބޭ މުހިންމު ފުރުސަތެކެވެ.

ކޮންމެ ދެ އަހަރަކުން އެއްފަހަރު ބާއްވާ މި ކޮންފަރެންސް އިންތިޒާމުކުރަނީ އ.ދ.ގެ މަސްތުވާތަކެއްޗާއި ކުށާ ދެކޮޅަށް މަސައްކަތްކުރާ އޮފީސް (ޔޫ.އެން.އޯ.ޑީ.ސީ) އާއި ޤަތަރު ގުޅިގެންނެވެ. ކޮސްޕް11 އަކީ އުންކެކްއާ ގުޅޭގޮތުން ނިންމުންތައް ނިންމާ މައިގަނޑު ފޯރަމެވެ. މި ބައްދަލުވުމުގައި ދައުލަތްތަކުގެ ފަރާތްތަކާއި، ބައިނަލްއަޤްވާމީ ޖަމިއްޔާތަކާއި، ސިވިލް ސޮސައިޓީގެ ފަރާތްތައް އެއްވެ، ކޮރަޕްޝަނާ ދެކޮޅަށް ކުރެވޭ މަސައްކަތުގެ ކުރިއެރުންތައް ވަޒަންކޮށް، ޤަރާރުތައް ފާސްކޮށް، ބައިނަލްއަޤްވާމީ އެއްބާރުލުން އިތުރުކުރުމަށް މަސައްކަތްކުރެއެވެ.

ކޮސްޕް11 ގައި، ބައިވެރިވާ ދައުލަތްތަކުން އުންކެކްގެ އެންގުންތައް ތަންފީޒުކުރާ މިންވަރު މުރާޖަޢާކޮށް، އެންމެ ރަނގަޅު އުސޫލުތައް ހިއްސާކޮށް، ދުނިޔޭގެ ފެންވަރުގައި ކޮރަޕްޝަނާ ދެކޮޅަށް އަޅާ ފިޔަވަޅުތައް ވަރުގަދަ ކުރުމުގެ ސްޓްރެޓެޖީތަކާ ގުޅޭގޮތުން މަޝްވަރާކުރާނެއެވެ. މީގެ އިތުރުން، މި ކޮންފަރެންސަކީ ސިވިލް ސޮސައިޓީއާއި ޕްރައިވެޓް ސެކްޓަރ ހިމެނޭ ގޮތަށް، ޓެކްނިކަލް އެހީތެރިކަން ފޯރުކޮށްދިނުމާއި، ޤާބިލުކަން އިތުރުކުރުމަށް ލިބޭ މުހިންމު ފުރުސަތެކެވެ.

މި މުޙިންމު އިވެންޓުގައި އެންޓި-ކޮރަޕްޝަން ކޮމިޝަންގެ އިތުރުން، މިނިސްޓްރީ އޮފް ފިނޭންސް އެންޑް ޕްލޭނިންގް އަދި އެން.ޖީ.އޯތަކުގެ ފަރާތްތައް ބައިވެރިވުމަށް ވަނީ ހަމަޖެހިފައެވެ. އޭސީސީ އިން ބުނިގޮތުގައި ކޮސްޕް11 ގައި ބައިވެރިވުމުގެ މައިގަނޑު މަޤްޞަދުތަކަކީ ބައިނަލްއަޤްވާމީ ގުޅުން ވަރުގަދަކުރުމާއި، އެހެނިހެން ޤައުމުތަކުގެ ޓެކްނިކަލް އެހީތެރިކަން ހޯދުމާއި، ކޮމިޝަނުން ކޮރަޕްޝަނާއި ދެކޮޅަށް ކުރާ މަސައްކަތް ހިއްސާކުރުމާއިއެކު ދުނިޔޭގެ ފެންވަރުގައި ކޮރަޕްޝަނާ ދެކޮޅަށް ކުރާ މަސައްކަތްތައް އިތުރަށް ހަރުދަނާކުރުމެވެ.