ކޮންސްޓްރަކްޝަން މިނިސްޓްރީން ހިންގާ މަޝްރޫތައް އޮޑިޓްކުރުމުގެ މަސައްކަތް ހަރުދަނާކުރުމަށް މަޝްވަރާކޮށްފިއެވެ.
ކޮންސްޓްރަކްޝަން މިނިސްޓަރ ޑރ. އަބްދުﷲ މުއްތަލިބާއި އޮޑިޓާ ޖެނެރަލް ހުސައިން ނިޔާޒީ މިއަދު ބައްދަލުކުރައްވާފައިވާ ކަމަށެވެ. އެ ބައްދަލުވުން ބޭއްވީ މިނިސްޓްރީ އޮފް ކޮންސްޓްރަކްޝަންގައެވެ.
އެ ބައްދަލުކުރެއްވުމުގައި މިނިސްޓަރ އޮފް ސްޓޭޓް އިބްރާހިމް ޠާޢާމް މުހައްމަދުގެ އިތުރުން އޮޑިޓާ ޖެނެރަލް އޮފީހުގެ އިސް ބޭފުޅުން ވެސް ބައިވެރިވަޑައިގެންނެވިއެވެ.
އެ މިނިސްޓްރީން ބުނީ އެ ބައްދަލުވުމުގައި މައިގަނޑު ގޮތެއްގައި މަޝްވަރާކުރެއްވީ މިނިސްޓްރީން ހިންގާ މަޝްރޫއުތައް އޮޑިޓް ކުރުމުގެ މަސައްކަތް ހަރުދަނާކަމާއެކު ވިލަރެސްކޮށް، ކުރިއަށް ގެންދާނެގޮތްތަކާ ބެހޭގޮތުން ކަމަށެވެ.
އެކަމުގެ މުހިންމުކަން ފާހަގަކުރައްވަމުން މިނިސްޓަރު ޑރ. މުއްތަލިބް ވިދާޅުވީ ސަރުކާރުގެ މަޝްރޫއުތައް ހިންގުމުގައި ދައުލަތުގެ މާލިއްޔަތު ގަވާއިދާ އެއްގޮތަށް އަމަލުކުރުމަކީ ވަރަށް މުހިންމު ކަމެއް ކަމުގައެވެ.
އޮޑިޓަރ ޖެނެރަލް ހުސައިން ނިޔާޒީ ބައްދަލުވުމުގައި ވިދާޅުވީ، މިނިސްޓްރީގެ މަޝްރޫއުތައް އޮޑިޓްކުރުމުގައި އޮޑިޓާ ޖެނެރަލްގެ އޮފީހުން ފުރިހަމަ އެއްބާރުލުން ދޭނެ ކަމަށް މިނިސްޓްރީން ވިދާޅުވިއެވެ. އަދި އެކަމުގައި ދެފަރާތުން ގުޅިގެން މަސައްކަތްކުރުމުގެ މުހިންމުކަން ވެސް ފާހަގަކުރެއްވި ކަމަށެވެ.
އެ ބައްދަލުވުމަކީ ދެފަރާތުގެ މެދުގައި އޮންނަ ގުޅުން އިތުރަށް ބަދަހިކޮށް، މަސައްކަތްތައް ހަރުދަނާކުރުމަށް މަގުފަހިވާނެ ބައްދަލުވުމެއް ކަމުގައި މިނިސްޓްރީން ބުނެއެވެ.
