ޕީޕަލްސް ނޭޝަނަލް ކޮންގްރެސް - ޕީއެންސީއަށް 65،000 އަށްވުރެ ގިނަ މެމްބަރުން ހަމަކޮށްފިއެވެ.
ސަރުކާރު ހިންގާ މައި ޕާޓީން ކުރިއަށްގެންދާ މެމްބަރުން އިތުރުކުރުމުގެ ހަރަކާތްތަކުގެ ތެރެއިން، މިއަދު މާލޭގައި ފެށި ހަރަކާތް ފެށުމުގެ ކުރިން އަސްލު ޓީވީއާ ވާހަކަދައްކަވަމުން، ސަރުކާރު ހިންގާ މައި ޕާޓީ - އަދި ރައްޔިތުންގެ މަޖިލީހުގެ މެޖޯރިޓީ ޕާޓީގެ ޕީޖީ ލީޑަރު އިބްރާހީމް ފަލާޙް ވިދާޅުވީ، ފާއިތުވި ދެ މަހެއްހާ ދުވަހުގެ ތެރޭގައި ކުރި މަސައްކަތުން ޕީއެންސީއަށް 65،000 އަށްވުރެ ގިނަ މެމްބަރުން ހަމަކުރެވިފައިވާ ކަމަށެވެ.
ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު ފަލާޙް ވަނީ މިމަސައްކަތަކީ ރައީސް ޑރ. މުޙައްމަދު މުޢިއްޒުގެ އިރުޝާދާއި ލަފާފުޅާ އެއްގޮތަށް، އެމަނިކުފާނު އެދިވަޑައިގަންނަވާ ގޮތަށް ކުރިއަށް ގެންދާ ހަރަކާތަކެއް ކަމަށާއި ރައީސް އެދިވަޑަައިގަންނަވާފައިވަނީ މިއަންނަ ނޮވެމްބަރުގެ ނިޔަލަށް 75،000 މެމްބަރުންގެ ޕާޓީއަކަށް އެ ޕާޓީ ހެދުން ކަމަށެވެ.
މެމްބަރު ފަލާޙް ވިދާޅުވީ، މި މަސައްކަތުގައި ރައްޔިތުންގެ މަޖިލީހުގެ މެމްބަރުންނާއި ޕާޓީގެ ލީޑަރޝިޕާއި ކަމާ ގުޅުންހުރި ފަރާތްތަކުން ވަރަށް ބުރަކޮށް މަސައްކަތްކުރަމުންގެންދާ ކަމަށެވެ. ނޮވެމްބަރުމަހުގެ މެދު ތެރޭގައި ރައީސްގެ އަމާޒަށް ވާަސިލުވެވޭނެ ކަމަށް ބެލެވޭ ކަމަށް މެމްބަރު ފަލާޙް ވިދާޅުވިއެވެ.
މާލޭގެ ހަތް ދާއިރާއެއްގައި މެމްބަރުން އިތުރުކުރުމުގެ ހަރަކާތް ކުރިއަށް ގެންދިއުމުގެ ގޮތުން، ހަަރަކާތް ފެށުމަށް މާލޭގެ ހެންވޭރުގައި ހުންނަ "ކޮންގްރެސް ހައުސް"އަށް ޖަމާވި ގިނަ އަދަދެއްގެ ޕީއެންސީގެ މެމްބަރުންނަށް އިޝާރާތްކުރައްވައި މެމްބަރު ފަލާޙްވަނީ، ހަރަކާތުގެ ބައިވެރިންނާއެކު ޕާޓީގެ މައިޖަގަހަ ފުރިފައިވާކަން ފާހަގަކުރައްވާފައެވެ.
މާލޭގެ އިތުރުން މިއަދު އައްޑޫ އަތޮޅާއި، ބ. އަތޮޅާއި ބައެއް އެހެން އަތޮޅުތަކުގައިވެސް ހަރަކާތްތައް ކުރިއަށް ގެންދާނެ ކަމަށް މެމްބަރު ފަލާހް ވިދާޅުވިއެވެ.
"އަސްލު" ޓީވީއަށް ދެއްވި އިންޓަރވިއުއެއްގައި ޕީއެންސީގެ މިހަރަކާތުގައި އިސްކޮށް ހަރަކާތްތެރިވެ ވަޑައިގަންނަވާ ރައްޔިތުންގެ މަޖިލީހުގެ ވިލިމާލޭ ދާއިރާގެ މެންބަރު މުހައްމަދު އިސްމާއީލް ވިދާޅުވެފައިވަނީ، ރައީސް ޑރ. މުއިއްޒުގެ ލަފާފުޅާއި އިރުޝާދާ އެއްގޮތަށް، ކޮންމެ ހަފުތާއަކު ވެސް ރާއްޖޭގެ ހުރިހާ ސިޓީތަކެއްގައި، މެމްބަރޝިޕް އިތުރުކުރުމުގެ ހަރަކާތްތަކެއް ހިންގަން ރާވާފައިވާ ކަމަށެވެ. އަދި މަދުވެގެން ކޮންމެ ހަފުތާއަކު އެއް ދުވަހު ސިޓީތަކުގައި މި ހަރަކާތް ކުރިއަށް ގެންދާނެކަން މެމްބަރު ފާހަގަކުރެއްވިއެވެ.
ނޮވެމްބަރު މަހުގެ ނިޔަލަށް އެ ޕާޓީއަށް 75،000 މެމްބަރުން ހަމަކުރުމަކީ ޕީއެންސީގެ މިހަރަކާތުގެ އަމާޒެކެވެ.
ޕީއެންސީއަކީ ވެރިކަމަށް އައުމުގެ ކުރިން މެމްބަރުން މަދު ކުޑަ ޕާޓީއެއް ނަމަވެސް، މިވަގުތު އެ ޕާޓީއަކީ މެމްބަރުން ގިނަ، ރާއްޖޭގެ އެންމެ ކާމިޔާބު އެއް ސިޔާސީ ޕާޓީއެވެ.
