ލޯކަލް ކައުންސިލް އިންތިހާބަށް ތައްޔާރުވުމުގެ ގޮތުން ފުލުހުންގެ އޮޕަރޭޝަނެއް ފަށައިފި

އޭޕްރިލް 4 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބާ ގުޅިގެން، ފުލުހުން ކުރިއަށްގެންދާ "އޮޕަރޭޝަން ބްލޫ ރޭ" ރަސްމީކޮށް ފަށައިފިއެވެ.

މި އޮޕަރޭޝަން އިފްތިތާހުކުރުމަށް މިއަދު ހަވީރު އިސްކަންދަރު ބިލްޑިންގގައި ބޭއްވި ހާއްސަ ރަސްމިއްޔާތު ޝަރަފުވެރިކޮށްދެއްވީ ޑެޕިއުޓީ ކޮމިޝަނަރު އޮފް ޕޮލިސް ފަރުހާދު ފިކުރީއެވެ.

އޮޕަރޭޝަން ފައްޓަވައިދެއްވަމުން ޑެޕިއުޓީ ކޮމިޝަނަރު ދެއްކެވި ވާހަކަފުޅުގައި، އިންތިހާބުގެ ސަލާމަތީ ކަންކަން ބެލެހެއްޓުމުގައި ހަރަކާތްތެރިވާ ފުލުހުންނަކީ ނަމޫނާ ބަޔަކަށް ވާންޖެހޭނެ ކަމަށް ވިދާޅުވިއެވެ. އަދި އާންމު ރައްޔިތުންނާ މުއާމަލާތްކުރުމުގައި ރީތި އަހުލާގާއި އޯގާތެރިކަން އިސްކުރުމަށާއި، ނުތަނަވަސް ހާލަތްތަކުގައިވެސް ކެތްތެރިކަމާއެކު ވާހަކަދައްކައިގެން މައްސަލަތައް ހައްލުކުރުމަށް އިރުޝާދު ދެއްވިއެވެ.

މީގެއިތުރުން، އިންސާނީ ހައްގުތަކަށް ފުރިހަމައަށް އިހުތިރާމުކޮށް، ކޮންމެ ފަރުދެއްގެވެސް ކަރާމާތް ހިމާޔަތްކުރުމަކީ ފުލުހުންގެ ފަންނީ ގާބިލުކަން ހާމަވާނެ ކަމެއް ކަމަށާއި، މިއީ ގައުމީ ފެންވަރުގައި ކުރެވޭ އިހުލާސްތެރި މަސައްކަތެއްކަން އެމަނިކުފާނު ފާހަގަކުރެއްވިއެވެ.

ޑެޕިއުޓީ ކޮމިޝަނަރު އިތުރަށް ވިދާޅުވީ، ދިމިގްރާތީ ނިޒާމެއްގައި ފުލުހުންގެ މަސްއޫލިއްޔަތަކީ ހަމައެކަނި ގާނޫނު ތަންފީޒުކުރުން ނޫން ކަމަށާއި، ރައްޔިތުންގެ ސަލާމަތާއި އަމާންކަން ކަށަވަރުކޮށްދީ، ރައްކާތެރިކަމުގެ އިހުސާސް ރައްޔިތުންނަށް ފޯރުކޮށްދިނުން ކަމަށެވެ. އަދި ފުލުހުންގެ ހިތްވަރާއި ގާބިލުކަމާއެކު މި އޮޕަރޭޝަނަކީ ކާމިޔާބު އަދި އަމާން އޮޕަރޭޝަނަކަށް ވާނެކަމުގެ ފުރިހަމަ ޔަގީންކަން އެބައޮތް ކަމަށްވެސް ފަރުހާދު ވިދާޅުވިއެވެ.

ރަށްރަށުގައި ތިބި ފުލުހުން އޮންލައިންކޮށް ބައިވެރިވި މި ބްރީފިންގއާ އެކު، ދިވެހި ފުލުހުންގެ ހިދުމަތުގެ އޮޕަރޭޝަނަލް ސްޓޭޓަސް މިހާރު ވަނީ ލެވެލް 2 އަށް މަތިކޮށްފައެވެ.