ރާއްޖޭގައި ކުއްލި ހާލަތުގައި ގުޅާނެ ނަމްބަރު 911، ނޭޝަނަލް އެމަރޖެންސީ ކޯލް ސެންޓަރު އިފްތިތާޙްކޮށްފިއެވެ.
އިސްކަންދަރު ކޮށީގައި ރޭ ބޭއްވި ރަސްމިއްޔާތުގައި މި ހިދުމަތް އިފްތިތާޙް ކޮށްދެއްވީ ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާނެވެ.
ރޭގެ ރަސްމިއްޔާތުގައި ވާހަކަފުޅު ދައްކަވަމުން ޕޮލިސް ކޮމާންޑް އެންޑް ކޮންޓްރޯލްގެ ހެޑް ސުޕްރިޓެންޑެންޓް އޮފް ޕޮލިސް އަހްމަދު އަލީ ވިދާޅުވީ މީގެކުރިން ކުއްލި ހާލަތުގައި ގުޅަނީ ތަފާތު އެކި ނަމްބަރުތަކަށް ކަމަށެވެ. އަދި 911 އިފްތިތާހު ކުރުމާއެކު ވަރަށް ބޮޑު ފަސޭހަ ތަކެއް ލިބިގެންދާނެ ކަމަށާއި ކުރިން ހިދުމަތް ދިނުމުގައި ދިމާވި ތަފާތު ގޮންޖެހުންތަކާއި އުނދަގޫތަކަށް ނިމުމެއް އަަންނާނެ ކަމަށެވެ.
"އެއް ނަމްބަރެއް މެދުވެރިކޮށް ރައްޔިތުންނަށް ގިނަ ޚިދުމަތްތަކެއް ފަހިވެގެންދާނޭ ކަމަށް އަޅުގަނޑު ގަބޫލުކުރަން. ހަމަމިއާއެކު މި މަސައްކަތް ފުރިހަމައަށް ވުޖޫދުވެގެން އައުމަށް މެދުވެރިވި އެއް ސަބަބަކީ އަޅުގަނޑުމެންގެ ސްޓްރެޓީޖިކް ޕްލޭންގައިވެސް އަޅުގަނޑުމެން އެއް ގޯލް އެއީ ކޯލް ސެންޓަރެއް އަދި އެމަރޖެންސީ ޚިދުމަތްތައް އަވަސްކަމާއި ފަހިކަމާއެކު ފޯރުކޮށްދިނުން." ޕޮލިސް ކޮމާންޑް އެންޑް ކޮންޓްރޯލްގެ ހެޑް ސުޕްރިޓެންޑެންޓް އޮފް ޕޮލިސް އަހްމަދު އަލީ
އިމަޖެންސީ ޚިދުމަތްތައް އެއް ނަންބަރެއްގެ ދަށުން ލިބޭނެ ގޮތް ހަމަޖެއްސެވުމަކީ ރައީސް ޑރ މުހައްމަދު މުއިއްޒުގެ ރިޔާސީ ވައުދުފުޅެކެވެ.
