ގަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލައަށް ދާއިމީ ހައްލެއް ހޯދުމަށް ކުރާ މަސައްކަތުގެ ދަށުން، ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ފެށި އޮޕަރޭޝަން ކުރަނގި އީދު ބަންދަށް ފަހު ކ. މާފުށީގައި އަނެއްކާވެސް ފަށައިފިއެވެ.
އެކި މަރުހަލާތަކަށް ބަހާލައިގެން ކުރިއަށްގެންދާ މި އޮޕަރޭޝަންގެ ފުރަތަމަ މަރުހަލާގައި ރާއްޖޭގައި ތިބި ހުރިހާ ބިދޭސީންގެ ހުރިހާ މައުލޫމާތެއް އެއްކުރުމަށް ވަނީ ނިންމައިފައެވެ. މި އޮޕަރޭޝަންގައި ބިދޭސީ މަސައްކަތްތެރިންގެ ބަޔޮމެޓްރިކް ޑާޓާ ނަގައި އެ މައުލޫމާތު ބަލަހައްޓާ، ސިސްޓަމަށް އަޕްލޯޑް ކުރަމުންގެންދާނެއެވެ.
ރާއްޖޭގެ ފަސް ސަރަހައްދެއްގައި ވަރަށް އަވަހަށް ބިދޭސީންގެ ބަޔޮމެޓްރިކް ޑާޓާ އެއްކުރުމުގެ މަސައްކަތް ފަށާނެ ކަމަށް ދާޚިލީ ވަޒީރު ޢަލީ އިޙްސާން މީގެ ކުރިން ވަނީ ވިދާޅުވެފައެވެ.
ވަޒީރު ވިދާޅުވީ މުޅި ރާއްޖޭގައި ފަށާ މި މަސައްކަތުގެ އަމަލީ މަސައްކަތުގެ ފުރަތަމަ ބައިގެ މުޅި މަސައްކަތް ނިންމަން އަމާޒު ކަނޑައަޅާފައި ވަނީ ތިން އަހަރު ދުވަހުން ކަމަށެވެ. އެގޮތުން, ފުރަތަމަ ބައިގެ މަސައްކަތް ނިންމަން އަމާޒު ހިފާފައި ވަނީ އެއް އަހަރު ދުވަހުން ކަމަށާއި، އެ މުއްދަތުގައި މަސައްކަތްކުރާނީ ގަވައިދާ ހިލާފަށް އުޅޭ ބިދޭސީން ނިޒާމުގެ ތެރެއަށް ވެއްދުމަށް ކަމަށް ވިދާޅުވިއެވެ.
މާފުށީގައި ދިރިއުޅޭ ބިދޭސީންގެ މަޢުލޫމާތު އެއްކުރުމުގެ މަސައްކަތްތައް މިމަހުގެ 29ވަނަ ދުވަހުގެ ނިޔަލަށް ނިންމާލުމަކީ އެ ވުޒާރާގެ އަމާޒެކެވެ.
