މި ސަރުކާރަކީ ހާމަކަންބޮޑު، މާލީގޮތުން ޒިންމާދާރު ސަރުކާރެއް: ޕީއެންސީ

ރައީސުލްޖުމްހޫރިއްޔާ ޑޮކްޓަރު މުހައްމަދު މުއިއްޒުގެ ސަރުކާރަކީ ހާމަކަންބޮޑު، މާލީގޮތުން ޒިންމާދާރު ސަރުކާރެއްކަމަށް، ސަރުކާރު ހިންގާ މައި ޕާޓީ ޕީޕަލްސް ނެޝަނަލް ކޮންގްރެސް - ޕީއެންސީން ބުނެފިއެވެ.

އެ ޕާޓީން މިއަދު ނެރުނު ނޫސްބަޔާނެއްގައި ބުނީ، ފާއިތުވެދިޔަ އެއް އަހަރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސަރުކާރު ހިންގަވާފައިވަނީ ޒިންމާދާރުކަމާއެކު ރައްޔިތުންގެ މާލިއްޔަތަށް އަމާނާތްތެރިވުމާއެކު، ހާމަކަންބޮޑުގޮތެއްގައި ރައްޔިތުންނަށް ހުރިހާ މައުލޫމާތެއް ފޯރުކޮށްދީގެން ކަމަށެވެ.

އެގޮތުން ދައުލަތުގެ ހަރަދުތައް ކުޑަކުރުމަށް 2024 ވަމަ އަހަރު ސަރުކާރުން އެޅި ފިޔަވަޅުތަކުގެ ސަބަބުން އަހަރުން އަހަރަށް ހަލުވިކޮށް ބޮޑުވަމުންއައި ހަރަދުތައް ކޮންޓުރޯލް ކުރެވުނު ކަމަށެވެ.

ފާއިތުވި ތިން އަހަރު އެވްރެޖްކޮށް ކޮންމެ އަހަރަކު 15 އިންސައްތައިން ދައުލަތުގެ ހަރަދުތައް އިތުރުވަމުންދިޔަ ނަމަވެސް ނިމުނު އަހަރާއި އަޅާބަލާއިރު މިއަހަރުގެ ދައުލަތުގެ ހަރަދުތައް އިތުރުވީ އެންމެ 2.5 އިންސައްތަކަމަށް ޕީއެންސީން ބުނެފައި ވެއެވެ.

ހަރަދުތައް ކުރެއްވުމުގެ ނަތީޖާއެއްގެ ގޮތުން ބަޖެޓްގެ ޑެފިސިޓުވެސްވަނީ ވަރަށް ބޮޑަށް ކޮންޓުރޯލްކުރެވިފަ. މި އަހަރު ޖުމްލަ ބަޖެޓް ޑެފިސިޓުވަނީ 378 މިލިއަން ރުފިޔާއިން ކުޑަކުރެވި 3.6 އިންސައްތަ ދަށްވެފަ: ޕީއެންސީ

ބަޔާނުގައި ޕީއެންސީން ބުނީ ކުރީ ސަރުކާރުން ބޭރުގެ ފަރާތްތަކުގެ އެހީތެރިކަމުގައި ހިންގި މަޝްރޫއުތަކުގެ ހަރަދުތައް ރެކޯޑު ނުކޮށް މިއަހަރުގެ ހަރަދުތަކުގެ ތެރޭގައި އެހަރަދުތައް ހިމަނަން ޖެހުމުން ކުރިމަތިވި މައްސަލަތައް ހައްލުކޮށް ކޮންމެ ހަފްތާއަކު އެއްފަހަރު ދައުލަތުގެ ހަރަދުބަރަދާއި އާމްދަނީގެ ތަފްސީލުތައް ފިނޭސްމިނިސްޓްރީން ދަނީ އާންމު ކުރަމުން ކަމަށެވެ. އެންމެ ފަހުން ހަރަދުތައް އާންމު ކުރީ މި މަހުގެ 7 ވަނަ ދުވަހުގައި ކަމަށް ބަޔާނުގައި ބުނެފައި ވެއެވެ.

އާރްޓީއައިތަކަށް ޖަވާބުދިނުމުގައި މި ސަރުކާރުން އިހުމާލުވެފައި ނެތްކަން ތަފާސްހިސާބުތަކުން ފެންނަން އެބައޮތްކަމަށް ޕީއެންސީގެ ބަޔާނުގައި ބުނެފައި ވެއެވެ.

ދައުލަތުގެ ކުންފުނިތަކުން އާރުޓީއައިއަށް ޖަވާބުދޭންޖެހޭނެ ކަމަށް ކޯޓުތަކުން ކަނޑައެޅުމުންވެސް ޖަވާބުނުދީ ހިފަހައްޓާފައި އޮތް ކަމަށާއި އެ ސިޔާސަތު ނިމުމަކަށް ގެންނެވީ ރައީސް މުއިއްޒު ކަމަށް ޕީއެންސީން ވަނީ ބުނެފައެވެ.

ފާއިތުވި އަހަރުގެ ތެރެގައި 70 އަށްވުރެ ގިނަ ނޫސްވެރިންގެ ބައްދަލުވުން ބޭއްވި. އަދި 700 އަށްވުރެ ގިނަފަހަރު ސަރުކާރުގެ ވަޒީރުން އެކި މީޑިއާތަކަށް މައުލޫމާތު ދެއްވި. އެ މުއްދަތުގައި އެއްވެސް މީޑިއާއަކަށް ފިޔަވަޅުއަަޅައި ދަތިކުރުމަށް ސަރުކާރުން އެއްވެސް ކަމެއް ކޮށްފައި ނުވާނެ: ޕީއެންސީ

މީގެއިތުރަށް ޕީއެންސީގެ ބަޔާނުގައި ބުނީ ރާއްޖޭގެ ތާރީހުގައިވެސް ފުރަތަމަ ފަހަރަށް ކެބިނެޓުން ނިންމާ ނިންމުންތައް ފެންނާނެހެން އާންމުކުރަން ފެށީ މި ސަރުކާރުން ކަމަށާއި ރައްޔިތުންނަށް ފެންނަން ހުރި މިފަދަ ހަގީގަތްތައް އޮޅޭ ގޮތަށް ދައުލަތުން ފައިސާ ދީގެން ހިންގާ ދައުލަތުގެ މުއައްސަސާއެއް އަދި ޒިންމާދާރު އިދިކޮޅު ސިޔާސީ ޕާޓީއެއްގެ މަގާމު އަދާކުރަންޖެހޭ އެމްޑީޕީން މައުލޫމާތު ފެތުރުމަކީ ބައިލައިގަނެވޭނެކަމެއް ނޫންކަމަށެވެ.