ގިނަ އަދަދެއްގެ ބަނގުރަލާއި ބިޔަރު ދަޅު ނައްތާލައިފި

މަސްތުވާތަކެއްޗާއި ގުޅުންހުރި ތަފާތު އެކި މައްސަލަތަކުގައި ފުލުހުންގެ ބެލުމުގެ ދަށަށް ގެނެސް، ލ. ފޮނަދޫ ޕޮލިސް ސްޓޭޝަނުގައި ރައްކާކުރެވިފައި ހުރި ބަނގުރާ މިއަދު ނައްތާލައިފިއެވެ.

ފުލުހުންގެ އިދާރާއިން މައުލޫމާތު ދެއްވި ގޮތުގައި، މި ތަކެތި ނައްތާލާފައިވަނީ ބަނގުރަލާއި ބަނގުރަލުގެ މައްސަލަތަކާ ގުޅިގެން ހިފެހެއްޓޭ ތަކެތި ނައްތާލުމުގައި އަމަލުކުރާނެ ގޮތުގެ ގަވާއިދުގެ ދަށުން، އެކަމަށްޓަކައި ހާއްސަކޮށް އެކުލަވައިލި ކޮމިޓީއެއްގެ ބެލުމުގެ ދަށުންނެވެ.

މިއަދު ނައްތާލި ތަކެތީގެ ތެރޭގައި ހިމެނެނީ 11 ފުޅި ބަނގުރަލާއި 69 ބަނގުރާ ދަޅެވެ.

މި ތަކެއްޗަކީ މިއަހަރުގެ ޖެނުއަރީ 26 އިން ފެށިގެން އޭޕްރީލް 13 ވަނަ ދުވަހާ ހަމައަށް، ކައްދޫ އެއާޕޯޓުން ފުރަންދިޔަ ފަތުރުވެރިންގެ އަތުން އޭވިއޭޝަން ސެކިއުރިޓީން ހިފެހެއްޓުމަށްފަހު ފުލުހުންނާ ހަވާލުކޮށްފައިވާ ތަކެތި ކަމަށް ފުލުހުން މައުލޫމާތުދެއެވެ.