ރައީސް ނަޝީދުގެ އެމްޑީޕީ ރިޔާސީ ޕްރައިމަރީ ކެމްޕޭންގެ ފުލުހުންގެ ބޯޑު މެމްބަރު ހާމިދު ހާމިދު އަބްދުލް ޣަފޫރު ބައިވެއްޖެ

ފުލުހުންގެ ބޯރޑް މެމްބަރު ހާމިދު އަބްދުލް ޣަފޫރު ނަޝީދުގެ ކެމްޕޭނުގައި ހަރަކާތްތެރިވާ ފޮޓޯއެއް އާއްމުވެއްޖެއެވެ.

މިދިޔަ ހޮނިހިރު ދުވަހު (އިއްޔެ)ގެ ހަވީރު މޯލްޑިމޮކްރަޓިކް ޕާޓީ (އެމްޑީޕީ)ގެ މައި ހަރުގޭގައި ބޭއްވި ރައީސް މުހައްމަދު ނަޝީދުގެ ކެމްޕޭން ހަރަކާތެއް ވަނީ ބާއްވާފައެވެ.

އެމްޑީޕީގެ ރިޔާސީ ޕްރައިމަރީ ކެމްޕޭންގައި ވާދަކުރައްވާ ރައްޔިތުންގެ މަޖިލިސް ރައީސް މުހައްމަދު ނަޝީދުގެ ކެމްޕޭންގައި ހާމިދު ހަރަކާތްތެރިވެފައި ވަނީ ހޮނިހިރު ދުވަހުގެ ހަވީރުގެ އިވެންޓުގައެވެ.

މި އިވެންޓުގެ އިތުރުން ރައީސް މުހައްމަދު ނަޝީދު ވަނީ ހާމިދުގެ އެމްޑީޕީގެ މެމްބަރޝިޕާއި ބެހޭ ގޮތުން ވާހަކަ ދައްކަވާފައެވެ. ރައީސް ނަޝީދު ވިދާޅުވީ، އެމްޑީޕީގެ ދަފުތަރުން އުނިކުރި 39،000 އެމްޑީޕީގެ އިހުލާސްތެރި މެމްބަރުންގެ ތެރޭގައި ހާމިދު އަބްދުލް ޣަފޫރު ވެސް ހިމެނޭ ކަމަށެވެ.

ހާމިދު އަބްދުލް ޣަފޫރު ރައީސް ނަޝީދުގެ ކެމްޕޭނުގައި —

ހާމިދު އަބްދުލް ޣަފޫރަކީ ފުލުހުންގެ ބޯރޑަށް އާންމުންގެ ތެރެއިން އައްޔަނުކޮށްފައިވާ މެމްބަރެކެވެ. ދިވެހި ފުލުހުންގެ ހިދުމަތުގެ ޤާނޫނުގެ ދަށުން ހާމިދު މި މަޤާމަށް އައްޔަނުކޮށްފައި ވަނީ ރައްޔިތުންގެ މަޖިލީހުން 15 މާރިޗު 2021ގައި 41 ރައްޔިތުންގެ މަޖިލިސް މެމްބަރުންގެ އަގުލަބިއްޔަތުންނެވެ.

ދިވެހި ފުލުހުންގެ ޤާނޫނުގެ 75 ވަނަ މާއްދާގެ (އ)ގެ ދަށުން 9 އޭޕްރީލް 2021ގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ފުލުހުންގެ ބޯޑަށް އައްޔަނު ކުރެއްވި މެމްބަރުންގެ ތެރޭގައި ހިމެނެނީ ؛

1. އަހުމަދު ފަޔާޒް ހަސަން
2. އައިޝަތު ނޫރާ މުހައްމަދު
3. އަލީ ފާއިޒް
4. އަހުމަދު ނާޝިދު
5. އާދަމް އިބްރާހިމް
6. ހާމިދު އަބްދުލް ޣަފޫފު
7. އަލްއުސްތާޛާ ސަފާ ޝަރީފު އެވެ.

ދިވެހި ފުލުހުންގެ ހިދުމަތުގެ ޤާނޫނުގެ ދަށުން އެކުލަވާލެވިފައިވާ ފުލުހުންގެ ބޯޑަކީ، ފުލުހުންގެ ހިދުމަތް ދިނުމުގައި ފުލުހުން އަމަލުކުރާ ގޮތް ބެލުމާއި، ފުލުހުންގެ ވާޖިބުތަކާއި މަސްއޫލިއްޔަތު އަދާކުރުމުގައި ގެންނަންޖެހޭ ބަދަލުތަކުގެ ލަފާ ދިނުމެވެ. އަދި މި ނޫންވެސް ބާރުތައް ފުލުހުންގެ ބޯޑަށް ލިއްބައިދީފައިވެއެވެ.

ފުލުހުންގެ ޚިދުމަތުގެ ގާނޫނެއް އެކުލަވާލުމުގެ މައިގަނޑު މަގްސަދަކީ ދިވެހި ފުލުހުންގެ ޚިދުމަތުގެ އެންމެހައި ކަންކަމަކީ ގާނޫނުއަސާސީއާއި، ގާނޫނުއަސާސީގައި ބަޔާންކޮށްފައިވާ ދުސްތޫރީ ހަމަތަކާއި، އިންސާނީ ހައްގުތަކާއި ކަރާމަތަށް އިހްތިރާމުކުރުމާއެކު ގާނޫނުގެ ހުކޫމަތުގެ ތެރެއިން ދެވޭ ޚިދުމަތެއްކަން ކަށަވަރުކުރުމާއި، ވަކިފަރާތަކަށް ޖެހުމެއްނެތި، އަދި ވަކި ނުފޫޒަކަށް ލެނބުމެއްނެތި، ހަމަހަމަކަމާއެކު ގާނޫނު ނެގެހެއްޓުމެވެ.

ދިވެހި ފުލުހުންގެ ޤާނޫނުގައި ފުލުހުންގެ ބޯޑު މެމްބަރުންގެ ހުންނަން ޖެހޭ ޝަރުތުތައް ވަކިން ބަޔާންކޮށްފައި ނުވި ނަމަވެސް، ފުލުހުންގެ ހިދުމަތަކީ މިނިވަންކަމާއެކު، ސިޔާސީ ނުފޫޒުން އެއްކިބާވެ އޮވެ ހިނގަންޖެހޭ ހިދުމަތެކެވެ.

މިހެން މިކަން އޮތްއިރު، ފުލުހުންގެ ބޯޑު މެމްބަރަކު ސިޔާސީ ޕާޓީއެއްގެ އެތެރޭގެ އިންތިހާބެއްގެ ކެމްޕޭނުގައި ހަރަކާތްތެރިވުމަކީ މުޅި މުއައްސަސާގެ މިނިވަންކަމާމެދު ސުވާލު އުފެއްދުމަށް ދެވޭ ފުރުސަތެކެވެ. އަދި ހަމައެހެންމެ، ފުލުހުންގެ ބޯޑު މެމްބަރަކު ސިޔާސީ ޕާޓީއެއްގެ ދަފުތަރުގައި އޮތުމަކީ ވެސް ފުލުހުންގެ މުއައްސަސާގެ މޫނުމަތި ހަރާބު ވެދާނެ ފަދަ ކަމެކެވެ.

ހާމިދު ފުލުހުންގެ ބޯރޑަށް އައްޔަން ކުރުމުން ވަރަށް ގިބަ ބައެއްގެ ފާޑުކިޔުން މި ސަރުކާރަށާއި މަޖިލީހަށް މީގެ ކުރިން އަމާޒުވިއެވެ. ސަބަބަކީ ހާމިދު އަކީ ސިޔާސީ މީހަކަށްވުމާއެކު، ވ. ބޮޑުމޮހޮރާގައި މަސްތުވާތަކެތި ބޭނުންކުރުމުގެ ތުހުމަތުގައި ފުލުހުންގެ އޮޕަރޭޝަނެއްގައި ހައްޔަރުކުރި ބޭފުޅަކަށް ވާތީއެވެ.

ހާމިދު އަކީ ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މަޖިލިސް މެމްބަރުކަން ވެސް ކުރައްވާފައިވާ ބޭފުޅެކެވެ.