ދިވެހި ފުލުހުންގެ ޙިދުމަތުން ޖިނާއީ އެކި މައްސަލަތައް ތަންފީޒުކުރުމުގައި ފުލުހުން އަމަލުކުރާނީ އިޖުރާއަތުގައި އޮތް ގަވާއިދުގެ ދަށުން ކަމަށް ހޯމްލޭންޑް ސެކިއުރިޓީ، އެންޑް ޓެކްނޮލޮޖީ މިނިސްޓަރު އަލީ އިހުސާން ވިދާޅުވެއްޖެއެވެ.
މިނިސްޓަރު މިފަދައިން ވިދާޅުވީ މިއަދު ބޭއްވި ރައްޔިތުންގެ މަޖިލީހު ޖަލްސާގައި ގަލޮޅު އުތުރު ދާއިރާގެ މެމްބަރު މުހައްމަދު އިބްރާހިމް ކުރެއްވި ސުވާލަށް ޖަވާބު ދެއްވަމުންނެވެ.
ގަލޮޅު އުތުރުދާއިރާގެ މެމްބަރު މުހައްމަދު އިބްރާހިމް ވަނީ މިއަދުގެ ޖަލްސާގައި ފުލުހުންނާއި ކަސްޓަމްސް އިން އެކިއެކި މައްސަލަތަކުގައި ތަހުގީގަށް ހިފަހައްޓާ ފައިސާ ބެލެހެއްޓޭނެ ހަރުދަނާ ނިޒާމެއް ގާއިމުކޮށްފައިވޭތޯ މިނިސްޓަރާ ސުވާލު ކުރައްވާފައެވެ.
މި ސުވާލަށް ޖަވާބު ދެއްވަމުން މިނިސްޓަރު ވިދާޅުވީ ދިވެހި ފުލުހުންގެ ޙިދުމަތުން ޖިނާއީ އެކި މައްސަލަތައް ތަންފީޒުކުރުމުގައި އަމަލުކުރާނީ އިޖުރާއަތުގައި އޮތް ގަވާއިދުގެ ދަށުން ކަމަށާއި، ޕްރޮސެކިއުޓް ކުރުމުގެ ޖިނާއީ އިޖުރާއަތުގެ ގަވާއިދުގެ ދަށުން އަމަލުކުރާ ހާއްސަ އުސޫލެއް ފައިސާއާ ދޭތެރޭގައި އޮންނަ ކަމަށެވެ.
"ޖިނާއީ މައްސަލަތަކުގެ އެކިކަންކަމާއި ގުޅޭގޮތުން ފުލުހުންގެ އެކިއެކި ބަހާތަކަށް ނެގޭ ފައިސާ އޭގެ ދިވެހި ރުފިޔާކަމަށް ވަނީ ނަމަ، 24 ގަޑިއިރުތެރޭގައި ފުލުހުންގެ ހެޑް ކުއާޓާތައް ގެނެސް، ފުލުހުންގެ މައި މަރުކަޒު ތެރެއިން ފައިސާގެ ކަންކަން ބަލަހައްޓާ އިދާރާ އަދި ބަހާގެ ބެލުމުގެ ދަށުން އެމްއެމްއޭގެ ގާއިމްކޮށްފައި އިންނަ، ވަގުތީ އެކައުންޓަކަށް ދިވެހި ފައިސާ ޖަމާކުރެވޭ." މިނިސްޓަރު
މިނިސްޓަރު ވިދާޅުވީ ފުލުހުންގެ ހިދުމަތުން ތަހުގީގަށް ބޭރު ފައިސާއެއް ނަގައިފިނަމަ، ފުލުހުންގެ އިދާރާގައި އެކަމަށް ގާއިމުކުރެވިފައި އިންނަ އެކަމަށް ހާއްސަ، ސޭފެއްގައި ފައިސާ ބެހެއްޓޭނެ ކަމަށެވެ. އަދި ޖިނާއީ މައްސަލަ ނިމި ކޯޓުން ވަކި ގޮތެއް އަންގާ ހިސާބުން އެ ފައިސާއާ ދޭތެރޭ އަމަލުކުރާނެ ގޮތެއް ކަނޑައެޅިގެންދާނެ ކަމަށްވެސް މިނިސްޓަރު ވިދާޅުވިއެވެ.
"އެ ފައިސާއަކީ ފުލުހުންގެ އިދާރާގެ އިސްވެރިންނާއި ދައުލަތުގެ އިދާރާގެ އިސްވެރިއަކު ބޭނުންވެއްޖެނަމަ އުސޫލުގެ ތެރެއިން އޮޑިޓްކުރެވި ރައްކާކުރެވިގެންދާ އެއްޗެއް." މިނިސްޓަރު
ކަސްޓަމްސް އިން އެކި މައްސަލަތަކުގައި ތަހުގީގަށް ހިފަހައްޓާ ފައިސާއާމެދު އަމަލުކުރަމުންގެންދާ ނިޒާމާއި ގުޅޭގޮތުން ވާހަކަފުޅު ދައްކަވަމުން މިނިސްޓަރު ވިދާޅުވީ މޯލްޑިވްސް ކަސްޓަމްސް ސާވިސްއިން އެ ފައިސާ ބަލަހައްޓަނީ ކަސްޓަމްސްގެ އާންމު ގަވާއިދުގެ ދަށުން ކަމަށެވެ.
މިނިސްޓަރު ވިދާޅުވީ ކަސްޓަމްސްގައި އޮންނަ އުސޫލަކީ މަނީ ލޯންޑަރިން ފަދަ މައްސަލައެއްގައި ހިފެހެއްޓޭ، ފައިސާ ކަމުގައި ވިޔަސް، ކޯޓު މަރުހަލާއަށް ހަމައަށް ދެވޭދެން ކަސްޓަމްސްގެ އެކަމަށް ހާއްސަކޮށްފައި އިން ތިޖުރީގައި އެފައިސާ ރައްކާތެރިކަމާއެކު ބެހެއްޓުން ކަމަށެވެ. އަދި އެ ފައިސާވެސް އޮޑިޓްކުރެވިގެންދާނެ ކަމަށް މިނިސްޓަރު ފާހަގަ ކުރެއްވިއެވެ.
މިނިސްޓަރާ ސުވާލުކުރުމުގެ އިތުރުން ސަރުކާރުގެ ފަރާތުން ހުށަހަޅާފައިވާ ދެ ބިލެއްގެ ފުރަތަމަ ކިޔުން ވެސް މިއަދު މަޖިލީހުގައި ކުރިއަށްގެންދިޔައެވެ.
އެއީ އެންޓި ކޮރަޕްޝަން ކޮމިޝަންގެ ގާނޫނަށާއި އިލެކްޝަންސް ކޮމިޝަންގެ ގާނޫނަށް އިސްލާހު ގެނައުމުގެ ބިލެވެ.
ހަމައެއާއެކު ދުންފަތް ކޮންޓްރޯލްކުރުމާ ބެހޭ ގާނޫނަށް އިސްލާހު ގެނައުމުގެ ބިލުގެ ބަހުސްވެސް މިއަދުގެ ޖަލްސާގައި ކުރިއެވެ.
ކޮމިޓީތަކުން ހުށަހަޅާ ކަންކަމުގެ ތެރޭގައި މަޖިލީހުގެ އެޖެންޑާގައި ހިމަނާފައިވަނީ އިންޑިއާއަށް އާ ސަފީރަކު ކަނޑައެޅުމުގެ މައްސަލައެވެ.
