ނަތަންޔާހޫއަކީ ހަނގުރާމައިގެ މުޖުރިމެއް، ހަންގޭރީން އޭނާ ހައްޔަރުކުރަންޖެހޭނެ: އެމްނެސްޓީ

އިސްރާއީލުގެ މުޖުރިމު ބޮޑުވަޒީރު ނަތަންޔާހޫ ހަންގޭރީއަށް ހިނގައްޖެނަމަ އޭނާ ހައްޔަރުކޮށް، އިންޓަރނޭޝަނަލް ކްރިމިނަލް ކޯޓާ ހަވާލުކުރަން ޖެހޭނޭ ކަމަށް އެމްނެސްޓީ އިންޓަރނޭޝަނަލްއިން ބުނެފިއެވެ.

އެމްނެސްޓީ އިންޓަރނޭޝަނަލްއިން މިހެން ބުނީ، ހަންގޭރީގެ ބޮޑުވަޒީރު ވިކްޓަރ އުރްބާންގެ ދައުވަތަކަށް، ނަތަންޔާހޫ މި ހަފްތާގައި ހަންގޭރީއަށް ދިއުމަށް ހަމަޖެހިފައިވާތީ އެކަމާ ގުޅިގެންނެވެ.

ރިޕޯޓްތައް ބުނާގޮތުން ނަތަންޔާހޫ ހަންގޭރީއަށް ދަތުރުކުރާނީ އޭޕްރީލް 2 ވާ ބުދަދުވަހުއެވެ.

އެމްނެސްޓީ އިންޓަރނޭޝަނަލްގެ ގްލޯބަލް ރިސާޗް، އެޑްވޮކަސީ އެންޑް ޕޮލިސީ ވެރިޔާ އެރިކާ ގުއެވަރަ-ރޯސާސް ނެރުނު ބަޔާނެއްގައި ބުނެފައިވަނީ، ނަތަންޔާހޫ ހަންގޭރީއަށް ދިއުމަށް ދައުވަތު ދިނުމަކީ ބައިނަލްއަގްވާމީ ގާނޫނުތަކާ ޚިލާފް ކަމެއް ކަމަށެވެ.

ހަންގޭރީގެ ދައުވަތުން ހާމަކޮށްދެނީ، އިންޓަރނޭޝަނަލް ކްރިމިނަލް ކޯޓުން ހައްޔަރުކުރުމުގެ އަމުރު ނެރެފައިވާ މުޖުރިމަކަށް ޔޫރަޕް އިއްތިހާދުގެ ގައުމަކުން މަރްހަބާކިއުން ކަމަށެވެ.

ނަތަންޔާހޫވަނީ ހަނގުރާމައިގެ ޖަރީމާތައް ހިންގާފައި ކަމަށާއި، އޭނާދަނީ ޣައްޒާގައި ހަނގުރާމައިގެ ހަތިޔާރެއްގެގޮތުގައި ބަނޑަށްމެރުމުގެ ސިޔާސަތެއް ހިންގަމުން ކަމަށްވެސް އެމްނެސްޓީގެ ބަޔާނުގައި ވެއެވެ.

ނަތަންޔާހޫ ގެންދަނީ ކަނޑައެޅިގެން ގަސްތުގައި އާންމުންނަށް ހަމަލާދެމުން ކަމަށާއި، ޣައްޒާގައި އިންސާނިއްޔަތާ ޚިލާފް އެތައް ޖަރީމާއެއް ހިންގަމުން ކަމަށްވެސް ބަޔާނުގައި ވެއެވެ.

އިންޓަރނޭޝަނަލް ކްރިމިނަލް ކޯޓުގެ މެމްބަރު ގައުމަކަށް ނަތަންޔާހޫ ގޮސް، އަދި އޭނާ ހައްޔަރުނުކޮށް ދޫކޮށްލުމަކީ ބައިނަލްއަގްވާމީ ގާނޫނުތަކާ ޚިލާފްވެ، ފަލަސްތީނު ރައްޔިތުންނާ ދެކޮޅަށް އިތުރު ޖަރީމާތައް ހިންގުމަށް އިސްރާއީލަށް ދެވޭ އިތުރު ހިތްވަރެއް ކަމަށްވެސް އެމްނެސްޓީން ބުނެފައި ވެއެވެ.

ޣައްޒާގައި ހަނގުރާމައިގެ ޖަރީމާތަކާއި ނަސްލުނައްތާލުމުގެ ޖަރީމާތައް ހިންގާ ކަމަށް ކަނޑައަޅައި، އިންޓަރނޭޝަނަލް ކްރިމިނަލް ކޯޓުން ނަތަންޔާހޫ ހައްޔަރުކުރުމުގެ އަމުރު ނެރެފައިވަނީ މިދިޔަ އަހަރުގެ ނޮވެމްބަރު މަހުއެވެ.

މި އަމުރުގެދަށުން، އައިސީސީގެ މެމްބަރު އެއްވެސް ގައުމަކަށް އޭނާ ހިނގައްޖެނަމަ ހައްޔަރުކޮށް ކޯޓާ ހަވާލުކުރުމަކީ އެ ގައުމެއްގެ މައްޗަށް ގާނޫނީގޮތުން ލާޒިމްކަމެކެވެ.

ނަތަންޔާހޫ ހައްޔަރުކުރުމުގެ އަމުރު އައިސީސީން ނެރުމާއެކު، އެ އަމުރަށް ކިޔަމަން ނުވާނޭ ކަމަށް ބުނެ، ހަމަ އެދުވަހު ހަންގޭރީގެ ބޮޑުވަޒީރު ވިކްޓަރ އުރްބާން، ހަންގޭރީއަށް ދިއުމަށް ނަތަންޔާހޫއަށް ދައުވަތު ދިނެވެ.

ހަންގޭރީ ވެގެންދާނީ، އައިސީސީގެ އަމުރުގެ ފަހުން ނަތަންޔާހޫ ދަތުރުކުރާ ޔޫރަޕްގެ ފުރަތަމަ ގައުމަށެވެ.

އައިސީސީގެ މެމްބަރުންގެ ގޮތުގައި ހިމެނޭ ޔޫރަޕްގެ ބައެއް ގައުމުތައް ކަމަށްވާ ފްރާންސް، ޖަރުމަނު، އިޓަލީ އަދި ޕޯލެންޑްފަދަ ގައުމުތަކުންވަނީ، ނަތަންޔާހޫ އަޔަސް ހައްޔަރު ނުކުރާނޭކަމުގެ އިޝާރާތެއް ކޮށްފައެވެ.

އެމެރިކާއަކީ އިންޓަރނޭޝަނަލް ކްރިމިނަލް ކޯޓު ގަބޫލުކުރާ ގައުމެއް ނޫނެވެ. އެމެރިކާގެ ރައީސް ޑޮނަލްޑް ޓްރަމްޕް ދާދިފަހުންވަނީ ނަތަންޔާހޫ އެމެރިކާއަށް ގެންގޮސް، ޣައްޒާގެ ނަސްލުނައްތާލަން ނަތަންޔާހޫ ކުރަމުންދާ ހަނގުރާމައިގައި އެމެރިކާގެ ތާއީދު އޮތްވަރު ދުނިޔެއަށް ސާބިތުކޮށްދީފައެވެ.

ހަންގޭރީން ނަތަންޔާހޫ ހައްޔަރު ނުކޮށްފިނަމަ، އީޔޫގެ ގައުމުތަކުގެ ވެރިން ބޭނުންވީމާ އދގެ ނިޒާމުތައް ފުނޑާލާނެކަން ހާމަވެގެންދާނެއެވެ. އަދި އީޔޫއިން މިފަދަ މައްސަލަތަކުގައި ގެންގުޅޭ ސިޔާސަތުތަކުގެ ދޯދިޔާކަމާއި، އަގެއްނެތްކަން ދުނިޔެއަށް ހާމަވެގެންދާނެއެވެ.