ކާރިސާތަކަށް ހޭލުންތެރިކުރުމާއި ބެހޭ އެއްބަސްވުމެއްގައި ސޮއިކޮށްފި

ކާރިސާތަކަށް މުޖުތަމަޢު ހޭލުންތެރިކުރުވައި، ކުރިއާލައި އިންޒާރުދޭ ނިޒާމު ހަރުދަނާކުރުމުގެ މަގްސަދުގައި، މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ އާއި މޯލްޑިވިއަން ރެޑް ކްރެސެންޓް (އެމް.އާރް.ސީ) އާ ދެމެދު ފަހުމުނާމާއެއްގައި ސޮއިކޮށްފިއެވެ.

ކާރިސާތަކުން ސަލާމަތްވުމަށް ވެވުނު އެއްބަސްވުމުގެ ދަށުން، ޓްރެކްޓް (ޓީ.އާރް.އޭ.ސީ.ޓީ) މަޝްރޫޢުގެ މުހިންމު ޙަރަކާތްތަކެއް ރާއްޖޭގެ އެކި ކަންކޮޅުތަކުގައި ތަންފީޒުކުރުމަށް ވަނީ ހަމަޖެހިފައެވެ.

މި ރަސްމިއްޔާތުގައި ދެ ފަރާތުގެ އިސްވެރިން ބައިވެރިވެވަޑައިގެންނެވިއެވެ.

މި އެއްބަސްވުމުގެ މައިގަނޑު އަމާޒަކީ ކާރިސާތަކަށް ތައްޔާރުވެފައިވާ މިންވަރު މުޖުތަމަޢުގައި އިތުރުކުރުމާއި، އެފަދަ ހާލަތްތަކުން ކުރިމަތިވެދާނެ ގެއްލުންތަކަށް އާންމުން ހޭލުންތެރިކުރުވުމެވެ.

މީގެއިތުރުން، ރައްޔިތުންގެ ޢަމަލީ ބައިވެރިވުމާއެކު، އެކި ބާވަތުގެ ނުރައްކާތަކުން ރައްކާތެރިވުމަށް ޤާއިމުކޮށްފައިވާ "މަލްޓި ހަޒާޑް އާލީ ވޯނިންގ ސިސްޓަމް" ރާއްޖޭގައި އިތުރަށް ހަރުދަނާކޮށް ފުޅާކުރުންވެސް މި އެއްބަސްވުމުގައި ހިމެނެއެވެ.

މި އެއްބަސްވުމުގެ ސަބަބުން މޫސުމަށް އަންނަ ބަދަލުތަކާއި ގުދުރަތީ ކާރިސާތަކުން ރައްކާތެރިވުމަށް ރަށްރަށުގެ ފެންވަރުގައި މަސައްކަތްކުރާ ފަރާތްތަކުގެ ޤާބިލުކަން އިތުރުވެގެންދާނެއެވެ. އަދި ކުއްލި ނުރައްކަލުގެ ހާލަތްތަކުގައި ވީ އެންމެ އަވަހަކަށް މަޢުލޫމާތު ފޯރުކޮށްދީ، ރައްޔިތުންގެ ފުރާނައާއި މުދާ ސަލާމަތްކުރުމަށް އަޅަންޖެހޭ ފިޔަވަޅުތައް އިތުރަށް ހަލުވި އަދި ހަރުދަނާވެގެންދާނެ ކަމަށް އެންވަޔަރަންމަންޓް މިނިސްޓްރީން ވަނީ ބުނެފައެވެ.