ބްރޯޑްކާސްޓިންގ ދުވަހު ދިވެހި ބްރޯޑްކާސްޓިންގގެ ތާރީޚް!

މިއަދަކީ ދިވެހިރާއްޖޭގެ ބްރޯޑްކާސްޓިން ދުވަހެވެ.

މީގެ 6 ދަހަރާއި ދެމަސް ކުރިން ފެށި މިޚިދުމަތް އޭރު ދެމުން އައީ ހަމައެކަނި ސަރުކާރުންގެ ކަމަށްވީ ނަމަވެސް، އެކަން ބަދުލުވެ އެތައް އަމިއްލަ ޗެނަލްތަކުންވެސް މިއަދު އަންނަނީ ރާއްޖޭގައި ބްރޯޑްކާސްޓްކުރުމުގެ ޚިދުމަތް ދެމުންނެވެ. މިދިޔަ އަހަރެއްހާ ދުވަހަށް އެކަންޏަށް ބެލިކަމުގައިވިޔަސް މުޅީން އައު ޓީވީ ޗެނަލްތައް މިވަނީ ތައާރަފު ވެފައެވެ.

މިގޮތުން 2024 ވަނަ އަހަރުގެ ޖެނުއަރީ 25 ވަނަ ދުވަހު ބްރޯޑްކާސްޓްކުރަން ފެށި ރާއްޖޭގެ ޕްރައިވެޓް ބްރޯޑްކާސްޓިންގެ ސިނާއަތުގައި ކުރިއަރަމުން އަންނަ "އަސްލު ޓީވީ" އަކީ އެއް މިސާލެވެ.

ބްރޯޑްކާސްޓް ކުރުމުގެ ޚިދުމަތް ރަސްމީ ސިފައެއްގައި ރާއްޖޭގައި ފެށިގެން އައީ 1962 ވަނަ އަހަރުއެވެ. އޭރު އެންމެ ރޭޑިއޯ ޗެނަލަކުން ފެށިގެން އައި ހިދުމަތް 2007 ގެ ނިޔަލަށް ދެމުން އައިސްފައިވަނީ ހަމައެކަނި ސަރުކާރުގެ ޓީވީ އަދި ރޭޑިއޯ ޗެނަލްތަކުންނެވެ.

ރާއްޖޭގައި އަމިއްލަ ފަރާތްތަކަށް ބްރޯޑްކާސްޓް ކުރުމުގެ ހުއްދަ ފުރަތަމަ ފަހަރަށް ދީފައިވަނީ 2007 ވަނަ އަހަރުގެ ޖުލައި މަހުގެ ކުރީކޮޅުގައެވެ. މި ހުއްދައާއެކު އަމިއްލަ ރޭޑިއޯ ޗެނަލްތަކާއި ޓީވީ ޗެނަލްތައް ހުޅުވިގެން ދިޔައެވެ. އަދި އޭރު ހިފެހެއްޓިފައިވާ މީޑިއާގެ މިނިވަންކަން ހައްދެއް ނެތް މިންވަރަށް ލިބިގެންދިޔައެވެ.

ރާއްޖޭގައި ބްރޯޑްކާސްޓްކުރަމުން އަންނަތާ 6 ދަހަރަށްވުރެ ގިނަ ދުވަސް ނުވަތަ 60 އަހަރަށްވުރެ ގިނަ ދުވަސް ވެފައިވާއިރު މިހާތަނަށް 112 ފަރާތަކަށް ރީ-ބްރޯޑްކާސްޓްކުރުމުގެ ލައިސަންސް އަދި 38 އަށްވުރެ ގިނަ ފަރާތަށް ބްރޯޑްކާސްޓިން ލައިސެންސް ވަނީ ދޫކޮށްފައެވެ. އެއީ 30 އަށްވުރެ ގިނަ ޓީވީ ޗެނަލާއި 12 ރޭޑިއޯ ޗެނަލެވެ.

މީގެ އިތުރުން، ރީބްރޯޑްކާސްޓްކުރުމަށް ނުވަތަ ކޭބަލް ޓީވީގެ ޚިދުމަތް ދިނުމަށް 120 އަށްވުރެ ފަރާތަކަށް ވަނީ ލައިސަންސް ދޫކޮށްފައެވެ. މީގެ ތެރޭގައި، މުޅި ރާއްޖެއަށް ރީބްރޯޑްކާސްޓްކުރުމުގެ ޚިދުމަތް ދިނުމަށް ލައިސަންސް ދޫކޮށްފައިވާ 5 ފަރާތެއް ވެސް ހިމެނެއެވެ. ނަމަވެސް، އެކިއެކި ސަބަބުތަކާ ހުރެ މީގެތެރެއިން ބައެއް ލައިސެންސްތައް މިހާރުވަނީ ބާތިިލުކޮށްފައެވެ. އޭގެ ތެރޭގައި، ޓީވީ ނުވަތަ ރޭޑިއޯ ޗެނަލްތައް އުވާލުން ފަދަ ސަބަބުތައް ހިމެނެއެވެ.

ދިވެހިރާއްޖޭގެ ބްރޯޑްކާސްޓްކުރުމުގެ ދާއިރާގެ މައިގަނޑު އަމާޒަކަށް ވާންވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވި ފަދައިން ދިވެހި ޤައުމުގެ ޙައްޤުގައި ވަކާލާތު ކުރުމެވެ. ބްރޯޑްކާސްޓްކުރުމަކީ އަމާނާތެކެވެ. މަސްއޫލިއްޔަތެކެވެ.

ދިވެހިރާއްޖޭގެ ބްރޯޑްކާސްޓިންގ ދުވަހަކީ، ޤައުމު ބިނާކުރުމާއި، ޑިމޮކްރެސީ ހަރުދަނާކުރުމާއި ރައްޔިތުންގެ ހޭލުންތެރިކަން އިތުރުކޮށް މަޢުލޫމާތު މުއްސަނދިކުރުމުގައި ބްރޯޑްކާސްޓަރުން އަދާކުރާ މުހިއްމު ދައުރުގެ އަގު ވަޒަންކުރުމާއި، މި ސިނާޢަތުގެ ތަރައްޤީއަށް މަގުފަހިކުރުމަށް ފާހަގަކުރާ ދުވަހެކެވެ. މި ދުވަސް ފާހަގަކުރަނީ ކޮންމެ އަހަރެއްގެ އޮކްޓޯބަރ މަހުގެ 4 ވަނަ ދުވަހުއެވެ.

މި އަހަރުގެ ބްރޯޑްކާސްޓް ދުވަހުގެ ޝިޢާރަކީ "މާދަމާގެ ތަޞައްވުރު: ބްރޯޑްކާސްޓިންގެ މުސްތަޤްބަލު ބައްޓަންކުރުން" މިއެވެ.