އޯޓިޒަމް ހުންނަ ފަރާތްތަކަށް ހިދުމަތް ފޯރުކޮށްދިނުމުގައި އަދިވެސް ގޮންޖެހުންތައް އެބަހުރި: ހެލްތް

ދިވެހިރާއްޖޭގައި އޯޓިޒަމްއާ ގުޅޭ ހޭލުންތެރިކަމާއި ފަރުވާގެ ޚިދުމަތްތައް އިތުރުވަމުން އަންނަ ނަމަވެސް، އޯޓިޒަމް ހުންނަ ފަރާތްތަކަށް ލިބެންޖެހޭ ޚާއްޞަ ތަޢުލީމާއި އަދި ޞިއްޙީ ޚިދުމަތްތަކަށް ވާޞިލުވުމުގައި އަދި ވެސް ގޮންޖެހުންތައް އެބަހުރިކަމަށް ހެލްތް މިނިސްޓްރީން ބުނެފިއެވެ.

ކޮންމެ އަހަރެއްގެ އެޕްރީލް މަހުގެ 2 ވަނަ ދުވަސް އަކީ ކޮންމެ އަހަރަކުވެސް ދުނިޔޭގެ އޯޓިޒަމްއަށް ހޭލުންތެރިކަމުގެ ދުވަސް ފާހަގަކުރާ ދުވަހެވެ.

ދުވަހާ ގުޅިގެން ހެލްތް މިނިސްޓްރީން ބުނީ ދިވެހިރާއްޖޭގައި އޯޓިޒަމްއާ ގުޅޭ ހޭލުންތެރިކަމާއި ފަރުވާގެ ޚިދުމަތްތައް އިތުރުވަމުން އަންނަ ނަމަވެސް، އޯޓިޒަމް ހުންނަ ފަރާތްތަކަށް ލިބެންޖެހޭ ޚާއްޞަ ތަޢުލީމާއި އަދި ޞިއްޙީ ޚިދުމަތްތަކަށް ވާޞިލުވުމުގައި އަދި ވެސް ގޮންޖެހުންތައް ހުރިކަމާއި އަދި މުޖުތަމަޢުގެ ތެރެއިން މިފަދަ ފަރާތްތަކާއި މެދު ދެކޭ ނޭދެވޭ ގޮތްތަކުގެ ސަބަބުން އިޖުތިމާއި ކަންކަމަށާއި އަދި ޚިދުމަތް ހޯދުމުގައި ހުންނަ އުނދަގޫކަންކަން އަދިވެސް ތަހައްމަލުކުރަން ޖެހޭކަން ފާހަގަކުރެވޭ ކަމަށެވެ.

ކުރިއާލާ މި ފަދަ ކޮންޑިޝަންތައް ދެނެގަތުމާއި އެކު އިންޓަވެންޝަން ދެވޭނެ ނިޒާމެއް ގާއިމްކުރުމާއި އަދި މިފަދަ ފަރުވާގެ ޚިދުމަތްތްތައް ފަސޭހައިން ރީޖަނަލް ހޮސްޕިޓަލްތަކުން ލިބޭނެ ނިޒާމެއް އެކުލަވާލުމަކީ މިނިސްޓްރީ އޮފް ހެލްތުގެ ވަރަށް ބޮޑު އަޒުމެކެވެ: ހެލްތް

މީގެ އިތުރުން ސަރުކާރުގެ ކަމާބެހޭ ވުޒާރާތަކާއި، އަމިއްލަ ޖަމްޢިއްޔާތަކާއި، ޞިއްޙީ ދާއިރާގެ ފަންނުވެރިންނާއި، ޔުނިސެފް އަދި ޑަބްލިއުއެޗްއޯ ފަދަ ބައިނަލްއަޤްވާމީ ބައިވެރިންނާ ގުޅިގެން އޯޓިޒަމްއަށް އެހީތެރިވުމުގެ ސިޔާސަތުތަކާއި ޕްރޮގްރާމްތައް ހަރުދަނާކުރުމަށް މަސައްކަތް ކުރަމުންދާ ކަމަށް އެ މިނިސްޓްރީން ވަނީ ބުނެފައެވެ.

ދުނިޔޭގެ އޯޓިޒަމްއަށް ހޭލުންތެރިކަމުގެ ދުވަސް ފާހަގަކުރުމަށްޓަކައި މިއަހަރުގެ ހަރަކާތްތަކުގެ ތެރޭގައި މީޑިއާ ކެމްޕެއިނެއް ހިންގުމާއި، މިދާއިރާގައި މަސައްކަތްކުރައްވާ ފަރާތްތަކުގެ މެދުގައި ޕެނަލް މަޝްވަރާކުރިއަށް ގެންދިއުމާއި، ގުޅުން ހުރި ދާއިރާތަކާއި އަދި ގުޅުންހުރި ފަންނީ ބޭފުޅުންނާއި އަދި އޯޓިޒަމްހުންނަ ފަރާތްތަކުގެ ބެލެނިވެރިންނާއި އެކު ރައުންޑް ޓޭބަލް މަޝްވަރާ ބައްދަލުވުން ބޭއްވުމަށްވަނީ ހަމަޖެހިފައެވެ.

މިނިސްޓްރީން ބުނިގިތުގައި ޞިއްޙީ ޚިދުމަތްދޭ ފަރާތްތަކަށް ޙާއްސަ ތަމްރީން ޕްރޮގްރާމްތައް ވެސް ފަރުމާކުރެވި ބޭއްވިގެން ދާނެއެވެ. އަދި ދުޅަހެޔޮ މުޖުތަމަޢުއެއް ބިނާކުރުމަށް އެ މުޖުތަމަޢުއަކީ ތަފާތު އެކި ކަހަލަ ފަރާތްތަކާއި އެކު މަސައްކަތްކުރެވޭ ފަދަ ބާރުވެރި އަދި ޤާބިލް ބަޔަކު ދިރިއުޅޭ މުޖުތަމަޢުއަކަށް ހެދުމަށް ކަމާއި ގުޅުން ހުރި ހުރިހާ ފަރާތްތަކެއް އެކު މަސައްކަތްކުރުމަކީ މުހިންމުކަމެއް ކަމަށް އެ މިނިސްޓްރީން ވަނީ ބުނެފައެވެ.

މި ދުވަސް ފާހަގަކުރުމަށް ބެލެނިވެރިންނާއި، ތަޢުލީމީ ދާއިރާގެ މަސައްކަތްތެރިންނާއި، ޞިއްޙީ ޚިދުމަތްތެރިންނާއި އަދި ޢާންމު ރައްޔިތުން ބައިވެރިވުމަށް މިނިސްޓްރީ އޮފް ހެލްތުއިން ވަނީ އިލްތިމާސްކޮށްފައެވެ.

އަޅުގަނޑުމެން އެކުގައި މަސައްކަތްކޮށްގެން، އޯޓިޒަމް ހުންނަ މީހުންނަށް މުޖުތަމަޢުގައި ހުރިހާ ދާއިރާއަކުން ވެސް ކުރިއެރުން ލިބޭ އޯގާތެރި މާޙައުލެއް އުފެއްދުމަށާއި އަދި މިފަދަ ފަރާތްތަކާއި މެދު ގެންގުޅޭ ނޭދެވޭ ވިސްނުން ނައްތާލުމަށް އެންމެން އަތުގުޅާލުމަށް ވެސް އިލްތިމާސްކުރަމެވެ: ހެލްތް

އޯޓިޒަމް ދުވަހާ ގުޅޭގޮތުން މިއަހަރަށް، ޔުނައިޓަޑް ނޭޝަންސް (އދ.)އިން ކަނޑައަޅުއްވާފައިވާ ތީމްއަކީ "ނިއުރޯޑައިވަރސިޓީ އާއި އދ. ގެ ދެމެހެއްޓެނިވި ތަރައްޤީގެ ލަނޑުދަނޑިތައް ކުރިއެރުވުން" އެވެ. މިގޮތުން، އޯޓިޒަމް ހުންނަ ފަރާތްތަކުގެ ހުނަރުކުރިއެރުވުމަށް މަގުފަހިކޮށްދިނުމާއި، އެފަރާތްތަކަށް ބޭނުންވާ ޚިދުމަތް ހޯދުމަށް ފަސޭހައިން ވާޞިލުވެވޭ މާޙައުލެއް ޤާއިމުކޮށް، ހަމަހަމަ ފުރުޞަތުތައް ހޯދައިދިނުމުގެ މުހިންމުކަން މި ތީމްގައި ފާހަގަކޮށްފައިވެއެވެ.