ފުވައްމުލަކު ކްރިކެޓް ދަނޑު ބައިނަލްއަގްވާމީ ފެންވަރަށް ތަރައްޤީކުރަނީ

ސައުތު އޭޝިއާގައި މަގުބޫލު ކުޅިވަރެއްކަމަށްވާ ކްރިކެޓް ކުޅުމަށް ފުވައްމުލައް ސިޓީގައި ގާއިމުކޮށްފައިވާ ކުރިކެޓް ދަނޑު ބައިނަލްއަގްވާމީ ފެންވަރަށް ތަރައްޤީކުރަން އިނގިރޭސިވިލާތުގެ ކުންފުންޏަކާ ހަވާލުކޮށްފއެވެ.

ކްރިކެޓް ބޯޑް އޮފް މޯލްޑިވްސް (ސީބީއެމް) އިން އެ މަސައްކަތް ހަވާލުކުރީ ސައުތު އޭޝިއަން ނެޓްވޯކް (ސޭން) ނަމަކަށް ކިޔާ ކުންފުންޏަކަށެވެ.

މި އެއްބަސްވުމުގެ ދަށުން ސީބީއެމްއިން ފުވައްމުލަކު ދަނޑު ބައިނަލްއަގްވާމީ ފެންވަރަށް ތަރައްޤީކުރުމަށްފަހު ރާއްޖޭގައި ބާއްވާ ފުރަތަމަ ބައިނަލްއަގްވާމީ ކުރިކެޓް ލީގު ބޭއްވުމުގެ އިންތިޒާމުތައް ހަމަޖައްސާނެއެވެ.

މިއެއްބަސްވުމުގެ ދަށުން ރޭގަނޑާއި ދުވާލުވެސް ފުވައްމުލަކު ކުރިކެޓް ދަނޑުގައި ކުޅެވޭނެ އިންތިޒާމް ހަމަޖެއްސުން ހިމެނެއެވެ. އަދި ފްރެންޗައިޒް މުބާރާތެއް ގޮތަށް މޯލްޑިވްސް ޕްރިމިއާ ލީގު އިފްތިތާހު ކުރުމަށް ދެ ފަރާތުން ވަނީ އެއްބަސްވެފައެވެ.

މިއީ ޖުމުލަ ހަތްދިހަ މިލިއަން ރުފިޔާގެ އިންވެސްޓްމެންޓެއް ކަމަށް މައުލޫމާތު ލިބެއެވެ.

ރާއްޖޭގައި ބާއްވަން ނިންމާފައިވާ ކްރިކެޓް ލީގުގައި 6 ގައުމަކުން ބައިވެރިވާނެއެވެ. މިއީ ރާއްޖޭގެ ސްޕޯޓްސް ޓޫރިޒަމަށް ހުޅުވިގެންދާނެ ދޮރެކެވެ.

އަންނަ އަހަރު ރާއްޖެއަށް ބައިނަލްއަގްވާމީ ކުރިކެޓް މުބާރާތެއް ގެނައުމަށް ސީބީއެމް އިން މަސައްކަތް ފަށާފައިވާއިރު އިންޑިއާގެ މަޝްހޫރު ކުންފުންޏެއް ކަމަށްވާ ޓީ 10 އާއެކު ވެސް ވަނީ އެއްބަސްވުމެއްގައި ސޮއިކޮށްފައެވެ.

މި އެއްބަސްވުމުގެ ސަބަބުން ކުރިކެޓާއި އެހެން ކުޅިވަރުތަކަށްވެސް ވަރަށް އަގު ހެޔޮކޮށް ވަރަށް ކޮލިޓީ ރަނގަޅު ބައިނަލްއަގްވާމީ ފެންވަރުގެ ޖާޒީތައް ލިބިގެން ދާނެއެވެ.

މީގެ އިތުރުން މޯލްޑިވްސް އިސްލާމިކް ބޭންކް (އެމްއައިބީ) ގެ ފަރާތުން ކުރިޔަށް އޮތް 3 އަހަރު
ދުވަހަށް ގައުމީ ޓީމަށް ޖޯޒީ ފޯރުކޮށްދިނުމާ ގުޅޭ އެއްބަސްވުމެއްގައިވެ ސް ވަނީ ސޮއިކޮށްފައެވެ.