ރާއްޖޭގެ ދެކުނުގައިވެސް އަދި އުތުރުގައިވެސް އާބަން ސެންޓަރުތައް ގާއިމުކުރެވޭނެ ކަމަށް ހައުސިން މިނިސްޓްރީ އިން ބުނެފިއެވެ.
ހައުސިން މިނިސްޓްރީއިން ނެރުނު ބަޔާނުގައި ބުނީ ރައީސް ޑރ މުހައްމަދު މުއިއްޒުގެ ތަސައްވުރަކީ ރާއްޖޭގެ އުތުރުގެ ހަތަރު އަތޮޅު (ތިލަދުންމަތި އުތުރުބުރި، ތިލަދުންމަތި ދެކުނުބުރި، މިލަދުންމަޑުލު އުތުރުބުރި އަދި މިލަދުންމަޑުލު ދެކުނުބުރި) ހިމެނޭހެން އުތުރުގެ އުމްރާނީ ތަރައްގީގެ ސަރަހައްދަކާއި ރާއްޖޭގެ ދެކުނު ހަތަރު އަތޮޅު (ހުވަދުއަތޮޅު އުތުރުބުރި، ހުވަދުއަތޮޅު ދެކުނު ބުރި، ފުވައްމުލައް ސިޓީ އަދި އައްޑޫ ސިޓީ) ހިމެނޭހެން ދެކުނުގެ އުމްރާނީ ތަރައްގީގެ ސަރަހައްދެއް ތަރައްގީ ކުރުން ކަމަށެވެ.
އެ މިނިސްޓްރީއިން ބުނީ ދެ ސަރަހައްދުގައިވެސް އެކި ރަށްރަށް އާބާދީއާއި ތަރައްގީ އެއްފަސްކުރުމުގެ ސިޔާސަތުގެ ދަށުން އާރބަން ސެންޓަރުތަކުގެ ގޮތުގައި ތަރައްގީކުރެވޭނެއެވެ.
މީގެއިތުރުން އެ ދެ ސަރަހައްދުން ބޭރުން 7 އުމްރާނީ ތަރައްގީގެ މަރުކަޒު ނުވަތަ އާބަން ސެންޓަރު ރައީސް ޑރ މުހައްމަދު މުއިއްޒު ވަނީ އިއުލާނުކުރައްވާފައެވެ.
އާބަން ސެންޓަރުތައް ގާއިމްކުރާ ރަށްތައް:
- މާޅޮސްމަޑުލު އުތުރުބުރި އުނގޫފާރު
- މާޅޮސްމަޑުލު ދެކުނުބުރި އޭދަފުށި
- ފާދިއްޕޮޅު ނައިފަރު
- އަރިއަތޮޅު ދެކުނުބުރި މަހިބަދޫ
- ނިލަދެއަތޮޅު އުތުރުބުރި ނިލަންދޫ
- ނިންދެއަތޮޅު ދެކުނުބުރި ކުޑަ ހުވަދޫ
- ހައްދުންމަތި ފޮނަދޫ
ހައުސިން މިނިސްޓްރީ އިން ބުނީ އާބަން ސެންޓަރުތަކާއި ގުޅޭ މި މައުލޫމާތާއި ޚަބަރުތައް އޮޅުންއަރާފަދަ ގޮތަކަށް ފަތުރަމުންދާތީ، މި މައުލޫމާތު އާންމުކޮށް އަންގައި އިއުލާނު ކުރާ ކަމަށެވެ.
ރާއްޖޭގައި އާބަން ސެންޓަރުތަކެއް ގާއިމުކުރުމަށް މިއަދު ސަރުކާރުން ކުރި އިއުލާނާ ގުޅިގެން އިދިކޮޅު ފަރާތްތަކުން "ހަގީގަތް އޮޅޭ ގޮތަށް" ދައްކަމުންދާ ވާހަކަތަކަށް ރައިސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ރައްދު ދެއްވާފައެވެ.
ރައީސް ވިދާޅުވީ ކަންކަމުގެ ހަގީގަތް ނުބައްލަވާ، ނުވަތަ ޙަޤީޤަތް އެނގިވަޑައިގެން ތިއްބަވައިގެން، ސިޔާސީ ފައިދާ ހޯދުމުގެ ނިޔަތުގައި ސިޔާސީ ބައެއް ފަރާތްތަކުން ކުރައްވާ ކަންކަމަށް ޒިންމާވާނީ އެކަންކަން ކުރައްވާ ބޭފުޅުން ކަމަށެވެ.
