ރާއްޖޭގައި އާބަން ސެންޓަރުތަކެއް ގާއިމުކުރުމަށް މިއަދު ސަރުކާރުން ކުރި އިއުލާނާ ގުޅިގެން އިދިކޮޅު ފަރާތްތަކުން "ހަގީގަތް އޮޅޭ ގޮތަށް" ދައްކަމުންދާ ވާހަކަތަކަށް ރައިސުލްޖުމްހޫރިއްޔާ ޑރ. މުހައްމަދު މުއިއްޒު ރައްދުދެއްވައިފި އެވެ.
ރާއްޖޭގައި އާބަން ސެންޓަރުތައް ގާއިމްކުރާ ހަތް ރަށް ހައުސިން މިނިސްޓްރީއިން އިއުލާންކުރީ މިއަދެވެ. އެ ރަށްތަކަކީ، ރ. އުނގޫފާރު، ބ. އޭދަފުށި، ޅ. ނައިފަރު، އދ. މަހިބަދޫ، ފ. ނިލަންދޫ، ދ. ކުޑަހުވަދޫ އަދި ލ. ފޮނަދޫ އެވެ. މި އިއުލާނާއެކު އިދިކޮޅު ފަރާތްތަކުން ދަނީ، އަރބަން ސެންޓަރތައް އަޅަން ކަނޑައެޅި ރަށްތަކުގެ ތެރޭގައި ރާއްޖޭގެ ބައެއް ސަރަހައްދުތަކުގެ ރަށްތައް އުނިވެފައިވާތީ ސަރުކާރަށް ފާޑުކިޔަމުން ނެވެ.
އިދިކޮޅު އެމްޑީޕީގެ ރައީސް އަބްދުﷲ ޝާހިދު މިއަދު 'އެކްސް' ގައި ކުރެއްވި ޕޯސްޓެއްގައި ވެސް ވިދާޅުވީ "ރާއްޖޭގެ ބައެއް ސަރަހައްދުތައް ބޮޑުތިލަދުންމައްޗާއި، ރާއްޖޭގެ ދެކުނުގެ ސަރަހައްދު އުނިވެފައިވާ ސަބަބު އެސަރަހައްދުތަކުގައި ދިރިއުޅޭ ރައްޔިތުންނަށް ސަރުކާރުން ސާފުކޮށްދޭންޖެހޭ" ކަމަށެވެ. އަދި އެފަދަ ކަންކަން ނިންމުމުގައި ރަށު ކައުންސިލްތަކާއި އަތޮޅު ކައުންސިލްތަކުގެ މަޝްވަރާ ހޯދުމަކީ މުހިންމު ކަމެއް ކަމަށް ދެކިވަޑައިގަންނަވާ ކަމަށް ވެސް ވިދާޅުވި އެވެ.
މެނިފެސްޓޯގައި (ޗެޕްޓަރ 4، ނަންބަރު 12، 13 އަދި 14 ގައި) ވަރަށް ސާފުކޮށް ބަޔާންކޮށް އަދި މެނިފެސްޓޯ ލޯންޗްކުރި ޖަލްސާއިން ފެށިގެން މިއަދާ ހަމަޔަށް އެތައް ޖަލްސާއެއްގައި އަޅުގަނޑު ބަޔާންކޮށްފައިވާ ފަދައިން، ދެމެހެއްޓެނިވި ސަރަޙައްދީ ތަރައްޤީގެ ސިޔާސަތުގެ ދަށުން މާލެ އަރބަން ރީޖަން…
— Dr Mohamed Muizzu (@MMuizzu) November 9, 2024.
އިދިކޮޅުގެ މި ފާޑުކިޔުންތަކަށް ރައްދުދެއްވައި ރައީސް 'އެކްސް' ގައި ކުރެއްވި ޕޯސްޓުގައި ވިދާޅުވީ މާލެއިން އުތުރުން 3 އަދި މާލެއިން ދެކުނުން 7 އާބަން ސެންޓަރު ތަރައްގީކުރުމަކީ އެމަނިކުފާނުގެ މެނިފެސްޓޯގައާއި މިއަދާ ހަމަޔަށް ބޭއްވުނު އެތައް ޖަލްސާއެއްގައި ވެސް ވިދާޅުވަމުން ގެންދެވި ވާހަކަފުޅެއް ކަމަށެވެ. އާބަން ސެންޓަރުތަކުގެ އިތުރުން އެންމެ މަތީ ފަންތީގެ ހިދުމަތްތައް ހިމެނޭހެން، އެންމެ އުތުރުގެ 3 އަތޮޅު ހިމެނޭހެން ނޮރދަން އިންޓަރގްރޭޓަޑް ޑިވެލޮޕްމަންޓް ޒޯނަކާއި އެންމެ ދެކުނުގެ 4 އަތޮޅު ހިމެނޭހެން ސަރދަން އިންޓަރގްރޭޓަޑް ޑިވެލޮޕްމަންޓް ޒޯނެއް ތަރައްގީ ކުރުމަކީ ވެސް ސަރުކާރުގެ ސިޔާސަތެއްކަން ފާހަގަކުރައްވާ ރައީސް ވިދާޅުވި އެކަންކަމަކީ ކުރިޔަށް އޮތް 20 އަހަރު ދުވަހަށް އެކަށައަޅަން މަސައްކަތް ފަށާފައިވާ ތަރައްގީގެ މާސްޓަރޕްލޭންގައި ހިމަނާނެ ކަންކަން ކަމަށެވެ.
އަދި އެކަން ކުރާނީ ރާއްޖޭގެ ހުރިހާ ރަށެއްގެ ރައްޔިތުންގެ ހިޔާލާއި، ފަންނީ ފަރާތްތަކާއި ކައުންސިލްތަކާއި ކަމާބެހޭ ހުރިހާ ފަރާތްތަކެއްގެ ބައިވެރިވުމާއެކު ކަމަށް ވިދާޅުވި އެވެ.
އެމަނިކުފާނު ވިދާޅުވީ " ކަންކަމުގެ ހަގީގަތް ނުބައްލަވާ، ނުވަތަ ޙަޤީޤަތް އެނގިވަޑައިގެން ތިއްބަވައިގެން، ސިޔާސީ ފައިދާ ހޯދުމުގެ ނިޔަތުގައި ސިޔާސީ ބައެއް ފަރާތްތަކުން ކުރައްވާ ކަންކަމަށް ޒިންމާވާނީ އެކަންކަން ކުރައްވާ ބޭފުޅުން" ކަމަށެވެ.
ރައީސްގެ ސިޔާސަތުގެ ދަށުން ރާއްޖޭގައި އާބަން ސެންޓަރެއް ތަރައްގީކުރަން ކަނޑައެޅޭނީ އެ ރަށެއްގެ އާބާދީ ނުވަތަ ރަށްތަކުގެ އާބާދީ 10،000 އަށް ވުރެ ދަށް ނުވާ ނަމަ އެވެ. އެ ތަންތަނުގައި ގާއިމުކުރެވޭ އިންފްރާސްޓްރަކްޗަރ އަދި ހިދުމަތްތަކަށް ބަލައި ދަރަޖަވެސް ކުރެވިގެންދާނެ އެވެ.
