logo

އެންމެ ގިނަ ފަތުރުވެރިން ޒިޔާރައްކުރާ ގައުމުތަކުގެ ލިސްޓުގެ އެއްވަނައަށް އިންޑިޔާ

profile

ޔޫޝައު ހަސަން - 05 ޖޫން 2023 - 16:36

ޗައިނާގެ ފަތުރުވެރިންތަކެއް

ޗައިނާގެ ފަތުރުވެރިންތަކެއް

މިއަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު 8 ލައްކައަށް އަރައި އެންމެ ގިނައިން ފަތުރުވެރިން ޒިޔާރަތްކުރާ ގައުމުގެ ގޮތުގައި މީގެ ކުރިން އޮތް ރަޝިޔާ ފަހަތަށް ޖައްސާލުމަށްފަހު ލިސްޓުގެ އެއްވަނަ އަށް އިންޑިޔާ ޖެހިލައިފިއެވެ.

ޓޫރިޒަމް މިނިސްޓްރީން އާއްމުކޮށްފައިވާ ތަފާސްހިސާބުތަކުން ދައްކާ ގޮތުން މިދިޔަ ބުރާސްފަތި ދުވަހުގެ ނިޔަލަށް 821,247 ފަތުރުވެރިން ރާއްޖެ ޒިޔާރަތްކޮށްފައި ވާއިރު، މި އަދަދަކީ މިދިޔަ އަހަރުގެ އެ މުއްދަތާ އަޅައިބަލާއިރު 15.1 ޕަސެންޓް އިތުރު އަދަދެކެވެ. މިދިޔަ އަހަރުގެ އެ މުއްދަތުގައި ރާއްޖެއަށް ޒިޔާރަތްކުރީ 713,598 ފަތުރުވެރިންނެވެ.

އިންޑިއާއިން އަހަރުގެ މިހާތަނަށް 95,851 ފަތުރުވެރިން ޒިޔާރަތްކޮށްފައިވާ ކަމަށް ރެކޯޑުކުރެވިފައިވާ އިރު ދެވަނައިގައި އޮތް ރަޝިޔާއިން ޒިޔާރަތްކުރީ 95,780 އެވެ. އަދި ތިންވަނައިގައި އޮތީ އިނގިރޭސި ވިލާތެވެ. ޖެހިގެން ޖަރުމަނާއި އިޓަލީ އޮތް އިރު ޗައިނާ އަދިވެސް އޮތީ އެ ލިސްޓުގެ ހަވަނައިގައެވެ. ޗައިނާއިން އަހަރުގެ މިހާތަނަށް 47,690 ފަތުރުވެރިން ވަނީ ޒިޔާރަތްކޮށްފައެވެ.

ތަފާސްހިސާބުތަކުން ދައްކާ ގޮތުން ދުވާލެއްގެ މައްޗަށް އެވްރެޖުކޮށް 5،512 ފަތުރުވެރިން މިއަހަރު އަންނަނީ ޒިޔާރަތް ކުރަމުންނެވެ. އެ ފަތުރުވެރިން 7 ދުވަހާއި 8 ދުވަސް ރާއްޖޭގައި ހޭދަކުރެއެވެ.

ސަރުކާރުގެ އަމާޒަކީ މިއަހަރު މިއަހަރު ނިމޭއިރު ރާއްޖެއަށް 1.8 މިލިއަން ޓޫރިސްޓުން ގެނައުމެވެ.

އިންޑިއާއަކީ މިދިޔަ އަހަރުވެސް ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރި ގައުމެވެ. އެގައުމުން މިދިޔަ އަހަރު 241،369 ފަތުރުވެރިން ޒިޔާރަތްކުރިއެވެ.

https://int.etukuri.mv/
tel:+9607331319