ގޭސް ލީކުވުމުގެ ހާދިސާއެއްގައި އަންހެނަކު ނިޔާވެއްޖެ

ގޭސް ލީކުވުމުގެ ހާދިސާއެއްގައި 51 އަހަރުގެ ދިވެހި އަންހެނަކު ނިޔާވެއްޖެއެވެ.

ފުލުހުން ހާމަކުރި މައުލޫމާތަށް ބަލާއިރު، ނިޔާވެފައިވަނީ ދަފްތަރު ނަންބަރު ރސ 6210، 51 އަހަރުގެ ޒާހިދާ ތައުފީގެވެ.

ހޮސްޕިޓަލުން ލިބިފައިވާ މައުލޫމާތަށް ބަލާއިރު، ޒާހިދާ އައިޖީއެމް ހޮސްޕިޓަލަށް ގެންދިޔައިރުވެސް ހުންނެވީ އަވަހާރަވެފައިކަމަށް ވެއެވެ.

މި ހާދިސާގައި ހާލު ދެރަވި 19 އަހަރުގެ އަންހެނަކަށް ވެސް ވަނީ ހޮސްޕިޓަލުގައި ފަރުވާ ދޭން ފަށާފައެވެ. އެ ފަރާތަށް ފަރުވާ ދެމުންދަނީ އޭޑީކޭ ހޮސްޕިޓަލުގައެވެ.

ފުލުހުން ބުނި ގޮތުގައި، ދެ ފަރާތެއްގެ ހާލު ދެރަވެފައިވާ ކަމުގެ ރިޕޯޓް ލިބިފައިވަނީ މިއަދު ހެނދުނު 10:34 ހާއިރުއެވެ.

ހާދިސާ ހިނގާފައިވަނީ މާލެ، މާފަންނު، ދިލްކުޝާ ގޯޅީގައި ހުންނަ ގެއެއްގައެވެ.

ހާދިސާ ހިނގަން މެދުވެރިވި ސަބަބު ތަހުގީގުކޮށް ދެނެގަތުމުގެ މަސައްކަތް ކަމާ ގުޅޭ ފަރާތްތަކުން މިހާރު ދަނީ ކުރަމުންނެވެ.