މަދިރި ކޮންޓްރޯލްކުރުމަށް މާލެއާއި ވިލިމާލޭގައި ޚާއްޞަ ހަރަކާތެއް ފަށައިފި

މާލެއާއި ވިލިމާލޭގެ އެކި ސަރަހައްދުތަކުގައި މަދިރި އާލާވުމުގެ ފުރުސަތު އޮތް ތަންތަން ބަލައި ފާސްކުރުމަށާއި، މަދިރީގެ ޒަރީއާއިން ފެތުރޭ ބަލިތައް ކޮންޓްރޯލްކޮށް މަދިރި އުފެދުން ހުއްޓުވުމަށް އަޅަންޖެހޭ ފިޔަވަޅުތައް އެޅުމުގެ ގޮތުން ޚާއްޞަ މަސައްކަތްތަކެއް މާލެ ސިޓީ ކައުންސިލްގެ ޓީމުތަކުން ފަށައިފިއެވެ.

މާލެ ސިޓީ ކައުންސިލުން އެކްސްގައި ހިއްސާކުރި ޕޯސްޓެއްގައި ބުނެފައިވަނީ، ވެރިރަށް މާލެ އަދި ވިލިމާލޭގެ އާންމު ސަރަހައްދުތަކާއި، ގޯޅިތަކާއި، ފަޅު ގޯތިތަކުގެ އިތުރުން ފެން ހަރުލާ ގޮތަށް ހުންނަ ތަންތަން ބަލައި ފާސްކުރުމުގެ މަސައްކަތް އެ ކައުންސިލްގެ މުވައްޒަފުން މިހާރު ކުރަމުންދާ ކަމަށެވެ. މީގެ މައިގަނޑު ބޭނުމަކީ ވިއްސާރަ މޫސުމާ ގުޅިގެން މަދިރި އުފެދޭ މިންވަރު އިތުރުވިޔަ ނުދިނުމާއި، ޑެންގީ ހުން އަދި ޗިކުންގުންޔާ ފަދަ ނުރައްކާތެރި ބަލިތައް މުޖުތަމައުގައި ފެތުރުން ހުއްޓުވުމެވެ.

މި އޮޕަރޭޝަންގެ ދަށުން، ފެން ހަރުލާފައި ހުންނަ ތަކެއްޗާއި ކުނިތައް ނަގައި ސާފުކުރުމުގެ އިތުރުން، މަދިރި ފަނި ނައްތާލުމަށް ބޭސް އެޅުމާއި، ބޭނުންވާ ސަރަހައްދުތަކަށް ފޮގް ކުރުމުގެ މަސައްކަތް ވެސް ކައުންސިލްގެ ޓީމުތަކުން ދަނީ ކުރަމުންނެވެ. އަދި ޢިމާރާތްކުރާ ސައިޓުތަކާއި މީހުން ދިރިނޫޅޭ ތަންތަނުގައި ފެން ހަރުލާފައި ހުރިތޯ ބަލައި، އެފަދަ ތަންތަން ބަލަހައްޓާ ފަރާތްތަކަށް އިރުޝާދު ދިނުމުގެ މަސައްކަތް ވެސް ކުރިއަށްދާ ކަމަށް އެ ކައުންސިލުން މައުލޫމާތު ދެއެވެ.

މާލެ ސިޓީ ކައުންސިލުން ވަނީ ގޭބިސީތަކުގެ ގޯތިތެރެއާއި، ބެލްކަނީ ފަދަ ތަންތަނުގައި ފެން ހަރުލާ ގޮތަށް ހުންނަ ތަކެތި ސާފުކުރުމަށާއި، މަދިރި އުފެދޭ ގޮތަށް ހުންނަ ތަންތަން ނައްތާލުމަށް އާންމު ރައްޔިތުންގެ އެއްބާރުލުން ދެއްވުމަށް އެދިފައެވެ. މަދިރީގެ ޒަރީއާއިން ޖެހޭ ބަލިތަކުން ރައްކާތެރިވުމަށްޓަކައި އަމިއްލަ ސާފުތާހިރުކަމަށާއި ވެށީގެ ސާފުތާހިރުކަމަށް ސަމާލުކަން ދިނުމަކީ ނުހަނު މުހިންމު ކަމެއް ކަމަށްވެސް ކައުންސިލުން ފާހަގަކޮށްފައިވެއެވެ.