އިޤްތިޞާދުކުރުން

ތިމާއަށް ލިބޭ އެއްޗަކުން ފުއްދައިގެން ހޭދަ ކުރުމަކީ އިސްލާމީ އިޤްތިޞާދުގެ މުހިންމު އަސާސެކެވެ. މުދަލާއި ފައިސާއަކީ މާތް ﷲގެ އިންސާނާއަށް ދެއްވި ނިޢުމަތްތަކުގެ ތެރެއިން ވަރަށް މަތިވެރި ދެ ނިއުމަތެކެވެ. އަދި އެކަލާންގެ އަންގަވާފައިވާ ގޮތަށް މުދަލާއި ފައިސާ ހޯދުމާއި އެކަލާންގެ އަންގަވާފައިވާ ގޮތައް އެތަކެތި ހޭދަކުރުމަކީ ސަވާބާއި ދަރުމަ ހުރި ކަމެކެވެ.

ހޭދަކުރުމުގައި އިސްރާފް ނުކުރުމާއި ލިބޭ މިންވަރަށް ބަލައިގެން ހޭދަ ކުރުމަކީ އިސްލާމް ދީން އެދީނުގެ އަހުލުވެރިންނަށް ވަރަށް ބޮޑަށް ބާރުއަޅާ ކަމެކެވެ. މާބޮޑަށް ދަހިވުމާއި ލިބޭ އެއްޗެއް އެކީ އެކަށް ހޭދަކޮށް ހުސްކޮށްލުމަކީ އިސްލާމް ދީން ބާރުއަޅާ ކަމެއް ނޫނެވެ. ތިމާއަށް ލިބޭ އެއްޗަކުން ފުއްދައިގެން ހޭދަ ކުރުމަކީ އިސްލާމީ އިޤަތިޞާދުގެ މުހިންމު އަސާސެކެވެ. އިޤްތިޞާދު ކުރުމަކީ ހަރަދު ކުރުމުގައި މެދު މިންވަރަކަށް ޢަމަލު ކުރުމެވެ. ބޮޑެތި ޤައުމުތައް ތަރައްގީވެފައިވަނީ އުފެއްދުންތެރިކަމާއި އިޤްތިޞާދުކުރުން އެއީ އެންމެ މުހިންމު އަސާސް ކަމުގައި ބަަލައިގެން މަސައްކަތް ކުރުމުންނެވެ.

ލިބޭ އެއްޗެއް އެއްކޮށް ހޭދަކޮށް ހުސްކޮށްލުމަކީ އިސްލާމްދީން ބާރުއަޅާ ކަމެއް ނޫނެވެ. ޙާޖަތްތެރިން ތިމާމެންގެ ބޭނުންތައް ފުއްދުމަށްޓަކައި ދަރަނި ނެގުމަކީ އިސްލާމްދީނުގައި ހުއްދަކަމެކެވެ. ނަމަވެސް އެ ދަރަނި އަދާކުރުމަށް އަވަސްވެ ގަންނަން ޖެހޭނެއެވެ. އެހެނީ އިންސާނުންގެ ދިރިއުޅުމަކީ އޭގެ މިންވަރު ކަނޑައެޅިފައިވާ އެއްޗެކެވެ. އެހެންކަމުން އަބަދުވެސް ހުންނަން ޖެހޭނީ މީހުންގެ ހައްގުތަކާއި ދަރަނިތައް އަދާކޮށް މަރަށް ތައްޔާރުވެގެންނެވެ.

ދަރަނި ނެގުމަކީ ހަލާލުކަމެއް ނަމަވެސް ހަލާލު ކޮންމެ ކަމަކީ ކޮންމެހެން ކުރަންޖެހޭ ކަމެއް ނޫނެވެ. އަދި ދަރަންޏަށް އެއްޗެއް ނެގުމަކީ އެހެން ގޮތެއް އޮއްވައި އެއްގޮތަކަށްވެސް ކޮށްގެންވާނެ ކަމެއް ނޫނެވެ. ވިޔަފާރިތައް ކުރުމަށާއި ދިރިއުޅުމުގެ އެކި ބޭނުންތަކަށް ދަރަނި ނެގުން މީސްތަކުންގެ ތެރޭގައި އާންމުވެފައި ވިޔަސް، ދަންނާން ޖެހޭ ޙަޤީޤަތަކީ ދަރަންޏަކީ ނުރައްކާތެރި އެއްޗެއްކަމެވެ. ދަރަންޏެއް އޮތް މީހެއްގެ މައްޗަށް ކަށުނަމާދު ކުރެއްވުމަށް ރަސޫލާ ﷺ އިންކާރުކުރެއްވިއެވެ. މިކަމުން ވެސް ދަރަނީގެ ނުރައްކާތެރިކަން ދޭހަކޮށްދެއެވެ. ދަރަންޏާ ގުޅޭ ގޮތުން އައިސްފައިވާ ނަބަވީ އިރުޝާދުތަކަށް ވިސްނައިލުމުން އެނގެނީ ދަރަނި ނުނެގުމަށް އިސްލާމްދީން ބާރުއަޅުއްވާވަރެވެ. ދަރަންޏެއް ނެގިޔަސް އެއަށް ރައްކާތެރިވާން ޖެހޭކަމެވެ. މާތް ﷲ އަޅަމެންނަކީ ޙަލާލުގޮތުގައި ރިޒުޤު ހޯދާ ބަޔަކު ކަމުގައި ލައްވާށިއެވެ!

މިހާރު އާއްމު ރައްޔިތުންނާއި ޒުވާނުން އިޤްތިޞާދު ކުރުމަށް ހޭލުންތެރިކުރުވައި އެކަމުގެ ތަމްރީން އެމީހުންނަށް ފޯރުކޮށްދެން ޖެހެއެވެ. އަދި އިސްލާމްދީނުގައި މަސައްކަތެރިކަމާއި ހޭދަކުރުމާއި އިޤްތިޞާދުކުރުމުގެ ކަންތައް ހުރި ނެތް ގޮތުގެ މައްޗަށް އަދުގެ ޖީލު ހޭލުންތެރިކުރުވަން ޖެހެއެވެ. އެއީ މައިންބަފައިންނާއި ކަމާބެހޭ މަސްލޫވެރިންގެ ބޮލުގައި އެޅިފައިވާ ޒިންމާއެކެވެ.

އެކިއެކި ސަބަބުތަކާ ހުރެ މިއަދު ދުނިޔެއަށް ކުރިމަތިވަމުންދާ އިޤްތިޞާދީ ހީނަރުކަމުގެ ސަބަބުން ކުރިމަތިވެފައިވާ އެންމެ ބޮޑު ދަތިކަމަކީ ވަޒީފާ ގެއްލުމާއި ވިޔަފާރިތައް ބަނގުރޫޓުވުމާއި މަސައްކަތްތައް ހުއްޓިފައިވުމުގެ ސަބަބުން ކުރިމަތިވެފައިވާ މާލީ ދަތިކަމެވެ. އެފަދަ ހާލަތްތަކުގައި ލިބޭ މިންވަރުން ފުއްދާލައި ބޭނުންތައް ބަހާލައިގެން އުޅުމަކީ މުސްލިމުންގެ ގޮތެވެ.

މީގެ އިތުރުން ތަނަވަސްކަމާއި ދަތި ހާލުގައި ވެސް ޚަރަދުތައް ކުޑަކޮށް، ބޭކާރު ކަންކަމަށް ހޭދަކުރުމުން އެއްކިބާވާން ޖެހެއެވެ. ތިމާއަށް ލިބޭ އެއްޗަކުން ފުއްދައި، އިޤްތިޞާދު ކުރުމަށް ދަސްކުރަން ޖެހެއެވެ.