މުޅި ޝިޕްމަންޓަށް ޑިއުޓީ ދެއްކީމާ ނޫން ގޮތަކަށް ދުންފަތުގެ ބާވަތްތަކަށް ކަސްޓަމްސް ކްލިއަރަންސް ނުދޭ ގޮތަށް ގަވާއިދު އިސްލާހުކޮށްފިއެވެ.
ކަސްޓަމްސްގެ އާންމު ގަވާއިދަށް ގެނައި އިސްލާހު ގެސެޓްކޮށްފައިވާއިރު ގަވާއިދު ބުނާ ގޮތުން، ރާއްޖެއަށް އެތެރެ ކުރުމާއި އަދި ރާއްޖެއިން ބޭރުކުރުން ހުއްދަ ކޮންމެ އެއްޗެއް ބެހެއްޓުމަށް ބޮންޑެޑް ވެއާހައުސް އެއް ރަޖިސްޓަރީކުރެވެއެވެ.
އެކަމަކު އެ ގަވާއިދު މި މާއްދާގެ އިސްލާހުގައި ބުނެފައިވަނީ، ސިނގިރޭޓާއި ބިޑި ފަދަ ދުންފަތުގެ ބާވަތްތަކާއި، އީ-ސިނގިރޭޓާއި ވޭޕް އަދި އޭރޯސޮލް ބޭރުކޮށްދޭ ޓޮބޭކޯ ސްޓިކް ނުހިމެނޭ ކަމަށެވެ.
މީގެ ކުރިން، ދުންފަތުގެ ބާވަތްތައް އެތެރެކުރާ ފަރާތްތަކުން ޑިއުޓީ ދައްކަމުންދަނީ، ބޮންޑެޑް ވެއާހައުސް އިން މުދާ ނެރޭ މިންވަރަކަށެވެ. މިހާރު ގަވާއިދު ބުނާ ގޮތުން، މިބާވަތްތައް އެތެރެކޮށް، ކަނޑައެޅިފައިވާ މުއްދަތުގައި މުދާ ކްލިއާ ކުރާ އިރު، މުޅި ޝިޕްމަންޓަށް ޑިއުޓީ ދެއްކުން ލާޒިމުވާނެއެވެ.
މީގެ އިތުރުން، ހަށިގަނޑަށް ގެއްލުން ލިބޭ ބަނގުރަލާއ،ި އޫރުމަހާއ،ި އޫރުމަސް އެކުލެވޭ ތަކެއްޗާއ،ި ދުންފަތުގެ ބާވަތްތައް ޝިޕް ސްޓޯސްގެ ގޮތުގައި މުދާ ދޫކުރެވޭ ގޮތަށް އޮތް މާއްދާ ވެސް ކަސްޓަމްސްއިން ވަނީ އިސްލާހުކޮށްފައެވެ.
ކަސްޓަމްސްގެ ގަވާއިދު އިސްލާހުކުރުމުގެ ކުރިން، ކަސްޓަމްސްއިން ހުއްދަކުރާ މިންވަރަކަށް، ރަޖިސްޓަރީކޮށްފައިވާ ބޮންޑެޑް ވެއާހައުސްއަކުން ޝިޕް ސްޓޯސްގެ ގޮތުގައ،ި އިމްޕޯޓް ޑިއުޓީއިން އިސްތިސްނާވާ ގޮތެއްގެ މަތީން މިބާވަތްތައް ދޫކުރެވެއެވެ.
އެކަމަކު، އެ މާއްދާ އިން މިހާރު ވަނީ އެ ބައި އުނިކޮށް، ބަނގުރަލާއ،ި އޫރުމަހާއ،ި އޫރުމަސް އެކުލެވޭ ތަކެއްޗާއ،ި ދުންފަތުގެ ބާވަތްތައް ޝިޕް ސްޓޯސްގެ ގޮތުގައި މުދާ ދޫކުރަން ހުއްދަ ނުދެވޭ ގޮތަށް ހަދައިފައެވެ.
މީގެ އިތުރުން، ބޮންޑެޑް ވެއާހައުސް ހެދުމާބެހޭ މާއްދާ ވެސް ކަސްޓަމްސް އިން ވަނީ އިސްލާހުކޮށްފައެވެ.
މިގޮތުން، ބޮންޑެޑް ވެއާހައުސްގެ ގޮތުގައި ކަސްޓަމްސްގެ ކޮންޓްރޯލް އޮންނަ ސަރަހައްދުތަކުގެ އިތުރުން، ކަސްޓަމްސްއިން ކަނޑައަޅައި އާންމުކުރާ އައިޓަމްތަކެއް ބެހެއްޓުމަށް ހާއްސަކުރާ ބޮންޑެޑް ވެއާހައުސް ކަސްޓަމްސްގެ އޮފީސްތައް ހުންނަ ސަރަހައްދުތަކުގައި ހެދިދާނެ ކަމަށް އިސްލާހުގައި ބުނެފައިވެއެވެ.
އޮޅުވާލައިގެން މުދާ އެތެރެކުރާނަމަ، ކަސްޓަމްސް އިން ކުރެވޭ ޖޫރިމަނާތަކަށް ވެސް އާ އިސްލާހުގައި ވަނީ ބަދަލުތަކެއް ގެނެސްފައެވެ.
މިގޮތުން، އިންވާޑް އަދި އައުޓްވާޑް ކާގޯ މެނިފެސްޓް ނުހިމަނައި ރާއްޖެއަށް ސިއްރުން މުދާ އެތެރެކުރުން ނުވަތަ ކުރަން އުޅުން ނުވަތަ ކުރުމުގައި ބައިވެރިވާނަމަ، ކޮންމެ ފަހަރަކު 200،000 ރުފިޔާގެ ޖޫރިމަނާއެއް ގަވާއިދުގައި ވަނީ ހިމަނައިފައެވެ.
އަދި މުދާ އުފުލާ އުޅަނދު ބަނދަރުކުރާ ތަނާއި، ރޫޓު ނުވަތަ ރާއްޖެއަށް ވަންނަން ބޭނުންކުރާ ސަރަހައްދު ކަމަށް ކަސްޓަމްސްއަށް ހުށަހަޅާ ލިޔުންތަކާ ހިލާފަށް ދަތުރުކޮށް ނުވަތަ ބަނދަރުކޮށްފިނަމަ 100،00 ރުފިޔާއިން ޖޫރިމަނާ ކުރެވޭ ގޮތަށް ގަވާއިދު ވަނީ އިސްލާހުކޮށްފައެވެ.
