ބޯޓުގައި ރޯވުން: ދަތުރުކުރި ޒުވާނަކު ގެއްލިގެން ހޯދަނީ

ނ. ހޮޅުދޫގެ މުދާ އުފުލާ ބޯޓެއްގައި ރޯވެ އަނދަމުންދާއިރު، ބޯޓުން ދަތުރު ކުރި ޒުވާނަކު ގެއްލިގެން ހޯދަމުންދާ ކަމަށް އެމްއެންޑީއެފުން ބުނެފިއެވެ.

އެމްއެންޑީއެފުން މީޑިއާތަކާ ހިއްސާކުރި މެސެޖެއްގައި ބުނީ، 'ހޮޅުދޫ ބޯޓު' ކިޔާ މުދާ އުފުލާ ބޯޓެއްގައި އަލިފާން ރޯވެގެން ކައްދޫ ފަޔާ ސްޓޭޝަނުން ހަރަކާތްތެރިވަމުން އަންނަ ކަމަށެވެ.

އެމްއެންޑީއެފުން ބުނިގޮތުގައި އެ ބޯޓުން ދަތުރު ކުރަމުން ދިޔައީ ކެޕްޓަންއާއެކު 18 މީހުން ކަމަށާއި 17 މީހުން ސަލާމަތްކޮށްފައިވާ ކަމަށެވެ.

ގެއްލިގެން ހޯދަމުން ދަނީ ލ. މާވަށަށް ނިސްބަތްވާ 25 އަހަރުގެ އަލީ މުޝްފިގް މުހައްމަދެވެ.

މައުލޫމާތު ލިބޭގޮތުގައި އެ ބޯޓުން ދަތުރުކުރި އެންމެންނަކީ ވެސް މާވަށު މީހުނެވެ. އަދި ބޯޓުގައި ރޯވުމުން އެންމެން ވަނީ މޫދަށް ފުންމާލާފައެވެ.

މުޅި ބޯޓުގައި އަލިފާން ރޯވެ އަނދާފައިވާއިރު، ބޯޓުގައި އެންމެ ފުރަތަމަވެސް އަލިފާން ރޯވީ ލައިފްޖެކެޓް ހުންނަ ތަނުގައި ކަމަށް މައުލޫމާތު ލިބެއެވެ.