މިއަހަރުގެ އޮގަސްޓު މަހުގެ ނިޔަލަށް މުދަލު ޒަކާތުގެ ގޮތުގައި ދައުލަތަށް 104.4 މިލިއަން ރުފިޔާ!

މިއަހަރުގެ އޮގަސްޓު މަހުގެ ނިޔަލަށް މުދަލު ޒަކާތުގެ ގޮތުގައި ދައުލަތަށް 104.4 މިލިއަން ރުފިޔާ ލިބިފައިވާ ކަމަށް މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) ގެ ތަފާސްހިސާބުތަކުން ދައްކައިފިއެވެ.

މީރާއިން އާންމުކޮށްފައިވާ މިއަހަރުގެ އޮގަސްޓު މަހުގެ މާލީ ރިޕޯޓުގައިވާ ގޮތުން، އަހަރުގެ މިހާތަނަށް ދައުލަތަށް މުދަލު ޒަކާތުގެ ގޮތުގައި ޖުމްލަ 104،465،702 (އެއްސަތޭކަ ހަތަރު މިލިއަން ހަތަރު ލައްކަ ފަސްދޮޅަސް ފަސްހާސް ހަތްސަތޭކަ ދޭއް) ރުފިޔާ ވަނީ ލިބިފައެވެ. މިދިޔަ އަހަރުގެ މި މުއްދަތުގައި ޒަކާތުގެ ގޮތުގައި ލިބިފައިވަނީ 82،163،911 (އަށްޑިހަ ދެ މިލިއަން އެއްލައްކަ ފަސްދޮޅަސް ތިންހާސް ނުވަސަތޭކަ އެގާރަ) ރުފިޔާއެވެ. އެހެންކަމުން މިއީ ވޭތުވެދިޔަ 2023 ވަނަ އަހަރުގެ މި މުއްދަތާ އަޅާބަލާއިރު %27 ގެ ބޮޑު ކުރިއެރުމެކެވެ.

އަހަރުގެ މިހާތަނަށް ލިބުނު ޖުމްލަ އަދަދު އިތުރުވި ނަމަވެސް، ނިމިދިޔަ އޮގަސްޓު މަހު އެކަނި މުދަލު ޒަކާތުގެ ގޮތުގައި ލިބުނު އަދަދު ވަނީ މިދިޔަ އަހަރުގެ އޮގަސްޓު މަހާ އަޅާބަލާއިރު ދަށްވެފައެވެ. އެގޮތުން މިދިޔަ އޮގަސްޓު މަހު ޒަކާތުގެ ގޮތުގައި ލިބިފައިވަނީ 7 މިލިއަން ރުފިޔާއެވެ. ނަމަވެސް، 2023 ވަނަ އަހަރުގެ އޮގަސްޓު މަހު މުދަލު ޒަކާތުގެ ގޮތުގައި 8 މިލިއަން ރުފިޔާ ލިބިފައިވެއެވެ.

މުދަލުގެ ޒަކާތަކީ އިސްލާމްދީނުގެ ރުކުންތަކުގެ ތެރޭގައި ހިމެނޭ، އެމީހެއްގެ މުދަލުގައި ނިޞާބު ހަމަވާތާ އަހަރެއް ފުރިފައިވާ ކޮންމެ މުސްލިމެއްގެ މައްޗަށް އޮތް ފަރުޟު އަދި ދީނީ މުހިންމު ވާޖިބެކެވެ. މުދަލު ޒަކާތުގެ ނިޞާބަކީ ތިމާގެ މުދަލުގައި އެ މިންވަރެއް ހަމަވުމުން އެއިން މުދަލު ޒަކާތް ނެރުން ވާޖިބުވާ އެންމެ މަދު މިންވަރެވެ.

ދިވެހިރާއްޖޭގައި މިދިޔަ މަހުގެ 20 ވަނަ ދުވަހުން ފެށިގެން މުދަލު ޒަކާތް ނެރުން ވާޖިބުވާ ނިޞާބުގެ މިންވަރަކީ 19،266.10 (ނަވާރަހާސް ދުއިސައްތަ ފަސްދޮޅަސް ހައެއް ޕޮއިންޓް ދިހައެއް) ދިވެހި ރުފިޔާއެވެ. ރާއްޖޭގައި ޒަކާތުގެ ނިޞާބު ކަނޑައަޅަނީ ރިހީގެ އަގަށް ބަލައިގެން އިސްލާމީ ކަންތައްތަކާ ބެހޭ ވުޒާރާއިންނެވެ.