ވަޢުދުތައް ނުފުއްދޭނަމަ އާންމު އިންތިހާބު އެމްޑީޕީއަށް ކާމިޔާބުކުރަން އުނދަގޫވާނެ ކަމަށް ރައީސް ނަޝީދު ވިދާޅުވެއްޖެ

ވަޢުދުތައް ނުފުއްދޭނަމަ އާއްމު އިންތިހާބު އެމްޑީޕީއަށް ކާމިޔާބުކުރަން އުނދަގޫވާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް މުހައްމަދު ނަޝީދު މިހާރު ދެއްވަމުން ގެންދަވާ ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވިދާޅުވީ، ރަށްރަށުގައި ފެނާއި ނަރުދަމާގެ ޕްރޮޖެކްޓުތައް ހިންގަން މާ ގިނަ ދުވަސް ނަގާ ކަމަށާއި، އެހެން ނަމަވެސް، އާދައިގެ ރިސޯޓެއްގައި ފެނާއި ނަރުދަމާ އަޅަނީ އެންމެ ގިނަވެގެންވެސް ތިން މަހާއި ހަތަރު މަހާއި ދެމެދުގެ މުއްދަތެއް ކަމަށެވެ.

ރައީސް ނަޝީދު ވިދާޅުވީ، ރަށްރަށުގެ ތަރައްޤީ ނުހިނގަނީ މަޝްރޫޢު ފެށުމަށްފަހު، ކުޑަކޮށް މަސައްކަތްކޮށްލާފައި އެކަން އެއްކޮށް ނުނިންމާ އެހެން ތަނަކަށް މެޝިނަރީޒް ގެންދާތީ ކަމަށެވެ. މިކަމުގެ މިސާލެއްގެ ގޮތުގައި ރައީސް ނަޝީދު ގެންދެވީ، ކޮންނަ ބޯޓު ޖައްރާފުގެ މިސާލެވެ. އެގޮތުން މަހާ ޖައްރާފުން ބިން ހިއްކަން ފަށާ ޕްރޮޖެކްޓް ނުނިމެނީސް އެހެން ރަށަކަށް ގެންދާ ކަމަށް ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ، ކޮމަންޑޫ ބައި އިލެކްޝަންގައި ދެ ކޮމަންޑޫ ގުޅުވާލަން ވަޢުދުވި ކަމަށެވެ. އަދި ދެ ކޮމަންޑޫ ގުޅުވާލުމަކީ އަބަދުވެސް އެމްޑީޕީގެ ސިޔާސަތެއް ކަމަށެވެ. އެހެން ނަމަވެސް، އިންތިހބު ނިމި އެތައް ދުވަހެއް ވީއިރުވެސް އެކަން ނުވެ އޮތުމުން ވަރަށް އެއްޗެހި ކިޔާ ކަމަށް ރައީސް ނަޝީދު ވިދާޅުވިއެވެ. އެހެން ނަމަވެސް، އެފަދަ ހުރިހާ ވާހަކައެއް އަދި ޝަކުވާތައް އަޑު އަހާނެ ކަމަވެސް ނަޝީދު ވިދާޅުވިއެވެ.

ރައްޔިތުންނަށް އެމްޑީޕީން ވެފައިވާ ވަޢުދުތައް ފުއްދަވަމުން ނުގެންދާނަމަ އެމްޑީޕީއަށް އާންމު އިންތިހާބު ކާމިޔާބުކުރަން އުނދަގޫވާނެ ކަމަށާއި، އަމުދުން ރައީސް އިބްރާހިމް މުހައްމަދު ސޯލިހަށް އިންތިހާބު ކާމިޔާބުކުރެވިދާނެ އެއްވެސް ގޮތެއް ނެތް ކަމަށެވެ. ރައީސް ނަޝީދު ވިދާޅުވީ، އެމަނިކުފާނުގެ ކެމްޕޭން ދަތުރުތަކުން ފެންނަ ފެނުމުގައި ރައީސް އިބްރާހިމް މުހައްމަދު ސޯލިހަށް ޕްރައިމަރީ ކާމިޔާބު ވެދާނެ އެއްވެސް ގޮތެއްވެސް ނެތް ކަމަށެވެ.

މިރޭގެ ޕްރެސް ކޮންފަރެންސަކީ، ރައީސް ނަޝީދު ހައްދުއްމައްޗަށް ކުރެއްވި ކެމްޕޭން ދަތުރުފުޅާއި ބެހޭ ގޮތުން މަޢުލޫމާތު ދެއްވުމަށް ބާއްވަމުން ގެންދަވާ ނޫސްވެރިންގެ ބައްދަލުވުމެކެވެ.