އިސްތިއުމާރީ އިސްރާއީލުގެ އެއްގަމު ސިފައިންގެ ބޭހަކާއި، ކަނޑުގެ ސިފައިންގެ ބޭހަކަށް ހިޒްބުﷲއިން ވަރުގަދަ ރޮކެޓް ހަމަލާތަކެއް ދީފިއެވެ.
މި ހަމަލާތައް ހިޒްބުﷲއިން ދީފައިވަނީ ގައިޑެޑް ރޮކެޓްތަކެއް ބޭނުންކޮށްގެންނެވެ.
ހިޒްބުﷲގެ ރޮކެޓް ހަމަލާތައް އަމާޒުވެފައިވާ އެއްގަމު ސިފައިންގެ ބޭހަކީ ހިފާފައިވާ ގޯލާންގެ ސަރަހައްދުގައި ގާއިމްކޮށްފައިވާ ބޭސްއެކެވެ.
ރޮކެޓު ހަމަލާތައް އަމާޒުކޮށްފައިވާ ކަނޑުގެ ސިފައިންގެ ބޭހަކީ ހައިފާގެ އައްސޭރިފަށުގައި ގާއިމްކޮށްފައިވާ ބޭސްއެކެވެ.
މި ބޭސްތަކަށް ހިޒްބުﷲއިން ދިން ހަމަލާތަކުގައި، ތަންތަން ގޮވައިގެންދާ މަންޒަރުތަކާއި، ބޯދުންތައް އަރަމުންދާ މަންޒަރުތައް ފެންނަ ވީޑިއޯތައް ސޯޝަލް މީޑިއާގައި ދަނީ ދައުރުވަމުންނެވެ.
މީގެތެރެއިން، ހައިފާގެ ކަނޑުގެ ސިފައިންގެ ބޭހަށް ދިން ހަމަލާއަކީ 24 ގަޑިއިރުގެ ތެރޭގައި އެ ތަނަށް ދިން ދެވަނަ ހަމަލާއެވެ.
ބައެއް މީޑިއާ ރިޕޯޓްތައް ބުނާގޮތުގައި ހިޒްބުﷲގެ ހަމަލާތަކުގައި އަސްކަރީ ބޭސްތައް އަލުން ބޭނުން ނުކުރެވޭ ވަރަށް ވަނީ ގެއްލުން ދީފައެވެ.
ހިޒްބުﷲގެ ވަރުގަދަ ރޮކެޓް ހަމަލާތަކެއް ދިންކަން އިސްރާއީލުގެ އަސްކަރިއްޔާއިން ކަށަވަރު ކޮށްދިން ނަމަވެސް. ހަމަލާތައް އަމާޒުވީ ކޮން ތާކަށް ކަމެއް އަދި ލިބުނު ގެއްލުންތައް ހާމަކޮށްފައެއް ނުވެއެވެ.
އިސްރާއީލުގެ ރަށްތަކަށް ދިން ހަމަލާތަކުގެ ތަފްސީލް ބަޔާންކޮށް ހިޒްބުﷲއިން ވަނީ ބަޔާނެއް ނެރެފައެވެ. އެ ބަޔާނުގައި ބުނެފައިވަނީ 17 ގަޑިއިރުގެ ތެރޭގައި އިސްރާއީލަށް ވަރުގަދަ 16 ހަމަލާ ދީފައިވާ ކަމަށް،، އަދި ބައެއް ހަމަލާތަކުގެ މަންޒަރު ފެންނަ ވީޑިއޯތައްވެސް އާންމުކޮށްފައިވެއެވެ.
ހިޒްބުﷲއިން އިސްރާއީލަށް ދެމުންގެންދާ ހަމަލާތަކުގައި އެޑްވާންސްޑް ރޮކެޓާއި، މިސައިލާއި އަދި ޑްރޯންވެސް ބޭނުންކުރަމުން ގެންދާއިރު، ހަމަލާތައް މައިގަނޑުގޮތެއްގައި އަމާޒުކުރަމުން ގެންދަނީ އިސްތިއުމާރީ ސިފައިންގެ ބޭސްތަކަށާއި، މަރުކަޒުތަކަށާއި، ވައިގެ ދިފާއީ ސިސްޓަމްތަކަށެވެ. މިކަމުގެ މައިގަނޑު ބޭނުމަކީ، އިސްރާއީލާ ދެކޮޅަށް ހިޒްބުﷲއިން ފަށަންއުޅޭ ވަރުގަދަ ހަނަގުރާމައާއެކު އިސްރާއީލަށް އަރައިގަތުމުގެކުރިން ދުޝްމަނުންގެ ސިފައިން ބަލިކަށި ކޮށްލުން ކަމަށް ކަށަވަރު ނުވާ ރިޕޯޓްތައް ބުނެއެވެ.
އިސްރާއީލަށް ހަމަލާ ދެމުން ގެންދިއުމާއެކު، ހިޒްބުﷲ މުޖާހިދުން މިހާރުދަނީ އެއްގަމުމަގުން ލުބުނާނުގެ ތެރެއަށް ވަދެގެންއުޅޭ އިސްރާއީލު ސިފައިންނާ ދެކޮޅަށް ގެރިއްލާ އުކުޅުތައް ބޭނުންކޮށްގެން ދުޝްމަނުންގެ އެތައްބަޔަކު މަރައި، ހަތިޔާރާއި، އަސްކަރީ ވެހިކަލްތައްވެސް ގޮއްވަމުންނެވެ.
