އިސްރާއީލުގެ ތެލް އަވީވްގައި ހުންނަ، ހަނގުރާމައިގެ މިނިސްޓްރީގެ ހެޑް ކުއާޓަރަށް ހަމަލާ ދީފިކަމަށް، ހިޒްބުﷲއިން ބުނެފިއެވެ.
މިއީ، އިސްރާއީލުގެ ކިރްޔާ އަސްކަރީ ބޭހުގައި ގާއިމްކޮށްފައިވާ ހަނގުރާމައިގެ މިނިސްޓްރީގެ ހެޑް ކުއާޓަރެވެ. އަދި މިއީ، އެ ތަނަށް ހިޒްބުﷲއިން ވައިގެ ހަމަލާއެއްދިން ފުރަތަމަ ފަހަރެވެ.
ހަމަލާދިން ބޭހަކީ އިސްރާއީލު ހަނގުރާމައިގެ މިނިސްޓްރީގެ ހެޑް ކުއާޓަރުގެ އިތުރުން، އިސްރާއީލު އަސްކަރިއްޔާގެ ޖެނެރަލް ސްޓާފްގެ އޮފީހާއި، ހަނގުރާމައިގެ މެނޭޖްމަންޓް ރޫމާއި، އިސްރާއީލު އެއަރފޯސްގެ ކޮންޓްރޯލް ރޫމާއި، އަސްކަރިއްޔާގެ ސުޕަވިޝަން އޮތޯރިޓީވެސް ހުންނަތަން ކަމަށްވެސް ހިޒްބުﷲއިން ބުނެފައި ވެއެވެ.
އެތަނަށް ހަމަލާދިނީ ބެލިސްޓިކް މިސައިލާއި، ހަމަލާދޭ ބާވަތުގެ ޑްރޯންތައް ބޭނުންކޮށްގެން ކަމަށާއި، ހަމަލާތައް އޭގެ އަމާޒަށް ވާސިލްވި ކަމަށްވެސް ހިޒްބުﷲއިން ބުނެފައި ވެއެވެ.
މި ހަމަލާތަކުގެ އިތުރުން، އިސްރާއީލުގެ އުތުރުގެ ނަހަރިޔާގައި ގާއިމްކޮށްފައިވާ އިސްރާއީލު އަސްކަރިއްޔާގެ 146 ވަނަ ޑިވިޜަންގެ ލޮޖިސްޓިކަލް ބޭސްއަށްވެސް ރޮކެޓްގެ ވަރުގަދަ ހަމަލާތަކެއް ދީފައިވާ ކަމަށް ހިޒްބުﷲއިން ބުނެފައި ވެއެވެ.
ހިޒްބުﷲއިން ތެލް އަވީވަށާއި، ނަހަރިޔާގެ އިތުރުން، އިސްރާއީލުގެ ހަދޭރާ، ނެތަންޔާ، ކަސޭރިއާއަށްވެސް ރޮކެޓު ހަމަލާތައް އޮއްސަން ފެށުމުން މުޅި އިސްރާއީލުން ނުރައްކަލުގެ ޑަނޑޫރާގެ އަޑުފަށްޑާއެކު މިލިއަކަށްވުރެ ގިނަ މީހުންވަނީ ބިންގަރާސްތަކަށް ވަދެ ފިލާފައެވެ.
ރަށުތެރެއިން ތަންތަން ގޮވާ މަންޒަރުތައް ފެންނަ ވީޑިއޯތައް ސޯޝަލް މީޑިއާގައި ދައުރުވަމުންވެސް އެބަދެއެވެ. ހިޒްބުﷲގެ ހަމަލާތަކާއެކު މީހުން ފުލަންދުވާ މަންޒަރުވެސް ވީޑިއޯތަކުން ފެނެއެވެ.
